1Atuau, Ko na kamaiuai mairouia taan ribaai.
Kamanoai mairouia akana eekainako!
2Kamaiuai mairouia aomata ake a buakaka akekei
ake a kani kam'aruaai.
3Ao noriia, akana karabaia n tataninga b'a a na kam'aneai ni kamateai.
Akana botiia aia koraki ni kakam'arua b'a a na kamateai.
B'a akea te bure ke te kaairua ae I a tia ni karaoia,
4Ke te b'ai ae I bure iai b'a e buakaka, te UEA,
ao ni kabaikoaia nakon aia tabo.
5Tei rake, te UEA ae Moan te M'aaka, ao nako mai buokai;
Atuan Iteraera, nako mai noria Ngkoe!
Kamarurungko, ao kareke kaiia botannaomata aika beekan;
Tai nanoangaiia ngkai bon taani kam'aruaia raoia nakoia aiaia!
6A oki n te tairiki,
ao a karongoaea te aba kanga ai aroia kamea aika aiwaa ni karongoa i nanon te kaawa.
7Ongora ni b'anaaia ni kamaraki nano.
Ai aroni kabaang neweia i nanoni wiia,
ao a taku n aia iango b'a akea ae e ongo b'anaaia.
8Ma Ngkoe, te UEA, Ko ngareakiniia;
Ko kakanikoia botannaomata aika beekan.
9I mwioko ni korakoram;
Te Atua, boni nneu ni katantan Ngkoe.
10E tangirai Atuau ao E na nako iu;
E na kairai b'a N na noriia taan ribaai ngkana a tae aia kai.
11Te Atua, tai kamateia, b'a a kaawa au aomata ni m'aninga taekan am Tokanikai.
Kauamaenakoia ni m'aakam ao katae aia kai,
te Uea ae te tia kamanoira.
12A bure n aia taeka ni kabane:
Ke a m'ane n aia kainikatonga.
Ao i bukin aia karereanti ma kewekewe,
13Ko na kamateia n unim,
n akea ae na tiku ni maiu;
Ao ane a na ataia aomata nako b'a E tautaeka te Atua, i aoia Iteraera
ao ana tautaeka e raababa nako nakon ni kabutaa aonnaba.
14A oki taan ribaai n te tairiki,
ao a karongoa n ai aroia kamea aika aiwaa i nanon te kaawa:
15Ai aroia kamea aika aiwaa ni kakaaei kanaia,
Ao a tatangitang ni kaota aki raun nanoia
ngkana e aki tau m'aitini kanaia.
16Ma ngai N na anenea taekani m'aakam;
N na kanenea b'anaau n te ingabong koraki i bukin am tangira ae teimatoa.
B'a Ko a tia n riki b'a nneu ni kamanomano
ao ni katantan n te bong ae e kai nanou iai.
17N na neboiko, te tia kamanoai.
Boni nneu ni katantan te Atua,
ae Ngaia ae tangirai.
Who We AreWhat We EelieveWhat We Do
2025 by iamachristian.org,Inc All rights reserved.
