Te Tua-Kaua 16 - Kiribati New Version Bible

Te Riao(Te Oti 12.1-20; Nak 23.4-8)Ao e taku Moote:

1Kaain Iteraera, kam na riai kauringa te Riao n te nam'akaina are Abibi, i bukina b'a E kamaiungkami te UEA ae Atuami mai Aikubita n ririki aika nako n te tairiki teuana n te nam'akaina anne.

2Taiani karea i bukin te Riao bon te kao, te tiibu, ao te kooti, ma kam na anga n taabo ake E a tia n rinei te UEA b'a taabo n taromauri.

3-4Kam na kang taian iriko ni kabane akana taiani karea i bukin te Riao n te tairiki naba anne. Ma kam na aki kamanena te kariki ae karikaki n tain te am'arake n te Riao. Kam na kamanena te aekaki ni kariki are mmani are kam kanna naba ngke tooro ngkoa ngkami aika kam karawawataaki i Aikubita, ao ngke kam nang kiitana Aikubita n te tai ae waekoa. E na riki te kariki ae mmani aei b'a kauringakimi n taai nako te bong are kam kiitana iai Aikubita.

Kam na aki karaoa te kariki ae itinaki i nanon itiua te bong, i nanon bongin te Toa are te Riao, Kam na aki karaoa te kariki ae itinaki. E nanonaki raoi iai b'a a na bon akea te iti i aon Iteraera ni kabutaa.

5Kam na aki anga karean te Riao ni kaawa n aki akaaka akana kam maeka iai

6kam ti riai n anga n taabo akana E a tia n rinei te UEA b'a taabo n taromauri. Kam na tiringa te karea n te b'akantaai, te tai are kam kitana iai Aikubita.

7Ao i mwiina, kuukanna, ao kanna naba ikekei n te tabo n taromauri, ao okira ami autinrianna n te ingabong are i mwiina.

8Kam na kana te kariki are mmani i nanon riki onoua te bong. Ao n te kaitiua ni bong, kam na aki m'akuri iai, ma kam na ikotaki n taromauria te UEA.

Te Toa are Taian Te Uita(Te Oti 34.22; Nak 23.15-21)Ao e taku Moote nakoia Iteraera:

9Wareka itiua te wiiki i mwiin karaoan taian te uita,

10-11ao kam na nakon te tabo are E rineia te UEA b'a te tabo n taromauri, ao ni kauringa te Toa ae te Tai b'a karinean te UEA ae Atuami. Uoti ami karea aika buubura nakoina n aron ane kam kona ni karekea, n aron korakoran uaan te tai ae a tia n anganingkami. Uringnga ni kairiia natimi m'aane, natimi aine, ao ami toro. Kam na kaoiia naba aomata aika kainano, n reitaki ma kanoan Rewi, ianena, ataei aika akea aia karo, ao aine aika a mate buuia.

12Uringnga b'a boni buure ngkoa ngkami i Aikubita, ma ngaia are, kam riai n ongotaeka nakon tuua aikai.

Te Toa ae M'anganikaai(Nak 23.33-34; War 29.12-38)Ao e taku Moote nakoia Iteraera:

13-15I mwiin banen ami Toa ake Toan Taian te Uita ma Toan Taian te Kureebe, ao kam na kairiia natimi m'aane, ao natimi aine, ao ami toro ni kabane nakon te tabo are E a tia n rineia te UEA b'a E na taromauriaki iai. Kam na karaoa te Toa ae M'anganikaai i nanon itiua te bong. Ao kam na kaoiia naba aomata aika kainano, n reitaki naba ma kanoan Rewi, ianena, ataei aika akea aia karo, ao aine aika a tia ni mate buuia.

16Iai tenua taian Toa i nanon teuana te ririki ike a na bane ni m'ananga iai m'anen Iteraera nakon te tabo are a tia n rineia te UEA b'a E na taromauriaki iai. Taian Toa aikai bon: Te Toa are te Kariki ae e aki karikaki, te Toa ae M'angani Kaai, ao te Toa ae M'anganikaai. Ao tai m'am'aninga ni uota te b'aintangira nakon te UEA.

17Ngkana e rangi ni buubura uaan arokami nako n tain ami tai ae E anganingkami te UEA, ao e na rangi ni moan buubura naba ami b'aintangira nakon te UEA.

Karaoan Te Eti Nakoia Aomata Ni KabaneAo e taku Moote:

18-19Ngkana kam a tia n tekateka raoi n ami kaawa ake kam karekei mairoun te UEA ae Atuami, ao a na rinei aia taani moti ma aia aobitia kaawa n tatabeua nako. Ao ngkami akana kam riki b'a taani moti kam na riai ni babaire raoi ngkana kam kanakoa ami moti, e ngae ngkana te aomata ae kakannato. A na aki mara atomi iroun temanna n te aro are kam na anga te moti ae bure. Te kamaraato e karekea te matakii irouia aika wanawana man nooran te koaua ao e bitiia aomata aika raoiroi b'a taani kewe.

20Kaain Iteraera, ngkana kam tangiria ni karekea te maiu ae teimatoa, ao ae e tetekeraoi, ao uringnga, b'a a na riai n anganaki aomata nako akana a mena n aban te UEA, te babaire ae e eti, b'a anne aban te UEA ae E anganingkami.

Ribaakin Taian Nikawewe Ao Taiani BangotaAo e taku Moote nakoia Iteraera:

21Ngkana kam karaoa te baonikarea i bukin te karea nakon te UEA ae Atuami, ao kam na aki karaoi taian nikawewe ake b'ain taromaurian te anti are Nei Aatera.

22Ao kam na aki naba katei taian baangota. E rangi n ribaai baikai te UEA.