Iobi 28 - Kiribati New Version Bible

Kamimiin te rabakau.

1Bon iai taabo ike a taunaki iai taian tirewa.

Bon iai taabo ike a manga kaburoaki iai taian koora.

2A keni biiti aomata mai aan te aba,

ao a kaburoi ni kanakoi taiani kaab'a man taian atiibu.

3A uoti taian taura aomata n neweabai taabo ni keniken aika rotongitong ake i aan te aba.

A ukeuke i kabin te aonnaba, ao a keniken i bukin kakaaean taian atiibu i nanon te rotongitong,

4n taabo aika raroanako man te tabo are e maeka te aba iai,

ke taabo ike a tuai man roroko iai te aba.

A keniken i nanon b'angab'anga aika nano,

n taabo aika akea kaaia, a tinetine n roobu i nanon b'angab'anga.

5A maiu taian aroka i aon te tano,

ma a bane n uruakaki b'aai ni kabane n te ai n are i aan te tano.

6A mena taian tabeiro i nanon atiibu,

ao taiani koora i nanon bubun te b'a.

7Bon akea te aoki ae noora te kawai nakoni nnen taian atiibu aika kakawaki,

ao akea naba te ikare te kia ae a tia ni kiba i aoia.

8Bon akea naba te raian temanna,

ke maan ni kaakang, aika tia n roko ni kawai aika kamaroaa aikai.

9A keniken aomata i aon b'a,

ao a kunei taian atiibu aika kakawaki.

10A keni kawaia i nanon taiani b'a,

ao a kunei atiibu aika kakaawaki

11A kunei n aia keniken taabo ike a moan raanga mai iai karaanga,

ao a karokoa te oota nakon tabo aika karabaaki.

12E na reke ia te rabakau;

e nga te tabo ae ti na reireiniira iai te ataib'ai?

13E aki kona kuneaki te rabakau i rouia aomata;

bon akea temanna ae ataa manenana ni koaua.

14Bon akea i kabin marawa ke i nanon taari.

15E aki kona ni kabooaki n te tirewa ke te koora.

16A aki bootau naba ma ngaia te koora ma te tirewa

aika rangi n tamaroa.

17E boongana riki nakon te koora,

ke nakon te boora te koora, ke te kiraati ae rangi n tamaroa.

18E manena riki te rabakau nakon atiibu aika kakaawaki ake a roroo,

ma ake a itiaki, ao ake a uraura.

19E aki bootau naba ma te atiibu ae babobo, are atiibun Itiobia ae kakawaki,

ao e aki bootau naba ma te koora ae itiaki.

20Ao e mena ia ngkanne te tabo ike e nako mai iai te rabakau?

E nga te tabo ike ti na kona n reirei iai te ataib'ai?

21Akea te b'ai teuana ae maiu ae kona ni kunea,

e aki kona ni kunea te mannikiba ae kibakiba i eta.

22E taekinna naba teuare te Mate,

ao teuare te kabuanib'ai b'a a ti ongo aaningin rongorongona.

23Bon ti te Atua ae ataa te kawai,

E ataa te tabo ike e mena iai te rabakau,

24i bukina b'a E noora tabon aonnaba,

E noori b'aai ni kabane aika i aani karawa.

25Ngke E baairea aron korakoran nenen te ang,

ao ni baairea naba m'aitin taian ran i nanon taian nang;

26Ngke E motika ana tai ni b'aka te karau,

ma kawain te iti are e na tootoua.

27Ao bon man te tai anne are E baairea iai

aron te rabakau b'a tera.

28E taku te Atua nakon te aomata,

“Ngkana ko tangiria ni wanawana, ao ko riai n anga te karinerine nakon te UEA.

Ngkana ko kan atatai, ao ko na rairaki nako man te buakaka.”