Etekiera 30 - Kiribati New Version Bible

E Na Riki Aikubita B'a Te Rereua Ae Akea Kain Aona

1E taku te UEA:

2Etekiera ae natin te aomata, ko na tuangiia kaain Aikubita Au taeka ae e kaangai:

Ko na tang ni korakai,

3i bukina ngkai ko na

waekoa ni katuaaeaki!

Bon anne tain

te rootongitong ao te b'aka

i bukiia botannaomata nako.

4E na buakanaki

oin am botannaomata ae Aikubita,

ao e karawawaataki Itiobia

ao ko na tiringaki n te buaka

ao e na iraeaki abam

ma n tiku n urubekebeke.

5A kaboaki tautia mai Itiobia, Ribia, Riria, Arabia, Kuba, ao ai uana naba ma Iteraera, b'a e na mate n te buaka anne.

6A na bane n tiringaki tautaeka ake a na buokiko n te buaka, ao e na b'aka kainikatongam. A na mate aomata mai Miketora i meaang nako Tewene i maiaki. Bon aei au taeka Ngai ae te UEA.

7E na riki am botannaomata ae Aikubita b'a te kabanea n tabo ae e rereua n te aonnaba, ao a na wene n urubekebeke kaawana nako.

8N na kauraa abam, ao e na mate ane e kamaura am kaawa. Ao i mwiin anne, ko na ataai b'a bon te UEA Ngai.

9N na urua naba Aikubita n te bong naba anne, N na kanakoa te tia uarongorongo nakoia kaain Itiobia b'a e na katanoataa rokon te urub'ai. A taku n aia iango b'a a mano, ma ane a na maaku.

10E korakora am taanga ni buaka ae ana taanga ni buaka Aikubita, ma N na kanakoa Uean B'aburon are Nebukaneta b'a e na kataenikaia te taanga ni buaka anne n aki manga katea waena.

11E na taua ma n urua abam ngaia ma ana taanga ni buaka ae e iowawa ao a na kiitana rab'atami aika a mate ni kaibetaotaoi rake n taabo nako.

12N na kaika ranin te Karaanga are te Naire, ao i mwiina, N na kabooa nako te aba nakoia taani boob'ai aika a buakaka. N na kanakoia iruwa b'a a na onika ami botannaomata nakon te rereua. Bon aei au taeka Ngai ae te UEA.

A Na Wene N Uruaki Ana Kaawa Nako Aikubita Aika A Buubura Aika A KamoamoaE taku te UEA nakoia kaain Aikubita:

13A na kamaaeaki taian bouannanti ma banna ake kam taromaurii ngkami aika kaain Aikubita n te kaawa are Membiti (Nobi). Bon akea temanna ae e na tiku n tautaekana am botannaomata, ao e na onrake te aba n te maaku.

14E na tiku n uruaki te kaawa are Bateroti, ao e na urarake ma ni b'aka te kaawa are Toa. E na uruaki naba am kaawa n tautaeka are Tebeti!

15E na namakina korakoran uniu te kaawa are Berutiam, ao a na bane n tiringaki tautia ake a mena i Tebeti.

16N na kaurarakea te botannaomata i Aikubita! E na taonaki n te rawawata ae e korakora te kaawa are Berutiam. E na b'aka Tebeti, ao e na rootaki n te maaku ae e korakora Membiti.

17A na mate man te buaka tautian Erioboriti ao Bubatiti, ao nikiraia aomata a na uotaki nako b'a taenikai.

18Ko rangi ni kainikatonga i bukin m'aakan am botannaomata, ma ngkana I kamanatuaa te m'aaka anne ma n tiringa te kainikatonga anne, ao e na b'aka te rotongitong i aon te kaawa are Teabeneeti. E na rabuna te aba te nang ae roo ngkana ko a uotaki nako b'a te taenikai.

19Ko na ataia b'a te UEA Ngai ngkana e bane katuaaean Aikubita.

Akea M'aakan Uean Aikubita

20Tebwi ma teuana te ririki i mwiin anaakin te Uea ae Ieoiakin ma nikiraia ara koraki b'a taenikai nako B'aburon, ao e taetae te UEA nako iu n te kaitiua ni bongin te moan nam'akaina ao E taku:

21Etekiera ae natin te aomata, I a tia Ngai ae te UEA ni kataenikaia uean Aikubita! I otea angana, ao bon akea ae e a tia ni bautia ke ni katinetinea, b'a e aonga n oki ao e na manga reke korakorana ni konaa n taua te kabaang.

22Ma ngaia ae ko na tuangnga b'a Ngai ngkai ana kairiribai ae I rangi n riiribaia. N na otoi angana ni kauaai-are e raoiroi ma are e m'aoto! E na b'aka ana kabaang mai baina n aki toki,

23ao N na kamaaenikuniia kaain Aikubita ni kabutaa te aonnaba.

24Ao i mwiina, N na kaoka korakoran angan uean B'aburon ma ni kaaki ana kabaang i nanon baina. Ma N na otea angan uean Aikubita, ao e na ngirangira ma ni mate i mataia ana kairiribai.

25Eng, N na kamamaraa korakoran ma uean B'aburon. Ngke I anganna Au kabaang ao e kotea iai Aikubita, ao a na bane n ataia aomata b'a bon te UEA Ngai.

26N na kamaaenakoia kaain Aikubita n te aonnaba. Ao ane ana ataia iai b'a bon te UEA Ngai.”