Ab'akuka 1 - Kiribati New Version Bible

1Aio te rongorongo are E kaetia te UEA nakon te burabeti ae Ab'akuka.

E Ngurengure Ab'akuka i bukin te Motikitaeka ae bure.

2E na maanra au weewete ni kan buokaki ao ko na ongo irou te UEA, ao Ko na kamaiura man taian kangaanga?

3Bukin tera ngkai ko karikai b'a n na noori kangaanga aikai? Ko na kanga ni kan noori m'akuri aika a buakaka aikai? E katobibiai te urub'ai ma te kabuanib'ai, ao e a bo te un ma te ngurengure n aki-akaaka.

4E a rangi ni mamara ao n akea bonganan te tua, ao e tuai man karaoaki te baire ae e riai. A toronib'ai riki aomata aika a buakaka, nakoia aika a raoiroi: Akea karaoan te riai.

Kaekaana iroun te UEA

5Ao E taku te UEA nakoia Aomata, “Tarataraia botannaomata akana i rarikimi, ao kam na mimi ni baika kam noori. N nang karaoa te b'ai teuana ae kam na bon aki kakoaua ngkana kam ongo taekana.

6N na kakorakora m'aakan te tautaeka ni B'aburon, ae te koraki aika a tiritiri, aika akea tokiia. Akana a m'am'ananga n te aonnaba ni buakani aaba nako.

7A karika te maaku, ao a kamoamoa b'a akea ae e kona ni waeia.

8“A birim'aaka riki aia aoti nakoia reeb'ari, a tiritiri nakoia kameanti aika a baki. A roko aia taan toka i aoia aoti man aaba aika a raroa. A nimta te tano ukin waeia aia aoti. A biri rikaaki n ai aron te ikare ngkana e na rawea kanana.

9“A kanenei aia taanga ni buaka ma te kataenikai ae e korakora ao a bane ni maaku te koraki n rokoia. Aia taenikai, ai aron m'aitin te tano.

10A mata ni kakanikoia Uea, ao a ngareakiniia ake a rietaata nakoaia. Bon akea te nano ae e na kona n totokoia, b'a a katabukirake taano i rarikiia ao a taua.

11Ao a orea te kaawa ni kaitiakia n ai aron te ang ao i mwina a kitanna, aomata aika korakoraia bon antiia.

E a Manga Ngurengure riki Ab'akuka nakon te UEA.

12Te UEA, bon te Atua Ngkoe mangkoa. Bon te Atua Ngkoe ae ko tabu ae akea tokim te UEA, Atuau, ao otangau. Ko a tia n rinea B'aburon ma ni kakorakoraa b'a tabonibaim n oroira.

13Ko aki kona n taraa te bure ma te buakaka. Ma ngaia are, tai tekateka ni kabuingoingo ngkai a kamaunaia aomata aika a raraoi riki nakoia.

14Ko na kanga ni karaoia aomata b'a kaanga maan?

15A katikiia rake aomata i B'aburon n te matau, a tauia n te karaun, ao a takaarua ni kukurei i bukin rawatan konaia.

16A taromauri aia karaun, man angakarea naba nako iai, i bukina b'a a reke b'aai ake a tangiri ni kabane man aia karaun.

17A na teimatoa ni kamanena aia kabaang man tiringiia botannaomata n akea aia nanoanga?