Itaia 53 - Kiribati New Version Bible

Te B'ai Ae E Karaoia Ana Tia M'akuri Te UEA Nakoira

1Iai ae e a tia ni kakoauaira

ke n noora korakoran m'aakan

te UEA ni m'akuri?

2Kaanga ai aron te aroka ae e a tib'a bwebwe

man te tano ae m'auteretere

te tia m'akuri ae e rikirake

n te ongotaeka iroun te UEA.

Bon tiaki ngaia temanna mai buakoia uea aika a bootonim'aane.

Bon akea naba taraana

ae e na konaa n anaa nanora.

3E ririibaaki ao e katinanikuaki;

e onrake maiuna n te nanokawaki

ao te rawawata ae e kakamaaku.

Bon akea temanna ae e kan tarataraia.

Ti kabuakaka ao ti kaangai,

“Te aomata n aki akaaka!”

4E rawaawata ao e ri nanon

te maraki ae e korakora i bukira,

ma boon te rawaawata

bon te katuuaeaki mai roun te Atua.

5E ikoaki ao e kamanatuaaki

i bukin ara bure nako;

e reke ae e riai i roura

i bukina ngke E anaa tuuara.

6Bon tiibu ngaira ni kabane

aika a m'aninga nako.

Ti a tia n toua nako kawaira n tatabemaniira,

ma e anganna te UEA te tuua

are ti bon riai ni katuaaeaki iai.

7E rangi ni kabuakakaaki,

ma e bon aki ngurengure.

E aki kakarongoa kaanga te tiibuteteei

ae e kairaki nakon te tia tiringa te tiibu

ao e aki tangitang

ngkana e koroburaeaki.

8E motikaki taekana nakon te mate

n te moti ae e aki eti.

Antai ae e konaa ni iangoa

te b'ai are e nang riki nakoina?

E anaaki maiuna

i bukin b'aai aika a bure

aika a tia ni karaoaki irouia au aomata

9E raoiroi ao e nimaamannei,

ma e taunaki n ruanimateia aika a iowawa ao a kaub'ai.

10E motikia te UEA b'a e na

karawaawataaki ana tia m'akuri b'a te karea

i bukin kab'araan te bure

ao te kaairua i bukiia tabem'aang.

Ngkai e na maiu te tia m'akuri

b'a e na nooria ake oin ana kariki.

E karaoi b'aai ni kabane

ake E a tia ni baaireaia te UEA.

11Ti na karekea raoi nanon

te ongotaeka iroun te UEA

i nanon rawaawatan te tia m'akuri.

E ngae ngke akea ana bure,

ma e na bon anaa naba tuaaia

taani bure tem'angina,

b'a a aonga ni m'aiti mai buakoia

aika a na b'ara aia bure.

12E na anganna te UEA kaniwangana

te karineaki ao te m'aaka

ngkai e kareana maiuna.

A taku tabem'aang b'a te tia bure ngaia,

ma e karawaawataaki i bukin ara bure nako

ao e buubutia te Atua kab'araan ara bure.