1E karokoa te rootongitong ae korakora te UEA i aon Tion i bukin unna.
E onika mimitongina are b'aka mai karawa nakon te urubekebeke.
E na bon aki rin naba n ana Tembora n te bong are E un iai.
2E na bon kamaunai kaawan nako Iuta te UEA n akea ana nanoanga.
Ao E na katabwenai taian nono ake otangan te aba.
E uota te rawaawata nako aon abanuea ma taan tautaeka.
3E kamaunanakoa korakoran Iteraera i bukin unna;
E rawa ni buokiira ngke a roko ara kairiribai.
E urarakeira kaanga te ai, ni kamaunai b'aai ni kabane.
4E kainetiira n Ana kanoanikatebe n ai aron te kairiribai;
E tiringiia aika a bati n tangiraki iroura.
Ti bati n namakina uran unna i aon Ierutarem.
5E a tia ni kamaunaa Iteraera te UEA, n ai aron te kairiribai;
E kiitan taian nono ma baareti ngke a uruaki.
E karokoa te rawaawata ae akea tokina i aon Iuta.
6E urua te Tembora are ti tataromauria iai ni kamaerikirikia;
E katoki bong aika a kakannato ma Taabati.
E korakora riki unna irouia uea ma ibonga.
7E rangi n ribaa ana baonikarea te UEA, ao e kamaunaa ana Tembora are e tabu;
E kariaia rokoia kairiribai ni kamaenikuna oon te Tembora.
A tatakarua i nanon te Tembora are ti tataromauri iai kairiribai ni kaota aia tokanikai.
8E a tia ni iangoia te UEA b'a E na urui nonon Tion;
E a tia ni katika koran te kaawa b'a E na bon urua n akea nikirana;
A na bane ni b'aka taian taua ma nonon te kaawa.
9A na m'akoroua ma n inako atiibun mataroana n te tano, E na otouai kaai ake b'ain kainan te mataroa.
A uotaki nako ngkai b'a taenikai uea ma aomata ake a kakannato.
Akea te reirei n te tua, ao akea naba te kaotioti mai iroun te UEA nakoia Ana burabeti.
10A tekateka unim'aanen Ierutarem n aki kakarongoa i aon te tano,
a tauni atuia n te tano ao a kunnikainiia ni kunnikai aika a mangaingai.
A kabaraaki atuia ataeinaine nako aontano.
11A tibutibu matau n tang, e a korakai tamneiu.
E korakai nanou n rawaawatau i bukin kamaunakiia au aomata.
A wene ni baki ataei i nanon te kawai i nuukan te kaawa.
12A tangira kanaia ma nimaia nakon tinaia;
a b'aka n tong i nanon te kawai i nukan te kaawa b'a kaanga aron ae a ikoaki,
ao a karaurau ni mate i m'anokaia tinaia.
13O Ierutarem, ae ko bati n tangiraki, tera ae N na kona n taekinna?
N na kangaa ni kabebeteko? Bon akea ae a tia n rawaawata n ai aron aei.
Akea tokin rawawatam n ai aron marawa; akea ae konaa ni kamaiuko.
14Akea riki te b'ai ae a kona n taekinna am burabeti, b'a ti te kewe aroia.
A kam'anei ngkami n aia kab'arab'ara b'a aki kona ni kaoti ami bure nakoimi.
A anganiko te koaua ae aongkoa ko aki kainanoa te raira n nano.
15A na kaenaenako aomata ake a rirarikin te kaawa.
A na katoutou atuia ma ni kakanikoa Ierutarem ni kaangai;
“E a iranna te kaawa ngkoa ae te kabanea n raoiroi ma ni kakukurei n te aonnaba?”
16A bane ni kakanikoko am kairiribai ma n taraiko ma te mata n riribai.
A kangengei wiia ni kaenaenako ni kangai, “Ti a tia n ekinakoia!
“Bon aio te bong are ti a ngae n tataningaia!”
17E a tia ni kakoroa bukin Ana babaire te UEA:
E a tia ni kamaunaira ao ake riki Ana nanoanga n ai aron are E taekinna ngkoa.
E anga te tokanikai nakoia ara kairiribai, E kakukureia ni konaakira.
18O Ierutarem, ke a tang oom nakon te UEA!
Ke a raanga nako rannimatam n ai aron te karaanga ni bong ao ni ngaina;
Ko na tang n rawaawata n akea am tai!
19Teirake n tang ni katoa tairiki nakon te UEA;
Kaotii b'aai ni kabane nakon te UEA, ao butiia b'a e na nanoangaia am ataei
Ataei ake a mate ni baki i nukan te kaawa!
20Taraia Atuau! E aera ngkai Ko katuaaira n aron aei?
A manga bon kang rab'ataia aia ataei aika a tangiriia tiina!
A bon tiringaki ibonga ma burabeti n te Tembora!
21A kaai ni mate i nukan te kaawa ataei ma ikawai,
A mate rorobuaka ma ateiaine n aia kabaang kairiribai.
Ko tiringiia n akea riki nanoangaakiia n am bong n un.
22Ko kaoiia kairiribai nakon te bootaki, ao a taua aron te bootaki ma n karikia b'a te tai ae kakamaaku.,
Ao bon akea ae konaa ni birinako man bongin unim.
A tiringiia natiu, aika i tangiriia b'a i bon kaikawaia.
Who We AreWhat We EelieveWhat We Do
2025 by iamachristian.org,Inc All rights reserved.
