Warekaia Iteraera 4 - Kiribati New Version Bible

Tabeia te Kaainga are Koata

1Ao E taku te UEA nakoni Moote ma Aaron:

2Kakaea b'a iraman rorobuakan te kaainga are Koata man te baronga are Rewi aika a mena aia ririki i marenan 30 ao 50.

3Ti warekia te koraki aika a konab'ai ni m'akuri n te Um'antabunrianna.

4A na tabeakina uouotan b'ain te taromauri ake n te Um'antabunrianna kanoan Koata.

5Ngkana a tauraoi nakon kab'aranakoan aia auti n rianna Iteraera, ao a na rin i nanon te Um'antabunrianna Aaron ma natina mm'aane, ao a na kab'ara te roki are i matan te Ati ni Berita, ao a na rabuna iai te Ati ni Berita,

6ao a na manga rabunna n te moti ni kunniman ae raoiroi, ao e na manga rabunaki riki aona n te kunnikai ae te mata buru i aona. Ao i mwiin anne, a tib'a karin taiani kainamo ni nneia.

7Ao i mwiina, a na manga rabuna taiboran te Kariki ae Tabu Aaron ma natina mm'aane n te kunnikai naba ae buru. Ao a na katokai taiani raurau, ma booran te b'ai ni kaboiarara, ma te m'angko, ma tiaekin te wain, ao ai uana naba ma te Kariki ae Tabu i aon te kunnikai.

8Ao a manga rabuni baikai ni kabane n te kunnikai ae uraura, ao i mwiina manga te kunniman ae raoiroi i m'aain karinan taiani kainamo ni nneia.

9A na rabuna naba kaintein te taura n te kunnikai ae buru n reitaki ma taian taura, b'ain tiringan te taura, baanin te ai, ao te tiaeki are nnen b'aan taian taura.

10A na bane n rabunaki b'aai aikai n te kunniman ae raoiroi, ao a na katokaaki i aon te baonuab'ai.

11E na rabunaki baonikarean te b'ai ni kaboiarara are te koora n te kunnikai ae buru, ao i mwiina, e na manga rabunaki riki aona n te kunniman ae raoiroi i m'aain rinin kainamoana ni nneia.

12Ao i mwiin aei, ao a na anaa te kunnikai ae buru Aaron ma natina mm'aane ma n niniri b'ain nako te taromauri ni kabane ake n te Um'antabunrianna iai. A tangiraki baikai b'a a na rabunaki n te kunniman ae raoiroi, ao ma ni katokaaki i aon te bao n uab'ai.

13A na kanakoi taiani mannang man te baonikarea are te buraonti, ao a na rabunna n te kunnikai ae beebo.

14Ao a na katokaaki i aon te kunnikai anne taiani b'ai ni m'akuri ake a kamanenaaki n te baonikarea, n reitaki ma taiani baan ake baanin te ai, taian waiteke, taian tiabora, ao taian boora ni katimtim. A na bane baikai n rabunaki n te kunniman ae raoiroi, i m'aain karinan taiani kainamo ni nneia.

15Ngkana a nang m'ananga nako Iteraera ao kanoan Koata bon taani uouoti b'aai aika tabu, ma b'ain nanon te Um'antabunrianna. Ma a na kaman tia n rabuni baikai Aaron ma natina mm'aane, b'a a kaawa ni bo ma baiia kanoan Koata ao ni mate.

16Taben Ereata are natin Aaron are te ibonga, bon te tararua b'aan taian taura, b'ai ni kaboiarara, uita i bukin te karea, ao b'aan te oriwa i bukin te katabutabu. E bon mwiokoaki naba Ereata b'a e na karaua n tara b'ain te Um'antabunrianna, ma b'aina ake a tabu b'a a bon kaawakinaki raoi.

17A na bon aki kaaniia, ke n tarai b'aai ake a tabu te baronga are Koata

18ni karokoa rabunakin b'aai akanne iroun Aaron ma natina mm'aane.

19E na boni kamaunaaki nako aia kaainga ae b'anin ngkana a karaoa aei.

20Ma ngaia are, kam riai ni kakoaua raoi b'a e na airi Aaron ma natina mm'aane ma ngaiia nakon te Um'antabunrianna, ma n tuangiia baika a riai ni uoti.

Aia M'akuri Kaaingan Kanoan Kerition

21Ao E taku te UEA nakoni Moote:

22Ko na kakaea m'aitiia mm'aanen kaaingan kanoan Rewi ake uoua are mairoun Kerition, ake a mena aia ririki ni maiu i marenan 30 nakon 50.

23Ko na ti warekia te koraki akana a tau nakon te m'akuri n te Um'antabunrianna.

24A na tabeakina uouotakin rokin te Um'antabunrianna,

25kanoan Kerition n reitaki naba ma uoua rabunan tinanikun te Um'antabunrianna, ma rokin mataroan te Um'antabunrianna,

26ma taian roki ake a tinetine n oon te Um'antabunrianna ni katobibia, ma rokin ao roobun mataroan te o. A na riai ni karaoi b'aai ni kabane ake a tangiraki i bukin kawakinan baikai,

27ao a na uouoti naba nakon taabo ike a tuangaki iroun Aaron ma natina mm'aane b'a a na uoti nako iai.

28Ao aei ngkanne tabeia kanoan Kerition n te Um'antabunrianna, ao Itama are natin Aaron are te ibonga boni ngaia are na tararua aia m'akuri b'a a na karaoi raoi.

Tabeia te Kaainga are Merari

29Ao E taku te UEA:

30Moote, Ko na kakaea m'aitiia rorobuakan te kaainga are Merari, are a mena aia ririki i marenan 30 nakon 50, aika a tau ni m'akuri n te Um'antabunrianna.

31Tabeia kanoan Merari bon te uouoti kain te Um'antabunrianna ma b'aina riki tabeua, n ikotaki ma kaai ake a irariki, ma boua, ma kaintei,

32n reitaki naba ma bouan te o, ma kainteia, ma beken te Um'antabunrianna, ao roobuna. A na riai n tuangaki raoi kanoan Merari b'aai aika a na riai ni uouoti,

33ao Itama are natin Aaron te mm'aane boni ngaia are e na tararua aia m'akuri b'a a na boni karaoi raoi.

Warekaia Riki Kanoan Rewi

34Ao a ongotaeka iroun te UEA Moote ma Aaron ma taani kairiri mairouia Iteraera ake tabeman,

35ma ngaia are, a manga warekia riki utuun,

36ao kaaingan te baronga are Rewi

37b'a aonga n reke m'aitiia mm'aane are a mena aia ririki i marenan 30 nakon 50,

38aika a tau nakon te m'akuri n te Um'antabunrianna.

39Ao m'aitiia kanoan Koata bon 2,750,

40ao kanoan Kerition bon 2,630,

41ao kanoan Merari bon 3,200,

42ao bootaia 8,580.

43A warekaki n ai aron ana taeka te UEA ni baini Moote,

44n tatabemaniia nako n ai aron aia m'akuri nako,

45ao n ai aron uotaia nako

46ai ngaia anne warekaia irouna,

47n ai aron ana taeka te UEA

48nakoni Moote.

49Ao a bane n anganaki tabeia.