1Atuau, Atuau, Ko aera ngkai Ko kitanai?
I tang ni korakai ni kainanoa buokau,
ma akea ae roko.
2Atuau, I weteiko ni ngaina ao ni bong,
ma Ko aki kaekaai;
ma ngaia ae I aki kona n rau.
3Ma te Atua ae Ko tabu Ngkoe,
ae ko tekateka i aon am kaintokanuea b'a te Uea
ae Ko kamoamoaaki irouia Iteraera.
4A onimakiniko ara bakatibu;
A onimakiniko, ao Ko kamaiuia.
5A tang nakoim, ao Ko kamaiuia;
A onimakiniko, ao a aki mamaa iai.
6Ma tiaki te aomata ngai,
b'a bon te m'ata,
ae e kakeaki bonganana
ma n riribaaki irouia aomata nako.
7A bane ni b'ainingareai akana norai:
A kaenaenaai ni wiia,
ao a katoutou atuia;
8Ao a kaangai, Ko onimakina te UEA,
Ao ke E kamaiuko!
Ngkana E tangiriko, ao ke E buokiko!
9Boni Ngkoe are Ko kaotinakoai man te biroto;
Ko tob'atob'aai ngke te merimeri ngai.
10E tiku taekau iroum man te tai are I bungiaki iai;
ao ai kaman Atuau Ngkoe.
11Tai kararoako mairou!
B'a e a kaan karawawataau,
ao akea temanna ae na buokai.
12A otab'aniniai kairiribai
b'a kanga ai aroia kaaom'aane aika bati,
kanga kaao-m'aane aika korakora mai Batian
aika korakora.
13A kaure wiia nako iu kanga ai aroia
raian aika raraebiti ma ni bekorara.
14Akea korakorau, e a nako b'a kanga
ai aron te ran ae kab'aroaki.
Ao a bane riu n tibanako man tomaia;
ao nanou ai aron te nenea ae riki n ran.
15E bane korakorau kanga ai aron aontano ae m'auteretere;
ao e nimta ngangarakeu neweu,
Ao ko kaweneai n te ruanimate.
16A otab'aniniai te bootaki n aomata ae buakaka
b'a kanga ai aroia kamea;
a ewari baiu ma waeu.
17A bane n tangaina riu
A tarataraai taan ribaai ma te mata ni mimi.
18A tib'atib'ai kunnikaiu
i marenaia n te aro ni kaiwa.
19Te UEA, tai kararoako!
Ngkoe ae korakorau, bareiko ni buokai!
20Kamaiuai man te kabaang;
Kamaiuai mairouia kamea aikai.
21Kamaiuai mairouia raian aikai;
Akea te bae I kona ni kaitaraia iai kaao-m'aane aika tiritiri aikai.
22N na tuangiia au botannaomata baika Ko a tia ni karaoi;
N na anenea kamoamoaam n aia tai ni bootaki n taromauri.
23Kam na kamoamoaa, ngkami aika kam toro iroun te UEA;
Kam na karinea, ngkami aika ana kariki Iakob'a;
Ao kam na bane ni maaku i rouna, ngkami aika Iteraera.
24E aki ribaia ke ni kaaki taekaia akana kananoanga n aia tai n rawaawata;
E aki tan nako mai rouia,
ma E ongo irouia ngkana a tangira buokaia mai Rouna.
25N tain te bootaki ae ab'ab'aki, ao
N na neboiko i bukini baike Ko a
tia ni karaoi.
N na anga i mataia aomata aika
taromauriko karea ake I a tia n
taku b'a N anga;
26A na am'arake ni katoki nanoia akana akea aia b'ai;
Ao a na kamoamoa te UEA akana kawaria.
A bia anganaki kukurein nanoia n aki toki.
27A na bane botannaomata nako i aonnaba n ururinga te UEA;
A na bane botannaomata n rairaki
nakoina n taromauria.
28Bon te king te UEA,
ao E tautaeka i aoia botannaomata.
29Ane a na bane akana marika i
aonnaba n am'am'arake
ma n taromauri;
ane a na bane ni bobaraaki i matana
akana nangi mate, akana i aoni
kawaia nakon te ruanimate.
30Ane a na toro i rouna rooro aika na roko;
Ane a tataekina te UEA aomata nakon te roro ae nangi roko.
31Ane a na tuangaki aomata akana tuai
bungiaki taekan ana kamaiu te UEA,
“B'a E a tia ni karaoia.”
Who We AreWhat We EelieveWhat We Do
2025 by iamachristian.org,Inc All rights reserved.
