1N na tuangngkami tuua ma reirei aika kam na ongotaeka nako iai ngkana kam a maeka n te aba are anganingkami te UEA are Atuaia ami bakatibu, ni boong ni kabane aika kam maiu iai i aon te aonnaba.
2Ma a taromaurii atuaia tabeman botannaomata ake a maeka ikekei. Ma ngaia are, ngkana kam tia n taua te aba, ao kam na kamaunai ni kabane aia tabo n taromauri--ake i aoni maunga ao taian tabuki, ke ake i aan nuun kaai aika korakora.
3Kam na urui aia baonikarea, aia nikawewe, ao kabuoki aia baangota ake a kabonganaaki i bukin taromaurian te anti te aine are Nei Aatera, ao urui aia bouananti. Urui aia tabo n taromauri ni kamaunanakoi b'a a aonga ni m'anuokinaki taekaia.
4Kam na aki taromauria te UEA ae Atuami n aroia botannaomata aikai ngkana a taromauriia antiia.
5Kam nang ri nanon te Karaanga are te Ioretan n te tai ae e aki maan, ao E na buokingkami te UEA ni kataenikaia ami kairiribai,
6ma ni kamaekaingkami ma te rau n te aba are E a tia n anganingkami. Ma ngkana kam a tia n tekateka, ao ane e na manga kaokoro te maiu.
7Kam na aki manga anga te karea n taabo nako ike kam tangiria ni karaoia iai, ma E nang rinea te tabo teuana te UEA i aon Iteraera ike kam na taromauriia iai.
8Kam na uoti ami karea ma ami angab'ai nako ikekei, n reitaki naba ma te karea are kakukureian te UEA
9ao taiani b'aintangira nako ake kam berita, ke kam anga nanomi b'a kam na anganna. Ao kam na anga naba kaka teuana te katebwina man ami uita, wain, ao man ami b'a n oriwa,
10ao ai uana naba ma aia man aika karimoa n aia nanai ni kao, aia nanai n tiibu, ao aia nanai n kooti
11Kam na kang ami b'aintangira ao ami karea
12ngkami ma ami utu, ao ami toro, ao kam na bootaki n te tabo n taromauri, b'a E a tia te UEA ae Atuami n anganingkami te totokanikai ni b'aai ni kabane aika kam a tia ni karaoi.
13Ao ngkai akea abaia kanoan Rewi, ao kam na kairiia tabeman mairouia nakon te bootaki.
14N taai tabetai ao kam na tangiria n tiringa te man bon i bukin kanami, ao tiaki i bukin te karea.
15Ngkana arona b'a E kakab'aiaingkami te UEA n anganingkami ami kao ke ami tiibu ke ami kooti aika m'aiti,
16ao kam kona ngkanne n tiringa temanna b'a kanami n te tabo are kam maeka iai.
17Kam kona ni kanna n aron kanakin irikon te ria, ke te katere ae konami ngkana kam kaeman,
18ao a kona naba ni kang baikai aomata aika a kam'araa, ma a aki tau nakon te taromauri.
19Ma kam na ti aki kana raraan te man, katinakoa moa raraana i aon tano.
20E a tia ni berita te UEA b'a E na manga anganiia riki abaia Iteraera rimwi riki, ao ane a na aki kona tabeman mairoumi ni m'ananga man ami auti nakon te tabo n taromauri n taai ake kam kani kana iai taa iriko.
21Ma E na anganingkami te UEA te kao, te tiibu, ao te kooti, ao kam kona n tiring maan aikai ni mwengami b'a kanami n aron are kam tangiria.
22Bon ti te bo ma kanakin irikon te ria ma te katere are kokonami ni kaeman. Ao n te aro aei, ao a kona naba ni kana te iriko aomata ake a kam'araa, ao a aki tau nakon te taromauri.
23Ma kam na aki kana te raraa.
24B'a boni maiun te man, ma ngaia are, kam na katinakoa nakon te tano i m'aain kanakin te iriko.
25Kam tangiria b'a E na katetekeraoingkami te UEA? Kam tangiria b'a a na tetekeraoi naba ami ataei ngkana kam a bua? Ma ngaia are, kam na karaoi b'aai aika E na kukurei iai te UEA, ao tai kana te raraa.
26A na bane taiani karea ma angab'ai nakon te UEA ni uotaki nakon te tabo are E a tia n rinei te UEA b'a taabo n taromauri.
27Ngkana kam anga karea i bukin kakukureian te UEA, ao a na bane ni kabuokaki taian iriko i aon te baonikarea. Kam kona ni kang iriko n aekaki ni karea nako, ma kam riai ni katiinakoi raraaia maan i aon te baonikarea.
28Ngkana kam ongotaeka nakon tuua aikai, ao kam bon karaoa ngkanne te b'ai are taku te UEA ae Atuami b'a e eti, ao e raoiroi. Ao E na buokingkami ma kanoami ni katetekeraoingkami.
Taromaurian te UEA n te Kawai ae EtiAo e taku Moote:29Iteraera, ngkana kam nakon te aba ma ni buakaniia botannaomata ake ikekei, ao E na kamateia te UEA ao kam na kona n anaa abaia.
30Ma n te tai aei ao kam na taratara raoi riki nakon are mai m'aaina n aki titiraki ni kaangai, A kanga aroia n taromauriia antiia, b'a ti na manga katotongi aroia n taromauri ngkana ti taromauria te UEA?
31Kam na bon aki karaoa anne. B'a te UEA, E ribaai aroia botannaomata aikai n taromauriia antiia, i bukina b'a a kabuoki natiia m'aane ao natiia aine b'a aia karea.
32Ongotaeka nakon taian tua ma reirei aika I anganingkami. Tai manga karakai riki tabeua nakon aikai, ao tai kaaki naba tabeua man aikai.
Who We AreWhat We EelieveWhat We Do
2025 by iamachristian.org,Inc All rights reserved.
