Te Tua-Kaua 32 - Kiribati New Version Bible

1Ongora n te b'ai ae N na taekinna,

Aonnaaba ma karawa,

2N na reireiningkami Iteraera.

A na riki au taeka b'a kaanga te maatim ni karau

ae b'aka i aon aroka aika uarereke,

ke kaanga te aoi i aon taian uteute.

3Kam na kaai n neboa

aran te UEA ae Atuami

ae kamimii ma ngai.

4Bon te b'a ae korakora te UEA,

ao e aki roko n te karaoa te kaairua.

E kona n onimakinaki n taai nako

b'a boni Ngaia are E kona ni uota te motikitaeka ae eti.

5Ma ngkami kam kewetaia ao kam karaoi m'akuri ni baabakanikawai

ao kam aki kakaonimaki nakoina, ao kam aki tau n riki b'a ana Aomata

kam bon kamamaaeingkami

ao bon akea manenami

n riki b'a natina.

6Bon te UEA tamami, Iteraera,

are E boni karikingkami,

ma kam kabooa mwiin karikami

ni m'akuri ni baba.

7Kam na iangoi roro ake ngkoa.

Titirakiniia ami karo

ke ami kara.

Ao ane a na tuangkami

8b'a E anga te aba

te UEA ae Moan te M'aaka

nakoia botannaomata ni kabane

ao E anga nako ia botannaomata anera n tatabemaniia nako ake a tia n tantani,

9ma E kaawakina

Iteraera te UEA.

10Iteraera, E kuneingkami te UEA n te aba are e rereua

are korakora iai te ang ae tangim'aaka.

E riki te UEA b'a nonomi

are kaawakiningkami

kaanga ai aron kaawakinakin

kanoani matana.

11Kaanga ai aron te ikare te UEA

ae reireina natina ni kiba,

ma n tatauraoi ni kiba rikaaki

n rawea natina mai akuuna.

12Iteraera, E kairingkami te UEA,

ao akea buokami

mairouia atuaia aika ianena,

13E buokingkami

n taua te aba.

Ao a rangi ni m'aiti

taian uita n ami katawanang.

A maiu taian oriwa

i aon taabo aika kiriatiibu,

ao a kuneaki aia karewe manibeeru

i buakon taiani b'a.

14A karekei taian miriki ma taiani b'ata

ami nanai ni kao ao ami nanai n tiibu,

ao kam rinerinea kanami te iriko maiu

ao a reke kanami iriko aika rangi n raraoi

mairouia ami tiibu ma ami kooti

ake a am'am'arake n uteuten Batian.

Te naani kabanea n tamaroa ami uita

ao kam mooi n te wain ae te kabanea n raoiroi.

15Iteraera, ngke kam a marikarika, ao kam a kakaitaraa

te UEA are ami Tia Karikib'ai;

kam rawa nakon te B'a ae Korakora,

are bon ti Ngaia ami tabo n rawei maiumi.

16Kam kamaraka nanon te UEA ao kam kaunna

ngke kam taromauriia bouananti aika bati n ribaaki

ao atuaia ianena.

17Kam angakarea

nakoia taimonio, ao bouananti aika akea bonganaia

aika aki kona ni buokingkami,

atua aika boou aika tuai man

taromauriaki irouia ami bakatibu

18Kam rairaki nako

mairoun te Atua, ae ami Tia Karikib'ai,

kam m'aninga taekan te B'a ae Korakora,

are bon oini maiumi.

19Bon natin te UEA ngkoa ngkami,

ma kam kaunna.

Ngaia are, E a aki kubaringkami

20ao E taku,

Kam aki kakaonimaki,

ao bon akea onimakinakimi.

Ma ngaia are, N na aki kaekaa ami tataro;

N nangi bon ti mamataku naba

ma n taratarai b'aai aika na riki nakoimi.

21Kam taromauri bouananti aika akea bonganaia,

kam kamaraka nanou

ao kam kaunai.

Ao ngkai N nang kanakoa nakoimi te botannaomata ae akea bonganaia

ae akea manenaia

b'a a na kamaraki nanomi, ma ni kauningkami.

22Au Aomata, N na ikeikena te ai

are e na kab'akaingkami

nako abaia maate.

E na tiring arokan ami nne n aroka

ma ni kabuoki rikaaki

aan taiani maunga.

23N na karokoi taian kabuanib'ai aika bati

aika a na ewari ngkami n aron te kainikatebe.

24Kam na oreaki n te baki

ao taian aoraki ae kamaamate,

ao n aia boitin maan aika kawakawa aika aki manana

ao aia boitin taian naeta.

25Ti te bo aroia aika ikawai ma ataei

a na mate i nanon kawain te kaawa

ao a na maaku i nanon aia auti.

26I tangiria ni kamaenakoingkami

b'a e aonga n aki ataaki

b'a kam boni maeka ngkoa ikanne.

27Ao I maaku ngke I ongo b'anaaia

kairiribai aika kaangai,

Ti kataenikaia Iteraera n

akea Ana buobuoki te UEA.

28Kaain Iteraera,

ao anne Ana taeka te UEA

ake E taekin nakoimi.

Ma bon akea wanawanami,

kam aki kona ni kakauongo

nakon taeka n reirei.

29Ngke kam karaoia, ao kam na noora

kawaimi are kam m'ananga nako iai.

30E na kanga ti temanna aia tautia kairiribai

ni kakioia teuana te nga

tautian Iteraera?

Ke a na kanga uoman mai buakoia

ni kakioia tebwina tengaa aia taanga mai roura?

E ti kona n riki aei ngkana E katoka

Ana kakaawakin te UEA nakon Iteraera

ma ni katokanikaia kairiribai.

31E ngae ngke a ataia ara kairiribai

ae bon ti Atuara

ae te B'a ae Korakora.

32Bon taian kureebe ara kairiribai

aika nene wakaaia ni katawanangin

Tootom ao Komora.

A kariki kureebe

aika rangi ni mao ni kamaamate;

33a rangi ni kamaamate riki aia wain

nakon ana boitin te naeta.

34Ma E a tia te UEA ni koroi

mwiin aia bure

ma ni kainna n Ana ru ni kaawakinib'ai.

35A na reke kaiia ara kairiribai

n te tai ae aki maan

ao ane a na karina ni marannako

ao e na waekoa n taorimwiiaki

n te kabuanib'ai ae korakora.

36E na ti kona n nanoangaia te UEA

ma n anganiia te motikitaeka ae eti

ngkana ai ti tabeman

ana Aomata,

ao akea korakoraia

ao a riki tabeman mai buakoia b'a buure,

ao E a tib'a nanoangaia te UEA

ao E a anganiia te motikitaeka ae eti.

37Ma E na kaangai moa te UEA,

Kam birinakoia atua riki tabeman i bukin kamaiuami;

a aki kona ni buokingkami?

38Kam kareana te wain nakoia

ma ami karea ake kabanea n raoiroi.

A aki kona ni buokingkami atua aikanne

ke ni kamaiungkami?

39Kam bon aki ataia?

Bon ti Ngai te Atua;

ao akea riki temanna;

Bon Ngai ae I anaa te maiu

ao I a manga kaokia.

I katuaaingkami n te rawaawata.

Ma N na kamaiungkami ngkai,

ao bon akea ae kona ni katokai.

40I karaoa te berita ae matoa aei:

n arou ngkai I maiu n aki toki,

41N na karaoa te irantaanga

nakoia kairiribai aika ribaaki.

N na kakangiia au kabaang

ao e na raaiti

kaanga te iti.

42A roko nanoia au kanoanikatebe

n nimakin raraaia kairiribai;

ao au kabaang e na katoong irikoia

ma raraaia kairiribai.

E na tiringiia buure,

ma ni korei ni kanakoi atuuia

aia taani kairiiri.

43Tuangiia taiani karawa b'a a na karaoa aia bootaki ni kukurei

ao taian atua ni kabane b'a a na bobaraaki

nakon te UEA,

i bukina b'a E na irantaangaia

mairouia kairiribai aika ribaaki

aika tiringiia ana Aomata.

E na kab'arai ana bure Iteraera

ma ni kaitiaka abaia.

44Ao e taekin taekan te anene Moote ma Iotua b'a aonga ni bane n ongo Iteraera.

45Ao ngke e a bane ana taetae Moote

46ao e taku, Kam na ururinga te anene ae I a tia n reireiningkami n te bong aei. Ao e na riki b'a te b'ai n reirei nakoimi b'a kam riai ni manga reireiniia ami ataei b'a a na ongotaeka b'aai ni kabane akana m'akoro n Ana Boki n Tua te Atua.

47Bon tiaki taeka aika akea nanoia taian tua, b'a a kona ni kananaui maiumi n te aba are kam nang anaia.

E Na Ti Noora Te Aba Moote

48Ao rimwi riki n te bong anne, ao E taku te UEA nakon Moote:

49Ko na waerake nakon Maungan Abarim ake a rinan i Moaaba ni kaaitaraa Ieriko. Ao ngkana ko roko i taberan te Maunga are Nebo, ao ane ko na noora te aba are Kanaan, are I anganiia Iteraera.

50Ao ane ko na mate, ao ko na taunaki i taubukin te maunga, n aron maten are Aaron ngke e taunaki i aon te Maunga are Ora.

51Kam uaia n aki ongotaeka ni kakaonimaki nako iu n te Koburake n ran are i Merib'a i rarikin Kateti n te Rereua are Tin. Bon te Atua Ngai, ma ko aki karaoa karineau ma onimakinau i mataia Iteraera n aron are I kantaningaia.

52Ma ngaia are, N na anga te aba nakoia Iteraera, ngkoe, ko na ti nooria mai kiraroa.