1E na neboaki te UEA, ae te tia kamanoai!
E kataneiaai i bukin te bo ni buaka
ao ni katauraoai nakon te un.
2Boni Ngaia te tia kamanoai ao otangau,
nneu ni katantan ao te tia kamaiuai,
ae I onimakinna b'a I raba raoi i rouna.
E kakiia botannaomata i aani m'akau.
3Te UEA, tera te aomata ngkai Ko katabeko i rouna ao Ko mutiakinna,
ngkai ti te aomata ngaia?
4Ai aron te ike ae ti te ikena ngaia;
Ao ana bong ai aron te nu ae roko n nako.
5Te UEA, Ko na raeua karawa ni kaukia ao ruo;
Ko na riingi maunga, ao a na tii nako taiani bubu mai iai.
6Kanakoa te iti ao kamaaeia nako akana ribaiko;
Katebe kanoan am kainikatebe ao a kabirinakoia.
7Arora baim mai eta,
katikai rake man te ran n te tabo ae nano, ao kamaiuai;
Kamaiuai mai nanoni baiia aomata aika Ianena,
8Akana aki kona n taekina te koaua
e ngae ngkana a taku b'a a berita b'a a taekina te koaua.
9Te Atua, N na anenea te anene ae boou nakoim;
N na katanga au b'ai ni katangitang ao N na anene nakoim.
10Ko anganiia uea aia tokanikai
ao Ko kamaiua Tawita are am toro.
11Ko na kamaiuai mairouia aomata aika buakaka,
akana aki kona n taekina te koaua
ma a taekina te kewe, e ngae ngkana a taku
b'a a berita b'a a taekina te koaua.
12A bia rikirake natira m'aane
b'a ai aron aroka aika rikirake ni korakora;
Ao natira aine b'a ai aroni boua aika atiibu aika tamaroa taraaia,
aika bouan maninganingan ana auti te uea.
13A bia onrake ara ookai
n uaanikai n aekaia nako.
A bia bungiia natiia aika ngaa ma ngaa ara tiibu
aika mena i aon abara.
14A bia bungiia natiia ara kao
n akea temanna irouia natiia ae na kabuanib'ai.
A bia akea te b'ana ni kananokawaki i nanoni kawai n ara kaawa.
15E a kab'aia te botannaomata ae a noraki baikai ni maiuna b'a a koaua;
E a kab'aia te botannaomata ae Atuana te UEA.
Who We AreWhat We EelieveWhat We Do
2025 by iamachristian.org,Inc All rights reserved.
