Itaia 23 - Kiribati New Version Bible

Katuaaean Te Kaawa Ae Buubura Are Turo

1Aio te rongorongo

man te abam'akoro ae e raroa nako

ae taekan te kaawa ae e buubura are Turo:

Kam na tang ngkami aika kaibuke ni m'am'ananga!

A na wene n uruaki

autin Turo ni kabane.

2Tanginiwenei ma te aki kakarongoa,

ngkami aika taani kaboob'ai i Titon,

ao ngkami naba aika kam maeka i mataniwiin te aba.

Ami kaimoa aika a riri nanon taiani marawa,

are karikirakea kaub'ain ami kaawa are e buubura anne.

3A boborau i marawa ami taani boob'ai

ni karekei kaub'aia

n te kakaboob'ai

ma te botannaomata teuana ma teuana.

A uoti rikaaki taian uita

ake a maiu i mataniwiin te Naire.

4Titon, bon te nono ngkoe ae ko korakora

ae ko kateaki i mataniwiin taari.

Ma ane ko na kamaamaaeaki

kaanga te aine

ae akea natina.

5Ngkana e ongo Aikubita taekan Turo

ao ane e na ruru ni maaku.

6Kam na bane n tang ngkami akana kam maeka i mataniwiin taari

ao kam na ie nako

ni kararoai ngkami i marawa.

7E konaa n riki te kaawa aei

are e a tia n tei i nanon bubua n ririki b'a te kaawa ae e kakukurei?

A tia ni uamaaenako kaaina

nakon aaba aika a raroa kinokino;

8ana taani boob'ai bon taiani uea

aika a karineaki ni kabutaa te aonnaba.

Antai ae e baairea kamaunaan Turo?

9Bon te UEA ae Moan te M'aaka ae e baaireia

b'a e na karokoa te mamaa ma te b'ainrang

nakoia

akana a karineaki

irouia aomata nako n te aonnaba.

10Kaain Turo,

e na uruaki am matabaiawa!

Kam na manga riki b'a taan ununiki ngkami

kaanga aroia kaain Aikubita. M'anuokinan Turo

11E a tia ni kaenakoa baina te UEA

ri aon taari,

ni kab'arai nanoia botannaomata.

E a tia n anga ana babaaire

i bukin uruakan taian nono

n te aba are Kanaan.

12E a tia n taku te UEA

nakoia kaain Titon,

“E a roko n tokina ami baka ni kukurei

kam a mantinti.

E ngae ngkana ko biri nako Kubero,

e na bon aki reke naba iroum te rau.”

13Bon noora te b'ai ae a karaoia kaain Aturia nakoia kaain B'aburon! A tia ni buakaniia, ma n uruaki taiani bareti ni kabane ake i aon te aba. Ao ngkai a maeka taiani man aika a aki manana i buakon aia b'ai koraki aika a uruaki.

14Bon akea teuana te nono ae e na tiku n tei, ma ngaia ae kam na tuangiia taiani kaibuke ni m'am'ananga b'a a na maangoo n tang.

15E na m'anuokinaki taekan te kaawa ae e buubura ae Turo i nanon itingaun te ririki, are bon anauni maiun te uea. Ao i mwiina, e na riki Turo b'a kaanga te aine ae ainen matawa ae e m'aneweaki n te kuna are e kaangai:

16Ko a nako n aki manga ururingaki.

ngkoe te aine ni kam'araa!

Ma ngaia ae ko aiwaa i nanon te kaawa,

n anene ma ni katang

am katangitang aika ko taatangiri

b'a ko aonga ni manga ururingaki.

17I mwiin banen itingaun te ririki akanne, ao e na manga kaoka Turo te UEA nakon te karikirake. E na riki te kaawa b'a kaanga te aine ae e kabooa nako rab'atana nakoia aomata nako n taian botannaomata n te aonnaba,

18ma e na bon akea te b'ai teuana ae e karekeaki ae e a tiku n te kaawa. E na riki te m'aane anne b'a a na b'ai te UEA, ao e na kabonganaaki ni kabooaki iai te kunnikai ae e raka i aon are e kainanoaki i bukiia koraki ake a onimakina te UEA.