Itaia 60 - Kiribati New Version Bible

Te Bong Ae E boou I bukin Ierutarem

1Teirake, Ierutarem! ko na oota!

E a kaarangaina am bong ae e boou.

E rangi n oota nako ootan

mimitongin te UEA i aom.

2A rabunaki aonnaba

ma aomatana n te roo,

ma e oota nako

ootan te UEA i aomi.

3A na roko botannaomata nako ma uea nako

nakon ootan

karaangainan ami bong.

E taku te UEA:

4Kauki matam! Taratara nako!

A roko taian aomata.

I aoni kawaia natimi m'aane n roko

man taabo aika a raroa nako;

ao a uotaki natimi aine

kaanga ataei aika a uarereke.

5Ngkana kam noora te b'ai aei,

ao a na uremangangaa matami,

e na bukibuki manawami

ao kam na onrake n te kakatonga.

A na bane ni uotaki nakoim

baika a kakaawaki man taabo aika a raroa nakoa i aoni marawa

ao kaub'aia botannaomata nako.

6E na onrake abam

n te naani kamero

aika ataei

mai Miria ao Eb'a;

a uoti taiani koora ma b'aai ni kaboiarara

b'a b'aini karineau, Ngai ae te UEA

kaain Tieb'a

7A na bane n nakoim

tiibun Keta;

taian tiibu m'aane mai Neb'aiota

a na riki naba b'a am B'ai.

N na butim'aai b'a taian angab'ai

ao a na uota te karineaki nakon au Tembora.

8Tera te b'ai ane e ieie

kaanga taian nang

ke kaanga taian taobe aika a okira aia auti?

9A tataningaai Ngai ae te UEA

ami aomata

n abam'akoro aika a raroa nako.

A kaira te kawai kaibuke ni m'am'ananga

i bukin kaokaia nakon aia auti

ma aia tirewa ao aia koora.

Boni Ngai ae te UEA

ae I karaoa aei

i bukin karineaia ami aomata,

b'a aonga ni karineai.

E Na Manga Karaoaki IerutaremE taku te UEA:

10Ierutarem, e na manga karaoaki oom

irouia ianena;

e na riki aia tautaeka

b'a ami toro.

I katuaaeko ngkoa n uniu

ao ngkai N na nanoangaiko

ao N na akoiko.

11A na uki mataroan am kaawa

n te ngaina ma te bong

b'a aonga n rin taan tautaeka man botannaomata nako

ngkana a kairiia aia aomata nakoim

ma kaub'aia ni kabane.

12A na bane n kaungaaki

botannaomata ma abanuea

akana a rawa ni m'akuri i bukim.

13A na uotaki nakoim

moan raraoin kaain Reb'anon

kaai ake teatura, kaai ake bureen,

ao kaain ake tiira.

A na kamanenaaki n au Tembora

i bukin katamaroaan

te tabo ike N na katokaa iai waeu.

14A na bane ni katorobubua i matam

aia kariki am kairiribai

ake a ribaiko ma ni karaoa ae aki raoiroi nakoim.

A na kaangai, “Bon Tion ngkoe,

are ana kaawa te UEA,

are Atuaia Iteraera ae e tabu.”

15E riiribaaki ngkoa ao e kiitanaki,

ao e katinanikuaki ngkoa irouia aomata nako.

Ma N na katikiraoiko,

te kaawa ae e na kamoamoaaki

i nanon taai aika a nako roko.

16Ko na atiki kaub'aia

uea ma botannaomata nako.

Ane ko na ataai b'a te UEA

Ngai ae e m'aaka ae Atuaia Iteraera,

ae I a tia ni kamaiungkami.

17N na uoti nakoim te buraonti ma te biti

n onea mwiin te kai ma te atiibu;

ao n onea mwiin te buraonti ma te biti,

N na uota nakoim te koora ma te tirewa.

N na rinea te rau ma te motiraoi

b'a taan tautaeka ao taan kairiiri.

18E na aki manga kakiriweingkami

te tiritiri, te urub'ai ao te kakeru

i aon tian abami nako.

Kam na arana

oon ami kaawa nako b'a “Tokanikai”

ao “Neboaki” b'a aran

mataroan ami kaawa nako.

19Kam na aki kainanoa ootan

taai ke nam'akaina.

N na riki Ngai ae te UEA ae Atuami

b'a ami oota n aki toki

ao te tia karekea te karineaki.

20E na aki manga bung ami taai

ke ni bung ami nam'akaina.

N na riki Ngai ae te UEA b'a

ami oota ae akea tokina,

ao a na toki ami bong

n nanokawaki.

21A na maiu raoi ami aomata

ma n teimatoa ni b'aina te aba;

bon taian aroka ngaia aika I unikia

b'a a na neboai.

22E na riki naba b'a te botannaomata ae e korakora

te utu ae te kabanea ni uarereke.

Bon te UEA Ngai,

ao N na kawaekoaai ni karaoa aei

ngkana e roko te tai.