Te Otinako 40 - Kiribati New Version Bible

Katean ao Katabuan Ana Um'antabunrianna Te UEA

.

1Ao E taku te UEA nakon Moote,

2Ko na katea Au Um'antabunrianna ike N na memena iai ni moanibongin te moan n ririki.

3Karina te Atiniberita i nanona, are a mena iai tuua ake tebwina, ao katinea te keeten i matana.

4Karina te taibora, ao katokai b'aina nako i aona. Karina naba kaintein te taura, ao katokai taian taura i aona.

5Kaki te baonikarea ae e b'ain kabuokan te b'ai ni kaboiarara i matan te Um'antabunrianna.

6Kaki te baonikarea are b'ain kabuokan taiani karea i matan te Um'antabunrianna.

7Kaki te beetin n tebotebo i marenan te Um'antabunrianna ma te baonikarea, ao kanoaa nanona n te ran.

8Katea oona ni katobibia, ao katinetinea te keeten ni mataroana.

9Ao imwina, katabua te Um'antabunrianna ma b'aina nako ni katimtim'a i aona te b'aa are e tabu.

10I mwiina, katabua te baonikarea ma b'aina ni kabane ni katimtim'a te b'aa i aona, ao e na riki n tabu iai.

11Ao katabua naba te beetin n tebotebo ma nangoana n te aro naba anne.

12Kanakomaia Aaron ma natina mm'aane nakon mataroan te Um'antabunrianna, ao tuangiia b'a a na tebokia.

13Karina kunnikain Aaron are te kunnikai n ibonga ao katabua, b'a e boni kaokoroaki iai n te aro anne b'a e aonga ni kona n riki b'a Au ibonga.

14Kanakomaia natina mm'aane, ao karin taiani kabaraaki i aoia.

15Ao i mwiina, katabuia n ai aron naba katabuan tamaia, b'a Au ibonga n aki toki mai mwiin te katabutabu aei.

16Ao e karaoi b'aai ni kabane Moote n aron are E baaireia te UEA.

17Ma ngaia are, e a tei raoi Ana Um'antabunrianna te UEA ike E memena iai ni moanibongin te moan nam'akaina n te kauoua n ririki i mwiin kitanakin Aikubita.

18Ao e uniki ana aana Moote, ao e katei iai taiani kai ao e kanim iai kaai ake a bangaki, ao e katei taiani boua.

19Ao e arora te rabuna i aon te Um'antabunrianna, ao e arora te rabuna are mai tinaniku i aona, n aron Ana mwioko te UEA.

20Ao i mwiina, a anai atiibu ake baaba ni koroboki ake uoua, ao e karin i nanon te Atiniberita. E karin taiani kai n amo n taiani m'am'a ake n te Ati, ao e katoka mataia i aona.

21Ao i mwiina, e a karina te Ati i nanon te Um'antabunrianna, ao e katikaarake te keeten ni kainna. Ao anne arona ni kaina te Atiniberita, n aron are E a tia ni baaireia te UEA.

22Ao e karina te taibora i nanon te Um'antabunrianna n tanimeang, i tinanikun te keeten,

23ao e katokaa te kariki are te angab'ai nakon te UEA i aon te taibora, n aron are E a tia ni baaireia te UEA.

24E karina kaintein te taura i nanon te Um'antabunrianna, n tainimainiku ni kaaitaraa te taibora,

25ao e kauraa te taura ikekei i matan te UEA, n aron are E a tia ni baaireia te UEA.

26E karina te baonikarea are te koora i nanon te Um'antabunrianna i matan te keeten,

27ao e kabuoka te b'ai ni kaboiarara are e boiarara n aron are E a tia ni baaireia te UEA.

28E katinea te keeten i mataroan te Um'antabunrianna,

29ao e kaki te baonikarea i bukin kabuokan karea ni kabuokaki, ao te karea are te uita, n aron are E a tia ni baaireia te UEA.

30E katuka te beetin n uaati i marenan te Um'antabunrianna ma te baonikarea, ao e kanoaia n te ran.

31Ao a teboki baiia ma waeiia ikekei Moote, Aaron ao natina mm'aane,

32ni katoa riniia n te Um'antabunrianna, ke nakoia nakon te baonikarea, n aron are E a tia ni baaireia te UEA.

33Ao e katea te oo Moote ni katobibia te Um'antabunrianna, ao te baonikarea, ao e katinetinea te keeten i mataroan te oo. Ao ai anne aroni Moote ni karaoa m'akurian te Um'antabunrianna.

Te Nang I aon Ana Um'antabunrianna Te UEA

Ike E Memena Iai(War 9.15-23)

34Ao i mwiina ao e a rabuna te Um'antabunrianna ike E memena iai te UEA n te nang, ao e kaona nanona raaititin te UEA.

35Ao e aki konaa n rin nako Moote nako nanon te Um'antabunrianna i bukin aei.

36A na kona ni kam'ainga aia maeka Iteraera nakon te tabo teuana ti ngkana e m'aing nako te nang mai aon te Um'antabunrianna.

37Ngkana e tiku n aki m'aing te nang arei, ao ngaiia a aki naba kam'ainga aia maeka.

38I nanon aia tai ni m'am'ananga, ao a nonora te nang are E memena iai te UEA i buakoia i aon te Um'antabunrianna n te ngaina, ao te boua te ai n te tairiki.