Ieremia 50 - Kiribati New Version Bible

E Na Kataenikaiaki B'aburon

1Aio te rongorongo ae e anganai te UEA i bukin te kaawa are B'aburon ma kaaina:

Taekina te b'ai ae na riki

ao tai katuka naba te rongorongo teuana ma iai.

2Anga te kanikina

ao katanoataa taian rongorongo!

Kam na aki karabaa!

E a tia ni b'aka B'aburon!

E a tia ni maerikiriki te anti are Merotaka!

A kamaamaaeaki bouanantin B'aburon,

ao a kamanatuaaki bannaia aika a rangi n ribaaki!

3E na roko mai meaang

buakanakiia kaain B'aburon;

a na kaai ni biri nako ma aia man,

ma ni katuka te aba ma akea kaaina.

A Na Riai N Okira Abaia Kaain Iteraera Ma Kaain Iuta

4E taku te UEA:

Kaain Iteraera ma Iuta,

Ngkana a riki baikai

ao kam na tang, ao kam na kaai

n okira abami

n taromauriai,

Ngai ae te UEA ae Atuami.

5Ane kam na titiraki i bukin te kawai nako Tion

ao i mwiina kam na roko ao kam na raonai

ni karaoa te boraraoi

ae kam aki urua ke ni m'aninga.

6Au aomata, bon atiibu ngkami aika kam m'arua nako

aika a kiitanaki i roun aia tia kaawakintiibu.

i aoni maunga.

Kam bon aki ururinga naba

ami tabo ni motirawa.

7Boni Ngai ami tabo n uteute,

te tabo teuana are e anga te kaantaninga

nako ia ami bakatibu.

Ma kam kiitanai,

ma ngaia are, ngkana kam reke irouia ami kairiribai,

ao bon akea aia bure iai

ngkana a kab'autingkami.

8Biri nako mai B'aburon

Au aomata.

Otinako man te aba anne!

Kam na aki taningaa temanna.

9Mai meaang, N na karokoia

botannaomata aika a korakora n ti teuana.

A na buakana B'aburon

ao a na taua.

Ti te bo kanoan aia katebe ma aia kanoa tautia aika a bane aroia

ae a bon teeteke naba aia taakete.

10E na kataenikaiaki B'aburon,

ao ana kairiribai a na uoti nako

b'aai ni kabane aika a tangiri.

B'akan B'aburonE taku te UEA nako iu:

11Kaain B'aburon,

kam kukurei ngkoa

ni kimoaia Au aomata.

E rangi n reke ami tai ngkoa,

ni karaoa te karongoaa ae e korakora riki

nako ia aoti

ma n eweewe rake n aki akaaka

kaanga taian kao ataei aika a kanakoa kunin te uita.

12Ti te bo te kaawa ae B'aburon

ma kaanga te tina nakoim.

Ma e nang kab'ainrangaki

ao e na riki n akea arona

b'a ti te rereua ae akea kain aona.

13E na urua B'aburon uniu,

ao bon akea ae e konaa ni maiu ikekei.

A na bane aika a rirarikim

n tiaoki ngkana a noora

te b'ai ae e a tia n riki.

14E a tia B'aburon ni kakaitaraai.

Taani katebe kakioi nnemi.

Kanakoa ami kanoanikatebe nako B'aburon.

15Buaka ni iterana ni kabane!

Taan taenikai mai B'aburon!

A urua oona ma tauana

kairiribai ni kab'aka.

N nang irantaanga

ni karaoa naba nakon B'aburon te b'ai ngkoa are e karaoia

nakon kaawa aika a buubura ake tabeua.

16Bon akea riki temanna ae e tiku i B'aburon

n ununiki ke taia uan taian tawaana.

Taiani iruwa naba ake a maeka ngkoa ikekei a tia n okiri oin abaia nako,

a maakuia aia taanga ni buaka kairiribai.

17Iteraera bon te nanai n tiibu

ae e maae nako irouia raian aika a bora ni baki.

Uean Aturia

boni ngaia te moan kab'autiia Iteraera.

Ao i mwiina, Nebukaneta,

uean B'aburon,

are e kangkanta riin Iteraera.

18Boni Ngai te UEA ae Moan te M'aaka,

ae Atuaia Iteraera,

ae I katuaaea uean Aturia,

ao N na bon katuaaea naba

uean B'aburon.

19Ma N na uota Iteraera

ni kaokia nakon oin abana.

A na riki aomata b'a kaanga tiibu

aika a am'arake ni kaon raoi birotoia

i aon te Maunga are Karemera

ao i B'atian,

n aba are tabukibuki are i Eberaim

ao i Kireata.

20N na kamaiuia ti tabeman

mai Iteraera ao Iuta.

N na kab'ara raoi aia bure

n te aro ae a na bon mauna nako raoi

aia bure ma aia kaairua,

ao a na aki manga nooraki.

A Na Mwioko Te UEA

Nakoia Ana Kairiribai B'aburon

21E taku te UEA:

I a tia n tuangiia

ana kairiribai B'aburon ni kaangai,

“Buakaniia kaain Merataim

ao Bekota.

Tiringiia ni kabane!

Urui aia b'ai nako!”

22E a konaa n ongo te aba

tangin te buaka

karongoaan te urub'ai.

23Bon te aama B'aburon

are e oroi aaba nako,

ma ngkai e a wene n uruaki.

Ai bon te tiaoki tera nako ia bootanaomatan nako

te aonnaba!

24E kakaewenakoai B'aburon,

Ngai ae te UEA ae Moan te M'aaka,

ma e aki ataia te botannaomata arei

b'a e a reke n te b'ainikam'ane

are I a tia ni katauraoia.

25I a tia ni kaotinakoi Au b'ai ni buaka,

ao I kaairi ma te kamaraia

i aon B'aburon.

26Kam roko mai keraroa,

ngkami aika ana kairiribai B'aburon!

Kab'arikoi taian uita

man ana autinib'ai nako,

ao kabuoki ni kabane,

n reitaki ma b'aai ni kabane.

27Tiringiia tautian B'aburon,

i bukina b'a e a roko te tai are

a na katuaaeaki iai.

28A urua au Tembora

ana taanga ni buaka B'aburon,

ma N na irantaanga n te tai ae e aki maan.

Ao i mwiina, a na taetaekinna i Tion taan rawei maiuia

mai B'aburon.

29Buakana B'aburon, aia taani katebe kairiribai;

katea ami autinrianna ni katobibia te kaawa are e buubura,

ao tai kabiri nakoa temanna.

A kakaotinakoai, Ngai ae te Atua ae e Tabu,

ma ngaia are, karaoa nakoina

te b'ai are e karaoia nako ia kaawa aika a buubura ake tabeua.

E Na B'aka B'aburon Are Te Kamoamoa

30Kaain B'aburon,

I berita Ngai ae te UEA

b'a a na bon wene ni mate naba

i nanon kawain te kaawa am tautia aika a bane aroia.

31B'aburon, ko riai n aranaki b'a,

“Te aomata ae e kamoamoa.”

Ma e a tia n roko te tai are

N na katuaaeko iai

Ngai ae te UEA ae Moan te M'aaka.

32Ko kamoamoa,

ma ane e na reke waem ao ko na b'aka,

ao bon akea temanna ae e na konaa ni buokiko ni kateirakeko.

N na kabuoki ami kaawa aika a uarereke n te ai,

ao a na bane n urarake

akana i rarikim n te ai.

33Kam iowawa ngkami aika kaain B'aburon

nakon Iteraera ao Iuta.

Kam anaia b'a ami bure, ao ngkai

kam a manga rawa ni kanako ia.

34Ma bon Ngai ae te UEA ae Moan te M'aaka,

ae N na kamaiuia ma ni kaawakiniia.

N na kakoroa te rau i aon abaia

ao N na karokoa te kangaanga i aon ami b'ai.

35I a tia ni katanoataa buakanakim,

am mataniwi, ao am taani iango nako.

36E na kakoauaaki n te buaka aei

b'a bon taani kewe ao taian nanobaba

ami burabeti.

Ao ane e na kakamaakuia

ami taani buaka.

37Ao i mwiina, a na rawa n ira te buaka

aotin ami kaanibuaka

ma ianena akana i buakoia ami taanga ni buaka,

ao a na uotaki nako ni kabane akana kam kaawakin

b'a kaub'aimi irouia ami kairiribai.

38Ane a na mautakataka ami karaanga ma ami

kanare nako.

A na bane n riki baikai,

i bukina b'a e onrake

abami n taian bouananti,

ao a tia ni

kaburababaingkami.

39Bon akea riki te tai ae e na maiu iai kaain

abami

bon ti manin te rereua, tiakaore,

ao mannikiba aika a baareka.

40I urua Totom ma Komora

ao kaawa nako ake i rarikiia,

ao N na bon urua naba B'aburon

ni kabanea raoi n ai aron naba anne.

Bon akea temanna ae e na maiu ikekei.

E A Ekakinako B'aburonE taku te UEA:

41N te tabo ae e raroa i meaang,

e a tia ni kautaki iai

te botannaomata teuana ma botannaomata ake a raonna.

A m'aaka

ao a tauraoi nakon te buaka.

42A mena i nanoni baiia

taiani kainikatebe ao kanoanikatebe ao taiani kabaang.

A iowawa tautia

ao akea aia nanoanga.

A eeko rebwerebwen waeia aia aoti

kaanga naoni marawa

aika a rebwe i mataniwiin te bike.

A tei n te rain ana taanga ni buaka n tataninga te buaka

ao a roko b'a a na buakaningkami,

kaain B'aburon!

43E a kaman tia n ongo ami uea

taekan te taanga ni buaka aei,

e a tia ni mamaara n te maaku;

e minominotaki ma n rairaki ma te maraki

kaanga te aine ae e bungia natina.

44B'aburon, N na buakaniko

kaanga te raian man te rereua,

ae e un nako ia tiibu i nanon te tawaana are i mataniwiin Ioretan.

A biri nako te nanai n tiibu n te tai naba arei,

ao akea naba kaain te aba.

Antai ae N na rineia b'a e na buakaningkami?

N na karaoia n ti Ngai!

Bon akea ae e konaa ni kairoroai b'a N na buaka

ke ni kakioai nako.

45Ongora n Au babaaire i bukimi,

kaain B'aburon.

Ane a na uaakinaki nako natimi,

ao e na kamaunaaki abami.

46E na ongo te aba karongoaan

uruakakimi i buakoia botannaomata nako,

ao e na ruru te aonnaba.