Itaia 51 - Kiribati New Version Bible

E Na Karokoa Te Rau Te UEA

1Ngkana kam tangiria ni karaoa ae e raoiroi

ao n ongotaeka iroun te UEA

ao kam na katotoonga Aberaam.

Boni ngaia te b'a are

kam ekeaki mai iai.

2E rinea Aberaam ao Taara te UEA

b'a ami bakatibu.

E kakab'aia Aberaam te UEA

ao man te aomata ane temanna anne

ane a nako maiai kariki aika a m'aiti.

3E ngae ngke e uruaki Tion,

E na uota te rau te UEA,

ao e na rangi n taatangiraki te kaawa

n ai aron te nne n aroka are Eten

are E a tia ni katauraoia.

Ao i mwiina, e na karaoa ana bootaki ni kukurei Tion;

e na kakaaitau

ao e na anenea te anene ni kukurei.

E Na Tokanikai Te UEA N Te Kabane

4E taku te UEA:

au Aomata ngkami ao au botannaomata!

Ma ngaia are, kam na kakauongo raoi irou.

E na karekea te rau au reirei

ao e na oota nako kaanga te oota

i bukin te botannaomata.

5A ingainga n tataningaai

b'a N na kamaiuia

aomata ake a maeka n taabo aika a raroa nako i nanon te marawa.

I korakora ao I tauraoi;

N na roko ni kamaiungkami n te tai ae e waekoa

ao N na tautaekaniia botannaomata ni kabane.

6Karaua n taraa karawa!

Tarai aonnaba.

E na mauna nako karawa kaanga te bubu;

ao e na mangaingai te aonnaba

kaanga taiani kunnikai.

A na bane ni mate aomata aika i aon te

aonnaba kaanga taian nango.

E na akea tokin au tokanikai;

ao e na teimatoa m'aakau ni kakamaiu.

7Ngkana kam tangiria ni karaoa ae e raoiroi

ma n ongotaeka nakon au reirei

ma nanomi ni kabane,

ao kam na kakauongo raoi Irou.

Kam na aki b'arannano

ngkana iai aika a kamamaaeingkami

ma n atong taeka aika a kamaraki nano.

8A na kanaki nako

kaanga te kunnikai ae e kanaki n te koa.

Ma n tokin au tokanikai;

ao e na teimatoa

m'aakau ni kakamaiu.

Te Tataro I bukin Ana Buoka te UEA

9Uti! buokiira te UEA.

Ko na korakora ao tauraoi.

Uti! Karaoa te b'ai are ko a tia ni karaoia

nakoia am Aomata n taai ake ngkoa.

Ko bon aki tataa

Raaba are te mannikaakang?

10Bon tiaki ngkoe ngkoa are ko kaoraa taari are e nano

ao ko karaoa te kawai

i bukiia am Aomata

are a na toua ma ni kaawakinaki raoi iai i nanona ni karokoia n iterana are teuana?

11A nang oki ngkai nako Ierutarem

koraki ngkoa ake ko a tia ni kamaiuia,

a na anene i aoni kawaia.

A na katokaaki aia baunuea

ma te kukurei ae moan te korakora,

ao a na aki manga karawaawataaki

n te nanokaawaki ao te rawaawata n nano.

E Anga Te Kaantaninga Te UEA

12Bon te UEA Ngai, are E

kaungaingkami.

E aera ngkai kam maaka

te aomata?

A m'au ma ni mate kaanga te uteute.

13I taakina nako taiani karawa

ao I kawenea

aan te aonnaba.

Ma kam a tia ni m'aninga taekau,

Ngai ae ami UEA ao te Tia Karikib'ai.

Kam katoabong ni maakuia

koraki aika a un nanoia

ma n taku b'a a na kabuakakako.

Ma a mena ia ngkai?

14A bane n tang ma te maraki aomata

ao a na waekoa ni kainaomataaki;

a na kamaiuaki

man m'aakan te mate

ao a na aki manga baki.

15N na buokiia

i bukina ngkai bon Atuami Ngai,

te UEA ae Moan te M'aaka,

are E kabuakaa marawa.

16I a tia n tuangngkami te b'ai ae kam na taekinna,

ao N na teimatoa ni kamaiungkami

i nanoni baiu.

I taakina nako taiani karawa

ao I kawenei aan nako

te aonnaba.

Ao ngkai I kaangai, “au Aomata

kaain Ierutarem.”

Te Kauring Nakon Ierutarem

17Ierutarem, uti! Teirake!

Ko a rangi ni manging

n te m'angko are e kanoaaki

ni unin te UEA.

Ko a tia n ong timtimna ni kabane,

ao ko a aki konaa n nakonako raoi.

18Bon akea temanna mai buakoia natim aika a bati

ae e mena ikekei ni kairiko

n anganiko ana i buobuoki.

19Ko a tia n uruaki

n te buaka ao te rongo;

I a aki konaa n anganiko karauan nanom.

20E a un te UEA ae Atuam,

ao a na wene n aki konab'ai natim

ni koonan kawain nuukan te kaawa ni kabane,

kaanga te ria ae m'ane n te karaun.

21Ko a reke n te kanganga ao ko a manging,

ma tiaki man mwiin te wain.

Ma ngaia are, kakauongo raoi

22iroun te UEA ae Atuam,

are e tei i bukim ao e kaangai,

“I a tia n anaa te m'angko

are e on n te un mai nanoni baim

are ko riki ni manging iai.

Ao ko na aki manga kairoroaki

b'a ko na manga mooi iai.

23Ma I a anga

nakoia am kairiribai nako,

ake a karikiko b'a te baareka

ma n toubekaiko.”