1Te mate tokin te kaawa ae te tia kewe, ao te tia tiritiri,
ae e kaub'ai ae e na manga kurib'aiaki ma n anaaki b'aina nako!
2Kakauongo! Rebwen te kainikataere,
tangin waen kaa,
rebwerebwen waeia aoti,
rurungaan kaanibuaka!
3A kanenei taan toka i aoia aoti,
a raitiiti kabaang, a raneanea kainiwai!
A kakareuataorake maate,
e a bure warekan te mate
ao a toubekaaki moaia!
4E a katuaaeaki Ninewe
ae ainen mataawa ae e kakab'akab'aka,
ae e on n taian tabunea
aika a kamaamate,
ma ni kakaririia botannaomata nako ao n tautoroniia.
5E taku te UEA ae Moan te M'aaka;
“N na katuaaeko, Ninewe!
N na taekanako karabaam ni kabebeekaniko,
b'a a na noriko botannaomata nako,
A na nora arom ni kamamaaeaki.
6N na karaoiko b'a ko na tirobaeaki.
Ao ti na rabuniko n taiani maange.
A na matakuakiniko aomata ma te maaku.
7A na bane ni kararoako ake a noriko.
Ane a na kaangai, ‘E na uruaki Ninewe.
Antai ae e na kan nanoangaia?
Antai ae na kan kabebetea nanona?’ ”
8Ninewe, tao ko raoiroi riki nakon Teebe, are atuun kaawan te tautaeka n Aikubita? Iai otangana te Karaanga are te Naire are e katobibia te kaawa b'a kaanga oona, n totokoia ana kairiribai.
9A mena naba Itiobia, ao Aikubita b'a akea tokin m'aakana; e itabon ma Ribia.
10Ma e ngae n anne, ao a boni bane n uotaki nako naba kaain Teebe nakon te kataenikaiaki. A oroia ataei ni uaa mateia ni katawanangin nanon te kaawa. A kabaeaki n taurekereke taani kairiri, ma n tib'aaki nakoia taani kairiia taenikai.
11Ninewe, ko na b'aka naba n ai aron te aomata ae e koro ni manging. Ko na aki kona ni birinako mairouia am kairiribai.
12A na riki nonom nako b'a kaanga kaai aika biiku aika a tawaa uaaia. A na ioaki biiku, ao a na b'aka uaaia nako nanon wiim!
13Am tautia kanga ai aroia aine, ao abam a na kona n tuukia aiana. E na urui biiti ake i aon ami mataroa nako te ai.
14Itii raan ni katauraoi i m'ain katobibiam ni buakanaki, kamatoatoai nonom nako. Kaboboa bokabokan te buriki, ao b'ain te oroburiki!
15Ma bon akea uaan aika ko karaoi, b'a ko na boni kabuokaki ni uaa matem n te ai, ke n te bonibuaka. Ko na mauna nako n ai aron taian uita aika a kanaki irouia rokati.
Ko kam'aitiko n ai aroia rokati!
16Ko kabatiaia riki am tia bob'ai nakon itoini karawa! Ma a tia n nako n ai aroia rokati ake a taakin baiia ma ni kiba nako.
17Am mataniwi kaanga ai aroia te taanga n rokati ake a tikura te oo ni m'aitoron te bong, ma ngkana e oti taai ao a kibanako ao akea ae e atai mwiia.
18Te Emberoa n Aturia, a mate am mataniwi, ao a matunako am aomata aika a kakannato n aki manga uti. A uamaae nako am aomata i aon maunga, ao akea temanna ae e na kaokiia riki nakon mwengaia.
19Akea katokan rawawatam, ao a aki kona ni kamaoaki ikoakim. Ake a ongo taekan uruam a na uboi baiia ni kukurei. B'a a bane aaba nako n rootaki n am m'akuri aika a buakaka.
Who We AreWhat We EelieveWhat We Do
2025 by iamachristian.org,Inc All rights reserved.
