1.Uea 10 - Kiribati New Version Bible

M'anangan Te Ueanaine Mai Tieba Ni Kawara Toromon

1Ao e ongo te ueanaine are i Tieba tanoatan rongorongon Toromon, ma ngaia ae e nako Ierutarem b'a e na kataia n titiraki aika a matoatoa.

2E kairiia tabeman ana aobitia, ao e katokai i aon ana kamero ni b'aintangira aika boiarara, tirewa, ao koora. Ao ngke e roko, ao e maroroo ma Toromon ni b'aai ni kabane ake i nanona.

3E kaekai Toromon ana titiraki ni kabane, e ngae ngke a matoatoa kaekaaia.

4Ao e rangi ni mimi te ueanaine n aron ana ataib'ai Toromon. Ao e b'ara nanon neierei ngke e noora ana bareti,

5te am'arake i aon te taibora, ana aobitia, ana toro, aika a kaboraoi, aomata aika a touatina kanana, ao taian karea ake e anga i aon te baonikarea n ana Tembora te UEA.

6Ao e taku:

Toromon, I ongo rongorongon rabakaum i abau ma b'aai ni kabane ake ko a tia ni karaoi.

7Ma I bon aki kakoauai ni karokoa I a bon nooria ni matau. Ao ngaia a m'aiti riki b'aai aika I aki ongo taekaia. Ko wanawana riki ao ni kaub'ai riki nakon are I a tia n kaongoaki.

8A rangi ni kab'aia buum nako ao am aobitia ngkai a memena i rarikim n ongongora n am taeka n rabakau aika ko tataekin.

9I neboa te UEA ae Atuam. E kakatonga iroum ao E a tia n rineiko b'a uean Iteraera. E tangira Iteraera te uea ma ngaia are, E a tia n anganiia aia uea ae na tautaekaniia n te eti ma te koaua.

10Ao e angan Toromon e kaaniia nimaua te tan te koora, b'aai ni katamaroa, ao b'aai aika boiarara aika a bati nakon ae a tia n anga tem'angina nakon Iteraera, ueanainen Tieba.

11Ao Toromon, e a manga kaboa mwiina n anganna naba te b'ai n tangira n aron are e anganiia taan tautaeka ake tem'angina,

12ma e bon anganna naba b'aai ni kabane ake e tangiri.

13Ao i mwiina, e okiri abana neierei ma ana aobitia.

Kaub'ain Toromon(2 Rongo 9.13-28)

E uoti koora, kaai aika tuniba, ao b'aai ni katamaroa te uea are Iram i aon ana kaibuke man te aba are Obira. Ao Toromon e kamanena te kai ni karaoa iai kaintam'araken te Tembora ma te bareti, ao te aabi ao b'aai ni katangitang riki tabeua aika iai karaia. Bon te kabanea n tamaroa n tuniba ae e tuai man nonoraki i aon Iteraera.

14E roroko ana koora Toromon ae kaan uabwi ma tenua te tan ni katoa ririki.

15Ao e anganganaki naba ana koora irouia taani boob'ai ao ai uana naba ma uean Arabia ao taan tautaeka i aon Iteraera.

16Ao e karaoi 200 otanga aika koora Toromon, ao e kamanenaa e kaania te itera ni kirokuraem te koora i bukin teuana te otanga.

17Ao e karaoi naba 300 te otanga aika a uarereke, ao e kamanena e kaniia uoua te kirokuraem i bukin teuana, ao e katikui otanga akekei i nanon ana bareti n te Ru are Buakonikai.

18E karaoaki ana kaintokanuea mani koron te ereb'anti, ao e kabiraki n te koora ni koaua.

19E mronron taubukin akuun te kaintokanuea, ao iai nnen katokaani baai i rarikina ake uoua. Ao iai bannan te raian ni iteran te kaintokanuea ake uoua, ao iai naba bannan te raian n nakon te kaintokanuea,

20tokin te kaintam'arake are onoua m'anekana ni iterana ake uoua. Bon akea te kaintokanuea n te aonnaba ae ai aron ana kaintokanuea Toromon.

21E aki rangi ni kakaawaki te tirewa n taai aikai, ma ngaia are, a bane ni karaoaki b'aai nako n te koora. B'aai n am'arake n te Ru are Buakonikai a bane naba ni koora.

22A m'aiti ana kaibuke ni borau Toromon aika a korakora. E kakam'anangaia ana kaibuke ma ana kaibuke Iram b'a a na uoti rikaaki taiani koora, tirewa ao koron ereb'anti, ao ai uana naba ma m'angkii, ao biikooki.

23Boni ngaia te kabanea ni kaub'ai ao ni wanawana ni uea n te aonnaba.

24A bane aomata nako mani botan-aomata nako ni kan ongora n ana taeka n rabakau, ake E a tia n anganna te Atua.

25A roroko aomata nako ni kakawaria n te ririki teuana ma teuana ma uotaia aia b'aintangira aika tirewa, koora ao ai uana naba ma kunnikai, b'aai ni buaka, baika a boiarara, taian aoti ke miure.

26Boni iai ana kaanibuaka are e katikitikaki irouia aoti ae m'aitina 1,400 ao 12,000 ana aoti aika e kaawakin i Ierutarem ao ni kaawa naba ake tabeua.

27E buta nanon te kaawa are i Ierutarem n te tirewa i nanon ana tai n uea, ao e koro rawatan naba te kai te tiira kaanga ai aron te tukomorea ni karaabeen taian tabuki.

28A kabooi ana aoti ao ana kaa-ni-buaka Toromon ana taani kabob'ai man aonon Muturi ao Kue. A kabooi e kaaniia itiua te kirokuraem te tirewa i bukin aia kaanibuaka,

29ao e bon nakon uoua te kirokuraem te tirewa i bukiia aoti. Ao a kabonakoi naba taian aoti ma kaanibuaka nakoia kaain Eta ma kaain Turia.