1Eria bon te burabeti mai Titibe i Kireata. Ao e nakon Aaba n te bong teuana ao e taku, Bon ana Toro te UEA ae E maiu, ae Atuan Iteraera ngai. Ao I tuea n arana b'a e na bon aki b'aka te karau ni karokoa te tai are I a manga taetae iai b'a e na b'aka. Ao a na bon akea naba te aoi ae e na ruo nako aon te tano.
2Ao rimwi riki ao E taetae te UEA nakon Eria ni kaangai,
3Ko na nako n ri aon te karaanga are te Ioretan, n te aro are ko na konaa ni karabako i rarikin Karaangan Kerita ae e uarereke.
4Ko konaa ni mooi man ranin te karaanga ae e uarereke, ao n am'arake man te am'arake ae I a tia n tuangiia taian reben b'a a na uoti nakoim.
5Ao e ongotaeka Eria iroun te UEA ao e m'ananga nako ni maeka i rarikin Karaangan Kerita ae e uarereke.
6Ao a uouoti kanana taian kariki ma taian iriko ni man taian reben nakoina uoua te tai n te bongina, ao e mooi man ranin te karaanga are e uarereke.
7Ma i mwiin tabeua te tai, ao e a m'autakataka te karaanga are e uarereke arei b'a are e tuai mani b'aka te karau.
Buokakin Te Aine Ae E A Tia Ni Mate Buuna I Tareb'ata Iroun Eria8Ao E tuanga Eria te UEA ni kaangai,
9Ko na nakon te kaawa are Tareb'ata i Titon ni maeka iai. I a tia n tuanga te aine ae e a tia ni mate buuna b'a e na anganiko kanam.
10Ao ngke e a roko Eria i rarikin mataroan te kaawa are Tareb'ata, ao e noora te aine ae e a tia ni mate buuna b'a e rikorikoi ana aia. Ao e taku nakoina, Ko konaa n taiaoka n anganai te m'angko n ran?
11Ao ngke e nang nako neierei n anaia, ao e a manga taku riki, Ao ko taiaoka naba ni uota kanau te kariki?
12Ao e taku neierei, I boni koaua n aran am UEA ae E maiu b'a bon akea kanau te kariki. Bon ti iai irou ngkai te abutana te buraawa, ao teutana b'aan te oriwa. Ao i aon kawaiu ngkai n okira mwengau ma au aia aikai ni kuukana ae iai irou ngkai b'a kanau ao kanan natiu te m'aane. Ao i mwiin anne, ti nang mate ni baki.
13Ao e taku Eria, A na bon nakoraoi b'aai ni kabane. Ko na karaoa ane ko a tia n taekinna. Okira mwengam ao kuukana kanam ma natim. Ma ko na karekea moa kanau te kariki ae e uarereke ao uotia mai.
14E a tia ni berita UEAN ae Atuan Iteraera b'a e na bon aki babane am buraawa, ao e na aki babane naba kanoan am b'atoro n oera.
Kamaiuan Te Ataeinim'aane Iroun Eria15Ao e nako neierei ao e karaoi b'aai ni kabane ake e tuangnga Eria. Ao a teimatoa n rereke kanaia ae e tau i nanon te tai ae e maan.
16Ao E kaawakina ana Berita te UEA are e karaoia Ana burabeti are Eria, ao e bon aki roko n te bane ana buraawa ke ana b'atoro n oera neierei.
17Ao i mwiin tabeua te bong, ao e a aoraki natin te aine are ana auti te auti ao e rikirake ni korakora, ni karokoa e boni mate.
18Ao e takaarua neierei nakon Eria ni kaangai, Tera ae I a tia ni karaoia nakoim ae e kaairua? I taku ngai b'a Ana burabeti te Atua ngkoe. Ko bon roko b'a ko na tiringa natiu te m'aane, b'a kauringaakiu n au bure nakon te Atua?
19Ao e taku Eria, Uotaamai natim te m'aane. Ao e anaa te ataeinim'aane mai bain neierei ao e uotiarake nakon te ru are e mamatu iai. Ao e kawenea te ataeinim'aane arei i aon ana kainiwene,
20ao e tataro ni kaangai, Te UEA ae te Atua. E aera ngkai ko karaoa te m'akuri ae moan te kaanganga nakon te aine aei? E kakamaekaai n ana auti, ao Ko a manga kariaia b'a e na mate natina te m'aane.
21Ao e b'aoua Eria i aon te ataeinim'aane arei tenua te tai ngke e tabe n tataro ni kaangai, “Te UEA ae te Atua. Ko na kaoka maiun te ataeinim'aane aei.”
22Ao e kaekaa ana tataro Eria te UEA, ao e a reke iken te ataeinim'aane arei.
23Ao e tabekia rake Eria ao e uotia rikaaki. Ao e anga te ataeinim'aane arei nakon tinana ao e taku, Nooria, E a maiu natim te m'aane.
24Ao e taku neierei, “Bon Ana burabeti te Atua ngkoe. I a bon ataia ngkai b'a ko bon taetae mairoun te UEA.”
Who We AreWhat We EelieveWhat We Do
2025 by iamachristian.org,Inc All rights reserved.
