Maraki 1 - Kiribati New Version Bible

1Bon Maraki ngai, ao aio ana rongorongo te UEA are e anganai i bukin Iteraera.

Ana tangira te UEA i bukin Iteraera

2Iteraera, bon te UEA Ngai ae I kaman tangiriko. Ma ko titiraki b'a tera tangirakim irou. Ko na aki m'aninga ae bon tarin ami bakatibu are Iakob'a teuare Etau, ma I rinea Iakob'a

3n onea mwiin Etau. Ao I onika aban Etau ake a tabukibuki nakon te rereua ae akea kain aona ike a aiwaa iai taian Tiakaore

4Ane a na kaangai kanoan Etau, “E ngae ngke urubekebeke ara botannaomata ae e Etom, ma ti konaa ni manga kateia.”

Ma I berita Ngai ae te UEA ae Moan te M'aaka b'a N na raebiti b'aai nako akana a manga katei. Ao ane a na ataai aomata nako b'a I aki konaa ni katoka uniu irouia i bukina ngkai e rangi ni korakora aia bure.

5Iteraera, ngkana kam noora te b'ai aei, ao kam na takaarua ni kaangai, “E rokoroko i tinanikun tian abara kakannaton te UEA.”

Ekakinakoaia Ibonga

6Iai te b'ai ae N na taekinna Ngai ae te UEA nakoia ibonga. A karineia tamaia naati ao a karineia aia toka taani m'akuri. Bon tamami ao ami toka Ngai, ao e aera ngkai kam aki karineai? Kam a tia ni katinanikuai ngkami aika ibonga, ao ngkai kam titiraki ni kaangai, “Ti katinanikuko n te aro raa?”

7Kam kab'ainrangai ngke kam anga taiani karea aika akea manenaia i aon au baonikarea. Ao kam a manga kaangai, “Ti kab'ainrangko n te aro raa?” Kam karaoa anne n ami taeka ae e kaangai, “Tera kakannaton ana baonikarea te UEA?”

8Kam bon aki ataia b'a e bure kareanakin taiani man aika a mataki, m'auku, ke a aoraki? Ao ngkana ngaia kam na ti kataia n anga taiani man aikai nakon te koowana. Ni koauana e na bon aki kani kukurei ke ni buokingkami.

9Bon te UEA Ngai ae Moan te M'aaka, ma ngaia ae kam riai ni karaoa ae N na kukurei iai. Kam a tia ni bure. Ao ngkai kam na nooria ngkana arona b'a tao N na akoa temanna mai roumi.

10Tera ngke iai temanna ae e kaini mataroan au Tembora, b'a kam aonga ni katoka kabanebuakaan ami tai ni kauraa te ai i aon au baonikarea. I aki kukurei iroumi ngkami aika ibonga, a akea riki ami angab'ai ae N na manga butim'aia.

11E neboaki arau man te karangaina ni karokoa te airoo irouia botannaomata ni kabane n te aonnaba, ngkana a kabuoka te b'ai ni kaboiarara ma n anga te karea ae e boni kaantaningaaki nako iu.

12Ma e ngae ngke kam katinanikuai ngkami aika ibonga n ami taeka ae e kaangai, “Akea te b'ai ae e rangi ni kakaawaki n ana baonikarea te UEA, ao akea manenan karea aikai.”

13Ko a rangi ni kam'araa n te aro are ko bon anga naba taian kanikina aika a buakaka nako iu. Ao kam uoti nako iu taian karea aika maan aika a kimoaaki maan aika a m'auku ke a aoraki. I konaa ni kariaia baikai?

14Kam anga n onei mwiin maan aika a kariaiakaki ake kam a tia ni berita iai nako iu, maan aikai aika a aki marurung. N na bon katuaaingkami i bukin aei, i bukina ngkai bon te Uea Ngai ae I kakannato, ae te UEA ae Moan te M'aaka, ae I taromauriaki irouia botannaomata n taabo nako.