Itaia 64 - Kiribati New Version Bible

1Bwenauai taiani karawa!

Ruorikaaki, te UEA;

karurui taiani maunga.

2Riiki b'a te kia are e kauraa te ai

are e na kaburoa te ran.

Ao i mwiina, ane a na ataiko iai am kairiribai

b'a te aeka n aomata raa ngkoe;

ane a na bane n ruru aomata nako

i bukina b'a ko raroa nako.

3am m'akuri aika ko a tia ni karaoi

bon baika a kamimii nakoira;

a ruru naba taian maunga

ngkana ko ruo rikaaki.

4Bon ti ngkoe te Atua

ae e tuai man nooraki ke n ongongo taekana

ae e karaoi taiani kakai

i bukiia taani ri mwiina.

5Ko buokiia ni kabane akana a kukurei n ongotaeka

ao ni karaoi b'aai akana ko tangiri,

ma e karika marakin nanon te bure.

Bon ti am buobuoki

ae ti na kamaiuaki iai.

6Ti aki tau n taromauriiko;

bon taian motinikunnikai aika a buakaka

ara m'akuri n tatabeua nako.

Ti m'auteretere kaanga taiani baanikaai;

bon te ang aika a korakora ara bure

ake a kaubara nakoira.

7Bon akea riki ae e taromauri n aram

ke n tiku ni kakaonimaki.

Ko a tia n tannako mairoura

ma ni kariaia te bure b'a e na kaniira nako.

8bon Tamara Ngkoe te UEA.

Bon ti taian m'angko taano ngaira,

ao Ngkoe te tia

karao m'angko n taian tano.

9Ko na aki kabuakaka nanom

ke ni katuka ara bure

inanom n taai nako!

Uringnga b'a bon am

aomata ngaira ni kabane.

10A tia n riki b'a n rereua

am kaawa nako,

ma ai ti Ierutarem nikirana.

11E a tia ni mauna n te ai

Tion ao te Tembora are e tabu

ike a neeneboiko iai ara bakatibu.

A riki b'a b'ariko n atiibu ara auti nako ngkoa

ake a rangi n tamaroa.

12Ko na kariaia b'a ti na tekateka ikekei

ao ni kamarakiira riki

ngkana ko noori baikai?