Itaia 54 - Kiribati New Version Bible

E Berita I bukin Ana Kakaawakin Te UEA

1Anene n taakarua;

e ngae ngkana ko tuai

mani kariki!

E a tia ni berita te UEA nakoim

b'a a na manga reke riki natim

nakon temanna ae e a tia

ni mare n te tai ae e a maan.

2Kabuuburaa am autinrianna!

Kamarangai riki beken am autinrianna;

ao kabaea ni kamatoa.

3Ane ko na taua abaia

ianena

ngkoe ma am kariki nako.

Kam na tekateka n taiani kaawa

ake a uruaki n te tai aei.

4Kam na aki maaku ke ni mamaa

ao kam na aki buuang.

E na aki b'ara nanomi.

Kam na m'aninga ae bon taani bure ngkoa ngkami

ma ngke kam uarereke;

Ani katoka te mamaa

i bukina ngkai ai akea buum.

5E tautaekana te aonnaba ni kabane

te UEA ae Moan te M'aaka

ae Atuaia Iteraera ae e Tabu.

Bon te tia karikiko ao buum,

ao e na bon kamaiungkami.

6Ti te bo ngkoa ma te buu ae e uarereke,

ae e uruaki nanona ae e tang

b'a e a tia

ni kiitanaki iroun buuna.

Ma E taku te UEA ae Atuam,

“I a kaokiko ngkai!

7I katinanikuingkami ngkoa,

ma ngkai I a manga rab'atiko naba

n au tangira ao nanou.

8I tannako ngkoa n te tai ae e aki maan

ma te maraki n nano.

Ao ngkai e a reke irou te nanoanga

ao te tangira ae akea tokina!

Boni Ngai ae te tia kaawakiniko ao am UEA,

ae I a tia ni berita n aei.”

E Berita I bukin Te Rau Ae Akea Tokina

9I berita ngkoa i nanon Nooa

b'a N aki manga

kamaunaa

te aonnaba n te ieka.

Ao Ngkai I a manga berita b'a

b'a N na aki manga

un iroumi

ke ni katuaaingkami.

10A na bane ni mauna

taiani maunga ma tabuki.

Ma N na teimatoa n nanoanga

ao n akoi nakoim;

N na aki urua au booraraoi

are N na angan ami botannaomata te rau.

Ierutarem Ae E Boou

11Ierutarem, ko nanokawaki,

ma n toutourake n te buaka.

Ma e na manga katea am kaawa

te UEA

n taian atiibu aika a tamaroa;

b'a aam

N na kamanenai taian tabeiro aika a buru.

12A na karaoaki am nono

n taian ruube,

ao mataroan am kaawa n taian b'ainikatamaaroa

ao oon te kaawa n atiibu aika a tamaroa.

13N na reireiniia natimi

ao N na karaoia b'a a na teetekeraoi.

14Ko na kateaki i aon te eti

ao ko na aki maakuia akana a kaakaraoa ae e aki eti;

a na bane ni kararoaaki mairoum

akana ko raraomaeakiniia.

15N na aki manga kanakoa temanna

b'a e na buakana am kaawa,

ao ko na karikiia b'a am taenikai

koraki akana a buakaniko.

16Ko na aki m'aninga are I karikiia

taani karaobiti

ake a karaoi taiani b'ainibuaka

i aon taiani kooro aika a kabuebue.

I karikiia naba taanga ni buaka

ake a urub'ai.

17A na aki nakoraoi taiani b'ainibuaka

akana a karaoaki i bukin buakanakimi;

ao a na aki konaa ni kamarakingkami

taian taeka akana a ekinakoingkami.

Bon am b'ai au tia m'akuri are Ierutarem!

I berita Ngai ae te UEA

b'a N na kakab'aiako n te tokanikai.