2.Uea Taekan te boki aei - Kiribati New Version Bible

Taekan te boki aeiTe boki ae te Kauoua n Uea boni kauouan iteran te boki ae ti teuana are e bwenauaaki nakon uaitera b'a 1 Uea ao 2 Uea, i bukina ngke e a rangi n anaanau ngkana a ikotaki n ti teuana i nanon te Nira ni Boki. E reitaki rongorongon abanuea ake uoua are Iuta ao Iteraera n te boki ae 2 Uea.Boni uoua kanoan te boki ae te ka 2 Uea b'a, Te Moani M'akoro (M'akoro 1—17) ae bon rongorongon abanuea aika uoua ni karokoa 722 te ririki are i m'aain bungiakin te Tia Kamaiu n te tai are e kataenikaiaki iai te Abanuea are Meang irouia kaain Aturia. Atuun te tautaeka i aon Iteraera bon Tamaria, are e kamaunaaki, ao a uotakinako kaaina b'a taenikai nako Turia. E a tiku Iuta are te abanuea maiaki.Kauouan Kanoan te Boki aei (18—25) bon rongorongon Iuta ni karokoa 586 te ririki are i m'aain bungiakin te Tia Kamaiu, ngke e buakanaki iroun te uea are Nebukaneta are uean B'aburon. E uruaki ni kabane Ierutarem are atuun kaawan te tautaeka ao a uotaki nako angiia kaain Iuta ma Ierutarem b'a taenikai nako B'aburon. E karika Ketaria te uea are Nebukaneta b'a te tia tautaeka irouia taian nikira ake a tiku i Iuta. E kainaki te boki aei n rongorongon te kaantaninga i bukiia kaain Iuta nakoni boong aika a na roko. E kainaomataaki te uea are Ieoiakin man te karabuuti are i B'aburon, ao e kaoaki b'a e na am'am'arake ma ueani B'aburon ni katoa bong.Ni kaineti ma are e taekinna te boki ae te ka 2 n Uea, ao a kamaunaaki Iteraera ma Iuta i bukina ngke a rawa aomata n ongotaeka iroun te UEA. E a tia te UEA ni kakaanakoia burabeti n taai aika a bati b'a a na kakauringiia aomata ma aia uea b'a a na katoka taromauriaia anti, b'a a aonga ni manga rairaki rikaaki nako ina. Ao n tokina, ao a katuaaeaki aomata. A uruakaki abanuea ake uoua, ao a kairiiraki aomata b'a a na maeka i abaia ianena, ao a raroa nako mai abaia. Rongorongon b'akan Ierutarem bon teuana mai buakon baika a riki i aon Iteraera. E kateretereaki n te boki aei bukin rikin te kabuanib'ai aei.A tia kaain Iuta ao Ierutarem ni kauna te UEA. Ma ngaia are, n tokina ao E a tannako mairouia.(24.20b)Oi n iango i aon te boki aei1. Kabuakakaan te uea are Aatia are uean Iteraera iroun te burabeti are Eria (1.1-18)2. Te burabeti are Eria (2.1—8.15)3. Uean Iuta ao Iteraera (8.16—16.20)4. Uean Iuta ao Otea ao taenikain te Abanuea Meang (17.1-41)5. Uean Iuta are Etekia ao Ana Buaka Aturia (18.1—20.21)6. Uean Iuta aika uoman aika a buakaka: Manate ao Amon (21.1-26)7. Ana tautaeka te Uea are Iotia ao bokin ana Tua te Atua. (22.1—23.30)8. Kabanea n uea aika Uean Iuta (23.31—24.20)9. Uruan Ierutarem ao uotakinakoia aomata nako B'aburon (25.1-21)10. Karikan Ketaria b'a te Tia Tautaeka ao Kainaomataakin te uea are Ieoiakin man te Karabuuti (25.22-30)