Taeka n Rabakau 10 - Kiribati New Version Bible

Ana Taeka n Rabakau Toromon

1Aikai tabeua ana taeka n rabakau

Toromon:

A kakukureia aia karo

ataei aika a iangoraoi,

ma a karawaawataaki nanoia

irouia ataei aika a nanobaba.

2Bon akea buokam ae e na anganiko

b'aai akana kam karekei mani karaoan m'akuri aika a buakaka,

ma karaoan ae e raoiroi

e na boni konaa ni kamaiuko man te mate.

3Ngkana kam ongotaeka iroun te UEA

ao kam na bon aki konaa ni baki,

ao ngkana kam buakaka,

ao e na bon aki anganiko te Atua

te b'ai ae kam tangiria

4E kairiko te taningaroti nakon te kainano,

ao e na karekea kaub'aim te m'akuri ae e matoatoa.

5E rangi n nakoraoi te m'akuri korakora

n tain te tai

ma bon te nanobaba ngkana e matu te aba.

6A bane aomata n neboia aomata aika a raoiroi,

ma a karabaia aika a buakaka i akuun

aia taeka aomata aika a buakaka.

7A aki toki n ururingaki aomata aika a raoiroi

e ngae ngkana a maan nako,

ma a kai m'anuokinaki

aika a buakaka.

8Ngkana iai te iangoraoi iroum

ao kam na kakauongo ma n ongotaeka,

Ngkana kam rangi ni b'aab'arantiko,

ao kam bon uruana aromi i bon iroum.

9Kam na maiu

ngkana kam kaakaraoa ae e raoiroi n taai nako

ma kam na reke,

ngkana e aki raoiroi maium.

10E karekea te kangaanga te kam'aam'ane,

ao te taetae n nanobaba

e na karokoa te urub'ai.

11Aia taeka aomata aika a raoiroi

bon boton te maiu,

ma a karabaia aika a buakaka

i akuun aia taeka aomata aika a buakaka.

12E karikirakea te kiriwe te riribai;

ao e aki noora te kaairua ae a karaoia

tabem'aang te tangira.

13Ngkana kam iangoraoi,

ao e na oti ngkana kam taetae.

Ma ngkana kam nanobaba,

ao kam na oreaki

n te kai.

14Ngkana kam iangoraoi,

ao kam na karekea te rabakau n aron ae kam konaa,

ma e na waekoa n uruana arom

te taetae n nanobaba.

15E konaa n riki b'a te nono te kaub'ai ae e korakora

ma bon akea otangam

n te maiu ni kainano.

16Ngkana kam maiuakina te eti,

ao te kaniwanga bon te maiu ae e raoiroi

ma ngkana kam maiuakina te buakaka

ao akea riki te b'ai ae kam karekea b'a ti te bure.

17Kariaia boaakimi,

ao ane kam na kunea te maiu;

ngkana kam aki kariaia boaakimi,

ao ane kam na tibanako man te kawai.

18Kam konaa ni karabaa nanomi ni kairiribai

ngkana kam taekina te kewe,

ma bon te nanobaba ngkami

ngkana kam touakina te kewe.

19Ane e na kaairua ami rongorongo

ngkana kam rangi ni kabatia ami b'arantiko

ma ngaia ae, kam riai n iango raoi ma n taratara raoi

n te b'ai are kam taekinna.

20Ana taeka te aomata ae e raoiroi

kaanga ai aron te tirewa ae e itiaki,

ma ana iango

te aomata ae e buakaka

boni b'aai aika akea bonganaia.

21A m'aiti aika a buokaki

n taian taeka n reirei aika a manena,

ma a tiringaki taian nanobaba

ni bon oin nanobabaia.

22Ngkana e kakab'aiaingkami te UEA

n taiani kaub'ai,

ao bon akea te b'ai ae kam na raraomaeakinna.

23A kukurei taian nanobaba ni karaoan te kaairua,

ma a bane aomata nako aika a iangoraoi

ni kukurei ni karaoa te m'akuri ma te wanawana.

24Te b'ai ae a rangi n raraomaeakinna aomata aika a buakaka

e na manga bon riki nakoia,

ma aomata aika a raoiroi a na karekea

te b'ai ae a rangi ni iaiangoia.

25A na mauna nako aomata aika a buakaka aikai a

ngkana e roko te angibuaka n oroia,

ma e na kaawakiniia

ni kabane aika a ongotaeka i rouna te Atua.

26Te aomata ae e taningaroti n tain te m'akuri

kaanga ai aron te wii ae e onrake n te beneka

ke te mata ae e manga n te bubu.

27Ngkana kam karinea te UEA,

ao e na bon anaanau maiumi,

ngkana kam teimatoa ni kaakaraoa ae e kaairua,

ao e na koreaki ni kauarerekeaki maiumi.

28Ngkana kam ongotaeka iroun te UEA,

ao kam na kukurei,

ma bon akea kanoan aia bong aika a na roko

aomata aika a buakaka.

29E kaawakiniia ni kabane aomata

aika a maiuakina te raoiroi te UEA,

ma e uruana aroia akana

a karaoa ae e bure.

30A na tei ni matoatoa aomata aika a raoiroi,

ma a na bua abaia

aomata aika a buakaka.

31A taetae ma te iango raoi aomata aika a raoiroi,

ma a na kainab'aabu

taani kam'aam'ane ni kewe.

32Ngkana kam ongotaeka iroun te UEA

ao kam na ataa te b'ai

ae kam riai n taekinna n taai nako.

Ma bon akea ae e na onimakiningkami

ngkana kam taekina te kewe.