1A iraorao ngkoa uean Turo ma taman Toromon are Tawita. Ao ngke e a ataia Iram b'a e a uea Toromon, ao e a kanakoia tabeman ana aobitia ni kawara Toromon.
2Ao e kaoka te rongorongo Toromon nakon Iram ae e kaangai:
3Ko uringa nanon tamau are Tawita are e rangi n tangira katean te Tembora, ike E na mamaeka iai te UEA ae Atuana, are E na konaa n taromauriaki iai? Ma e aki toki ni buakanaki tamau irouia ana kairiribai, ai ngaia are e aki roko n te reke ana tai.
4Ti na karab'arab'a nakon te UEA ae te Atua ngkai b'a e a reke te rau i nanon abanueau, ao akea te kangaanga, ke te karawaawata man taiani buaka aika a na riki man te tabo teuana ma teuana.
5E berita te UEA ae te Atua nakon tamau b'a ngkana e riki b'a te uea natina te m'aane, ao e na katea te Tembora i bukin taromaurian te UEA. Ma ngaia are, I a tia ni baaireia b'a N na karaoa anne.
6I butiiko b'a a na koroi mani uoti nako iu taian aroka ake tiira am taani m'akuri. N na kabooia ni b'aai akana a bon taku, ao N na anga naba au taani m'akuri b'a buokaia. Ti boni kaai n ataia b'a a bon rangi ni b'aati ni korokai am taani m'akuri nakoia aomata nako.
7Ao e rangi ni kukurei Iram n ana buubutii Toromon ao e taku, “I rangi ni kaaitau b'a E a tia te UEA n angan Tawita natina te m'aane ae e wanawana b'a e na uea i aon te botannaomata are e korakora arei.”
8Ao e kaoka rikaaki ana taeka ae e kaangai:
E a tia n reke am rongorongo irou ao N na anganiko ni kabane kaai aika tiira ao kaai aika m'aiango.
9A na uoti kaai mai Reb'anon nako taari are te Mereterenian au taani m'akuri. Ao a na booti ni kabaei, ao a na kokooki i mataniwiin taari nakon te tabo are ko tangiria. Ao i mwiina, a na manga kab'arai taiani kai, ao a konaa ngkanne au taani m'akuri n anai mai ikanne.
I bukin ngkanne boon taiani kai, ko na ti katauraoi taiani uita aika I kainanoi i bukiia kaain au auti.
10Ao Iram e anga taian tiira ma taiani m'aiango nakon Toromon n aron are e kainanoia.
11Ao Toromon e kabooa mwiina n angan Iram e kaaniia 1,000 te tan te uita ao e nakon 5,000 te riita b'aan te oriwa ni katoa ririki.
12E kaawakina ana Berita te UEA, ao E karika Toromon b'a te aomata ae e wanawana. A tiaaina te boraraoi Iram ma Toromon b'a e na akea te buaka imarenaia, ao e teimatoa n akea te bubuaka i marenaia.
Ana Taani M'akuri Toromon13Ao e anga ana babaaire Toromon b'a 30,000 mai i aon Iteraera ni kabutaa aika ana korokai i bukin te Tembora,
14ao e rinea Atoniram b'a e na tararuaia taani m'akuri aikai. Ao Toromon, e a manga tib'atib'aia nakon tenua te koraki aika kaka 10,000 kaaia. Teuana te m'akoro, e m'akuri teuana te nam'akaina i Reb'anon ao i mwiina a motirawa uoua te nam'akaina ni mwengaia.
15Bon iai naba ana taani m'akuri aika 80,000 aika taani koro atiibu i aon aaba ake a tabukibuki i Iteraera, 70,000 aika taani m'akuri aika taani uoti taian atiibu,
16Ao e ri aon 3,000 taani i buobuoki ni kaira waakin te m'akuri ma ni kairiia taani m'akuri.
17E tuangiia taani m'akuri b'a a na koroi taian atiibu nakon tuaia, ao tamneia i bukin aan te Tembora.
18Ao a kaai ni m'akuri ana aomata Toromon ao Iram ma kaain te kaawa are Keeb'ara, ao a kaai ni karekei atiibu ma kaai ni katauraoi i bukin te Tembora.
Who We AreWhat We EelieveWhat We Do
2025 by iamachristian.org,Inc All rights reserved.
