1Ao e kanakoa Natan are te burabeti b'a e na karakina te karaki teuana nakon Tawita ae e kaangai:
Te aomata ae e kaub'ai ao te aomata ae e maiu ni kainano aika a maeka n te kaawa ae ti teuana.
2Iai ana tiibu ao a na kao aika a m'aiti te aomata are e kaub'ai arei,
3ma bon ti temanna ana tiibu ae te ataei te aomata are e maiu ni kainano ae e kabooa ao e kaikawaia. E riki te tiibuteteei arei i rouna ma natina b'a te man ae a tatangiria. E bon kaam'arakea naba n ana raurau ao e kamooia naba n ana m'angko ao e kamatuua ni b'ab'akoia. E riki ana tiibuteteei arei b'a kaanga oin natina.
4N te bong teuana, e roko ana iruwa te aomata are e kaub'ai, ma e aki tangiria te kaub'ai arei n tiringiia ana tiibu ke ana kao b'a butim'aean ana iruwa. Ma ngaia are, e iraea ana tiibuteteei te aomata are e maiu ni kainano ao e karaoia b'a a na butim'aai.
5Ao e rangi n ribaa te aomata are e kaub'ai Tawita ao e taku nakon Natan, “I tuea iroun te UEA b'a e na riai ni mate te aomata ane e karaoa anne!
6Ngkai e aki nanoanga te aomata ae e maiu ni kainano, e na kabooa mwiina aua te tai okiokin boon te tiibuteteei.”
7Ao e taku Natan nakon Tawita:
Boni ngkoe te aomata ae e kaub'ai! Ko na ongora ngkai nakon te b'ai ae E taekinna te UEA ae te Atua i bukim: “I rineiko b'a uean Iteraera. I kaawakiniko mairoun Tauro
8ao e bon anganiko naba ana auti ma buuna nako. I kariaia b'a ko tautaekana Iteraera ma Iuta, ao ngkana arona b'a e tuai rau nanom n anne, N na manga anganiko riki.
9E aera ngkai ko aki ongotaeka irou ao ko karaoa te b'ai ae rangi ni kakamaaku? Ko tiringa Uria are kaain Eta ngke ko anga b'a e na tiringaki irouia kaain Ammon, b'a ko aonga ni konaa n anaa buuna.
10Ngkai ko aki ongotaeka irou ao ko anaa buun Uria b'a buum, ao e na aki konaa n reke te rau i nanon am utu.
11Ane e na iai mai buakoia am utu ae e na karika te kanganga ae e korakora nakoim, ao N na anaiia buum ma n anga nakon te m'aane temanna i bon i matam. Ane e na matu ma ngaiia ngke a bon matakuakinaki irouia.
12Ko kakaraoa te m'akuri ni karabaa, ma N na kaotia nakoia Iteraera ni kabane b'a a na nooria.”
13Ao e taku Tawita, “I a tia ni aki ongotaeka nakon te UEA.”
14Ao e taku Natan, “Eng, ko a tia! Ko bon aki tabe ma te b'ai ae e tangiria te UEA.
E a tia ni kab'araa am bure, ma ngaia are, ko na aki mate. Ma e na mate natim are e a tia ni bungiaki.”
15Ao i mwiin arei, e a okira mwengana Natan.
Maten Natin Tawita Ae E UarerekeAo e kaoraka natin Tawita te m'aane ae e uarereke te UEA.
16Ma ngaia are, e aki am'aam'arake Tawita ni kaota nanokaawakina, ao e butiia te Atua b'a e na kamarurunga natina. Ao e aki matu i aon ana kainiwene, ma e wene i aon te burooa ni kangainaa.
17Ao a tei ana mataniwi i rarikina ni kataia n tuangnga b'a e na teirake. Ma e bon aki roko n te teirake ke n am'arake.
18Ao e a mate te ataei arei imwiin wenena n aoraki i nanon itibong, ao a maaku ana aobitia n tuangnga Tawita ae e a mate. Ao a taetae i bon irouia, “E a kangaa arona ngkai b'a ngke e bon maiu te ataei ao e aki kan ongo iroura, ao ti nang kanga riki ngkanne n tuangnga ae e mate natina? E mena ao e nang karaoa riki ae e rangi ni buakaka!”
19Ao e namakinna Tawita b'a a wirikiriki ana taani m'akuri, ao e a ataia ae e a mate te ataei. Ao e a titirakiniia ana taani m'akuri ni kaangai, “E a mate te ataei?”
Ao a taku ana taan m'akuri, “Eng, e a mate.”
20Ao e teirake Tawita mai aon te burooa; e tebotebo, e kaara irana, ao e karina kunnikaina. Ao e m'ananga nakon ana autinrianna te UEA ao e taromauri, ao i mwiina, e a manga okira mwengana. Ao e bubuti kanana, ao e a am'arake ngke e roko kanana irouia ana taan m'akuri.
21Ao e taku ana mataniwi nakoina, “Tera ae ko karaoia? Ko aki am'aam'arake ao ko tang i bukin natim te m'aane ngke e bon maiu! Ma ngkai, ngkai e a mate, ko teirake ao ko a am'arake.”
22Ao e kaeka Tawita ni kaangai,
“I aki am'aam'arake ao I tang ngke e boni maiu b'a au kaantaninga b'a e na reke maiuna. I kaangai inanou, Antai ae ataia, ao E na nanoangaai te UEA ni kamaiua natiu.”
23Ma ngkai, e a mate, ao tera nanon ae N nang aki am'aam'arake? I aki konaa ni manga kaoka maiuna! N na manga bon raonna naba n te tai teuana ni mate, ma e aki konaa n okirai.
Bungiakin Toromon24E karaua nanon buuna are Nei B'atateb'a Tawita ao e matu ma ngaia. Rimwi riki, e a manga bungia riki natina te m'aane ao e aranna b'a Toromon. E tatangira Toromon te UEA
25ao E kanakoa Natan b'a e na tuanga Tawita ni kaangai, “E na aranna te UEA b'a Ieriria.”
Tokin Te Buaka Ma Kaain Ammon(1 Rongo 20.1b-3)26I nanon te tai anne, e a tia ni mena Ioaba n te aba are Ammon, b'a e buakana te kaawa are Rab'a. E reke i rouna ana oo te uea
27ao e kanakoa te tia uarongorongo ni kaongoa Tawita ni kaangai:
I a tia ni buakana Rab'a ao e a reke irou te oo are e teiakini raan i bukin nnen nimaia kaain te kaawa.
28Weteia nikiraia te taanga ni buaka ni bootia. Ao katobibiia te kaawa, ao ko na taua ni bon ti ngkoe. B'a ngkana ko aki karaoa anne, ao ane a na ururingnga aomata ae boni ngai ae I taua te kaawa.
29Ao e bootia nikiraia te taanga ni buaka ao e buakana Rab'a. E taua te kaawa
30ao e anaa te baunuea man bouanantin te anti are Mirekom. Ao e uoti nako naba b'aai ni kabane aika a boongana.
31Ao e kam'akuriia kaain Rab'a Tawita b'a a na urua oon te kaawa n taian beke ao taian tanai aika taiani biti, ao e a manga tuangiia b'a a na karaoi taiani buriki. E karaoa naba te aro arei nakon kaawan Ammon ni kabane.
E a manga okira Ierutarem Tawita, ao a okiri mwengaia nako Iteraera.
Who We AreWhat We EelieveWhat We Do
2025 by iamachristian.org,Inc All rights reserved.
