1Te UEA, Ko aera ngkai Ko kararoako?
E aera ngkai Ko karabako
ngkae I a reke n te kaangaanga?
2A b'ainikirinaki aomata aika akea aia b'ai
irouia aomata aika a kainikatonga.
Ane a na boni m'ane
n aia babaaire aika a boni bubuaka.
3E kainikatonga te aomata ae buakaka
n ana iango aika bubuaka;
Ao te aomata ae kani b'aib'ai
e karereantia te Atua.
4E aki kan reitaki teutana ma te Atua
te aomata ae buakaka;
E taku n ana iango b'a akea te Atua.
5E totokanikai n ana waaki nako;
ma E aki kona n oota n aron te Atua
ni momotikitaeka,
e aki toki ni mamataurikiia
ana kairiribai.
6E taku n ana iango,
“E nene ni matoatoa au waaki!
N na teimatoa n tiitiku n rau raoi
n arou aio.”
7E on wina n te kewekewe
ao ana kakarabakau
bon te kakaunuun
ao te kani karaoa ae buakaka.
8E karabaa n taabo ni karan;
b'a e na oroia ma ni kamateia
akana akea aia bure.
9Kanga ai aron te raian ae e baki
ae e karabaa i buakon kaai,
b'a e na karekeia konana
akana kananoanga;
E na kam'aneia n ana b'ai ni kam'ane,
ao e na katikitikiia nako.
10E b'atokotoko ao e tataninga,
b'a e na raweia konana.
11E taku n ana iango, “E matakii te Atua!
E aki kona n noorai.”
12Te UEA ae te Atua, kareke kaiia akana buakaka!
Ao ururingiia akana kananoanga!
13E aera te aomata ae buakaka, ngkai e kakeaa te Atua?
Ma n taku i nanona, b'a E aki konaa te Atua ni karekea kaina!
14Ko taratara; ao Ko noori kabuanib'ai ma kaangaanga nako
ao Ko tauraoi ni buobuoki n taai nako.
E mwioko iroum ane kananoanga;
b'a Ko buobuoka ane akea tamana.
15Urubekea m'aakan ane buakaka;
ao katauaea i bukin te buakaka ake e karaoi
ni karokoa e toki mani karaoana.
16Te UEA bon te King n aki tootoki.
A na bane ni kiitana abaia aomata
ake a toro irouia atua tabem'aang.
17Te UEA, Ko na ongo aia buubuti akana mangori;
ao Ko na kakorakorai nanoia.
18Ko na ongo tangiia ni kani buokaki akana kananoanga ma akana akea aia karo;
ao Ko na nanoangaiia n am Babaaire nako,
b'a e aonga n toki aia m'akuri taani bangaomata.
Who We AreWhat We EelieveWhat We Do
2025 by iamachristian.org,Inc All rights reserved.
