2.Rongorongo 4 - Kiribati New Version Bible

Karaoan B'ain Nanon Te Tembora(1 Uea 7.23-51)

1Ao Toromon e tua karaoan te baonikarea ae te buraati ae 9 te miita rababana ma ab'akina ae 4 ma te iterana rietaatana.

2E anga naba ana taeka b'a e na karaoaki te boora ae e buubura ae te buraati ae aranaki b'a Taari. Bon 4 ao te iterana te miita buuburana, ao 2 te miita rietan nanona, ao tebwi ma teniua te iterana te miita mronronna.

3E katamaroaaki mataniwiin tinanikuna n uoua riakin tamnein taiani kao m'aane, tengaun taiani kao m'aane ni katoa 45 te tientemiita, aika a bane ni karaoaki man te buraati, are e karaoaki iai naba te boora.

4E toka te boora arei i aon taian kaom'aane aika buraati aika tengaun ma uoman, aika kakateniman kaom'aane ni kaaitarai taabo aika aua.

5Matenin te boora arei bon itibwi ma nimaua te mirimiita, ao mataniwiina kaanga tein te m'angko ae katotongan baan te uee. E konaa ni nneaki i nanon te boora arei onobwi te ngaa te riita.

6E karaoi naba tebwina boora aika a uarereke ao e katikui nimaua n iteran te Tembora are maiaki ao nimaua n iteran te Tembora are meang. A kabonganaaki taiani boora ake a uarereke i bukin kaitiakan taiani man ake a kabuokaki b'a taiani karea i aon te baonikarea, ao e kabonganaa te ran te ibonga man te boora are e buubura i bukin kaitiakan baina.

7A karaoaki naba taiani kai n taura koora aika tebwina n aron are e a tia ni baaireaki n te tamnei. E katikui taian kai n taura aikai Toromon i nanon te Tembora, kakanimaua n iteran nako te ruu are e buubura.

8E karaoi naba tengaun taian taibora ao e katikui naba n te ruu are e buubura, kakanimaua n iterana nako. Ao e karaoa naba tebubua taiani boora ni katimtim aika koora aika a uarereke.

9E anga ana taeka Toromon b'a e na karaoaki katawanangin te Tembora aika uoua. Iai te katawanang ae e buubura, ao iai ae e uarereke: te katawanang are e uarereke bon ti ibonga aika a konaa ni kamanenaa. A kabiraki mataroan taian katawanang aikai n te buraati.

10E katukaki te boora are e buubura are e aranaki b'a Taari i rarikin koonan te Tembora are mainiku maiaki.

11E karaoi taian tiabora ma boora ni katimtim, ao baanin te mannang. Aikai riki b'ain nanon te Tembora ake e karaoi naba i bukin ana Tembora te Atua:

12Uaai taiani boua, ao uoua rabunan tabona aika tein te boora ake a toka i aon tabon taiani boua aikai, ao uoua tamnein taian tiein i aon rabunan taiani boua aikekei,

13abubua taiani bamkuranete i bukin tamnein taian tiein,

14ma taian kaintei ao taiani boora ake a uarereke,

15te boora are e buubura ao tengaun ma uoman kaom'aane ake a taua,

16baanin taiani mannang aika a kabuebue, ao ai uana naba ma taiani tiabora ao kainiwaiteken te irikomaiu.

E karaoi b'aai aikai Uram man te buraati ae e karaneaneaaki

17are e kab'aroaki nako nanon nnena ngkana e ran n te kabuebue ao e katei i rarikin te Karaanga are Ioretan, i marenan Tukota ma Tereta.

18E bon rangi n rawata taiani buraati ake a kamanenaaki i bukin b'ain nanon te Tembora n te aro are akea ae e ataia raoi b'a iraua m'aitin ae e a tia ni kamanenaaki iai.

19Ao aikai naba b'ain nanon te Tembora ake e tua Toromon b'a a na karaoaki man te koora: te baonikarea, taiboran taiani kariki are e tabu,

20kaintein taian taura nenea are e kakauraaki i matan te Tabo are Moan te Tabu,

21tamnein taian uee, taian taura ao taian kaibiti,

22b'ain tiringan te taura, taiani boora ni katimtim aika a uarereke, rauraun te b'ai ni kaboiarara, baanin te ai, ao taiani mataroa nakon te Tabo are Moan te Tabu ao mataroan ruun te Tembora are n te katangaina.