Te Minita 10 - Kiribati New Version Bible

1E kaboiraaea ana kabira te tia motiboi

naango tabeman aika a mate i nanon te kabira,

ao e kabuakaka te wanawana ae e m'aiti

te nanobaba ae ti teutana.

2E kairiko te iango raoi

nakoni karaoan te raoiroi;

ao e kairiko te iango n nanobaba

nakoni karaoan te kaairua.

3A kaoti nanorooia aomata aika a nanobaba

n aroia ni maeka;

e rang ni beebete kinakiia

b'a akea kanoan aia iango.

4Tai kaaki am m'akuri

ngkana e un am mataniwi.

E na kab'araaki am bure ngkana

ko tiku n aki kakarongoa.

5B'aai tabeua aika a karaoaki irouia taan tautaeka a aki raraoi:

6a karineia aika a nanobaba, ao a aki karineia aika a kaub'ai;

7a kariaiakaki tooro b'a a na toka i aoia aoti; ao a kairoroia aia toka tooro b'a a na nakonako i aoni waeia.

8Ko na manga boni b'aka

i nanon te m'arua ae ko boni kenna;

e na tenaiko te naeta,

ngkana ko urua te oo.

9Ko na boni konaa naba ni ikoaki

ngkana ko korokoroi taian atiibu

ke ngkana ko korokai.

10E na boni kangaanga kabonganaan am tanai

ngkana ko aki taimma;

ngkana ko tim'aati,

ao ko na bon ataa te b'ai ae ko na karaoia.

11E aki manena te m'aaka nakoim

i bukin kamananaan te naeta

ngkana e bon tenaiko naba.

12A na reke raraom,

ngkana ko taetae ni iango raoi;

ao ngkana ko taetae n nanobaba

ao ko bon tiringko iai i bon iroum.

13A moana aia waaki nanobaba man te aki iango raoi,

ao e toki nanorooia

n te kabuanib'ai.

14A aki konaa ni b'ara riaia,

ma bon akea mai buakora ae e ataia

b'a tera kanoan boong aika a na roko.

15A aki ataa mateia ni m'akuri aomata aika a nanobaba

a bon aki ataa naba

kawaia n okiri mwengaia.

16E na bon reke n te kangaanga te aba

ngkana e baabakanataei ana tia tautaeka

ao ana taani kairiiri

a bobotaki ni kukurei ni katoa bong.

17Ma e na teetekeraoi te botannaomata

ngkana e nanonim'aane ana tia tautaeka,

ao a aki kabanei aia tai ana taani kairiiri

ni kabatia te bobotaki ni kukurei.

18Iai tabeman aomata aika a rangi n taningaroti naba

ni bonobonota raranin raun aia auti

ni karokoa ae a obonako kaina ao ni b'aka.

19Ko na kukurei

n te am'aam'arake ao te momooi,

ao e konaa ni kabooi b'aai ni kabane

aika ko tangiri te kamaraato.

20Ko na tai iaiangoa naba

kamaraiaan te uea;

ao tai kamaraiaa te aomata ae e kaub'ai,

ko na aki naba n te aro ni karaba.

B'a ane e na ongo te mannikiba ae e uarereke

ao e na taekin b'aai ni kabane.