Itaia 40 - Kiribati New Version Bible

Kaungaaki Nanoia Ana Aomata Te UEA

1E a tia ni kaangai te Atua:

“Kaungai nanoia au aomata!

Anganiia te rau.

2Taetae raoi nakon Ierutarem

ao katanoataa ae e kaangai:

A toki am bong n tautoronaki.

Bon te UEA ngai, are I kataboroa tuaam

i bukin am bure nako.”

3E taakarua temanna ni kaangai,

“Kaitiaka te kawai i nanon te rereua!

Karaoa te kawai ae e eti

i bukin te UEA ae te Atua.

4Taun taiani m'arua;

ao kanakoi taian tabuki

ma maunga.

Kabooraoa te tabo ae e bobuaka

ao te tabo ae e aobuaka.

5Ao i mwiina, ane e na kaoti mimitongin te UEA

b'a e aonga n nooraki.

E a tia te UEA ni berita i bukin aei!”

6Temanna ae e takaarua n tuangai,

ao I titiraki ni kaangai,

Tera ae N na takaaruaia?”

Bon ti taian uteute ngaira aika aomata,

e aki tei maan maiura riki

nakon taian uee aika a riki n aki akaaka

7A mate uee ma uteute,

n ana babaaire te UEA

ao ai arora naba.

8A mauna nako uee ma uteute,

ma a na bon aki konaa ni bitaki

b'aai aika e a tia n taekin.

E Mena Ikai Atuam!

9Bon iai te rongorongo ae e raoiroi

i bukin te kaawa ae e buubura ae Tion

Takaaruaia n tokin korakoran b'anaam

mai taubukin te maunga ae te kabanea n rietaata ni maunga.

Ko na aki maaku n takaarua

nakon kaawan nako Iuta,

“E mena te Atua ikai!”

10Nooria! E a roko te UEA ae te Atua

ae e rangi ni M'aaka

b'a E na tautaeka

ma baina ae e korakora.

Uotana te b'ai ake e a tia n uotia

nakon te buaka,

ao E anganiia ana Aomata kaniwangaia.

11E tararuaia ana Botannaomata te UEA,

kaanga te tia kaawakintiibu

ni kaawakiniia ana Nanai n tiibu.

E uouotia tiibu ataei

i aoni baina

ao ngke e tabe ni kaira raoi

te tina n tiibu.

Antai Ae E Bootau Ma Te Atua?

12Iai mai roumi ae e baairea

te marawa n ti ngaia

ke n taakina karawa

n oini baina?

Ngkoe ae ko kaaki te tano n

te aonnaba i nanon te b'aketi

ke n taua rawaawatan taian tabuki ao taiani maunga

i aon te kainikatine?

13Iai mairoumi ae e a tia n tuanga te UEA

ke n tuangnga te b'ai ae e na karaoia

ke ni kaetia?

14Iai ae tuangnga te UEA

b'a e na reireinna rabakauna

ao te kaetitaeka ae eti?

Antai ae e anganna te ataib'ai

ao te rabakau?

15Bon ti taian timtim n ran i nanon te b'aketi

botannaomata ni kabane iroun te UEA

ke te taaurouro i aon te kainikatine;

bon ti te abutana te tano

abam'akoro ni kabane.

16E na bon aki tau m'aitin

taiani kao

ake i aon Maungan Reb'anon

i bukin te angab'ai

i bukin te karea nakon te Atua,

ao a na bon aki tau naba m'aitin

taian aroka i bukin kanaan te ai.

17E iangoia botannaomata te Atua

b'a b'aai aika akea manenaia.

18Antai ae e na kabootauaki ma te Atua?

iai te b'ai ae ai arona?

19E boni bootau te bouannanti ma te Atua?

E karaoaki man te buraonti

ao ni kabiraki aona teutana n te koora,

ao e katamaroaaki n te tirewa.

20Ke e na rineaki te aekaki ni kai ae e raka arona

i bukina b'a e aki mka

ao i mwiina e a karaoaki raoi

ni baai aika a bairaoi ni karaoa te bouannanti

ae e na aki konaa ni b'aka.

E Tautaekana Te Aonnaaba Ae E B'anin Te Atua

21Ko tuai man ataia?

Ko tuai man ongongo,

E bon aki teretere raoi

b'a bon te Atua ae e karika te aonnaba?

22Bon te Atua ae e tautaekana

te aonnaba ni kabane,

ao ngaira aika ti maeka ikai

bon ti taian man aika a uarereke.

E taakin nako taiani karawa

kaanga te kunnikai ke te autinrianna ae e aki rokinaki.

23E karuoia taan tautaeka te Atua

ao E karaoia b'a baika akea manenaia.

24Ti te bo ngaiia ma taian uee

aika a tib'a ure

ao a tabe n rikirake.

Ma ngke e ukia te Atua,

ao a rai ma n uotakinako

kaanga te maange n tain te angibuaka.

25E titiraki te Atua ae tabu,

“Antai ae e kabootaua ma Ngai?

Bon iai ae e boraoi ma Ngai?”

26Bon noora karawa n te tairiki!

Antai ae e karaoi taian itoi?

Antai ae e anganiia araia n tatabemaniia nako?

Antai ae e kairiia kaanga te taanga ni buaka?

E bon rangi ni korakora te UEA

n te aro are bon akea mai buakon taian itoi aika bua.

Bon Te UEA Ae E Anga Te Korakora

27Kam kaangai ngkami aika Iteraera,

“E bon aki kubariira te Atua!

E aki tabeakiniira

ngkana e karaoaki ae e aki raoiroi nakoira.”

Ma kam na kangaa n taekina anne?

28Kam tuai ataia?

Kam tuai naba ongo?

Bon akea tokin te UEA,

Te tia karaoa te aonnaba.

E bon aki konaa ni kainano ke ni kua;

bon akea tian wanawanana.

29Bon te UEA ae e anga te korakora

nakoia aika a kua.

30A na boni kua roronrikirake,

a na tatatata ao a na b'aka.

31Ma e na manga reke te korakora ae boou

irouia akana a onimakina te UEA.

A na korakora kaanga ikare

a na betiraoi i aoni baiia ni kiba;

a na nakonako ao a na biribiri

ao a na aki kua.