1Ao a karaoi kunnikaia ibonga ake a na kamanenai ngkana a karaoa aia m'akuri n te Tabo are e Tabu, ao a karaoi man buraen te tiibu ake a buruu, a beebo ao a uraura. A karaoa te kunnikai n ibonga i bukin aron Ana mwioko te UEA.
2A karaoa te ebota man te rinen ae e raoiroi, te burae n tiibu ae e buruu, e uraro, ao ae e uraura, ao man te karai naba ae te koora.
3A amana te koora ni kammaniia, ao a koroi ni kairariki b'a a na karaoaki ma te riinen ae e raoiroi, ao te burae n tiibu ae e buruu, ao ae e uraro, ao ae e uraura.
4A karaoi uoua i aon te anga i aon te kunnikai b'a b'ain te ebota ni kabaeaki nako rarikina, b'a a aonga ni kona ni bae ni matoatoa.
5Ao e kabaeaki ma te ebota te bare ae karanaki mani biraki, ao e karaoaki naba man te b'ai ae ti te bo ma ake a karaoaki naba iai akekei, ao e kabaeaki ma te ebota n ti teuana ma ngaia n aron Ana mwioko te UEA nakoni Moote.
6A kanim'aki atiibu aika oniki, n tein te b'ai ni katamaroa te koora: ao a karauaki ni koreaki i aoia n tatabeua nako araia natin Iakob'a ake mm'aane ake tengaun ma uoman.
7A katikui i aon b'ain aonnangan te ebota b'a oneani mwiia barongan Iteraera ake tengaun ma uoman, n aron Ana mwioko te UEA nakon Moote.
Karaoan Te Ub'a(Te Oti 28.15-30)8A karaoa naba te ub'a ni b'aai ake e karaoaki mai iai te ebota, ao ti te arona naba katamaroaia.
9E bon tikuea, ao e oteaki uoua te tai, uabwi ma uoua te tientemiita ab'akina, ao uabwi ma uoua te tientemiita raababana.
10Ao a kanim aua te rinan te koora i aona; te moan rinan bon te tarerio, tobati, ao te kabangkoro.
11Te kauoua n rinan bon te timaraketo, te tabeiro, ao te taiman.
12Te katenua n rinan, te uakinto, te akete, ao te ametuteto.
13Ao te kaaua n rinan bon te beruro, te oniki, ao te iatebi.
14A koreaki i aon atiibu ake tebwi ma uoua araia natin Iakob'a ake tengaun ma uoman; temanna i aon teuana te atiibu b'a kaanga onean mwiia barongan Iteraera ake tengaun ma uabaronga.
15A karaoa te tiein man te koora ae itiaki ae e biraki n ai aron te koora b'a b'ain te ub'a.
16A karaoi uoua b'ai ni katamaroa koora, ao uoua kaanga taiani m'am'a, ao a kanimwi m'aam'a ake uoua nakon tabon te ub'a ake mai eta.
17A kabaei taiani kora ake koora nakon taiani m'am'a ake uoua,
18ao tabon koora ake uoua nakon taiani b'ai ni katamaroa ake uoua. Ao a kabaei n aron aei mai moana nakon tabonangan aon te ebota.
19Ao a karaoi riki uoua taiani m'am'a koora, ao a kabaei ma tabon koonan te ub'a ake mai nano i aon te mataniwi are i nanona are i akuun te ebota.
20A karaoi riki uoua m'aam'a koora, ao a kanim ma m'akoron te ebota are mai nano i matan b'ain aon te anga ake uoua, i rarikin te kabaea n nuuka i etan te roo are rarangaaki raoi.
21Ao a kabaea m'am'an te ub'a nakon m'am'an te ebota n te karai ae e buruu, n te aro are e na wene raoi te ub'a i aon te bare n aki matanatana.
Karaoan Riki Aia Kunnikai Ibonga(Te Oti 28.31-43)22E karaoaki te kunnikai are e ri aan te ebota man te buraentiibu ae e buruu ni kabane.
23E karaoaki mataniwiina ni kaitaraa b'angab'angan te roroa n te aro ae e na matoatoa n aki kakai raeuaaki.
24A kanim taiani bamkuranete aika rinen aika a raraoi ma buraentiibu
25aika a buruu, uraro, ao a uraura ni kaai marenaaki n taiani beero aika koora aika raneanea,
26n aron are e a tia ni mwiokoaki iai Moote iroun te UEA.
27Ao a karaoi kabaraaki i bukin Aaron, ma natina mm'aane,
28ao taian rabuna n atuu, b'ara, kawaerake aika rinen,
29ao te kabae ae e karaoaki man te rinen ae e raoiroi, ao te buraentiibu ae e buruu, uraro, ao ae e uraura, ao e katamaroaaki n aron mwiokoan Moote iroun te UEA.
30Ao a karaoa te b'ai ni katamaroa, ae te kanikina ae e tabu man te koora ae raneanea, ao a korea i aona ae e kaangai, Ana b'ai te UEA
31Ao a kabaea i moan te rabuna n atuu n te karai ae e buruu n aron Ana mwioko te UEA nakoni Moote.
Tian Raoi Te M'akuri(Te Oti 35.10-19)32Ao e a tia raoi te m'akuri i aon Ana Um'antabunrianna te UEA. A karaoi b'aai ni kabane Iteraera n aron are E a tia te UEA ni mwiokoa iai Moote.
33Ao a uota te Um'antabunrianna ma b'aina ni kabane, te matau, kaina ake a bangaki, bouana, ao kainteina;
34te rabuna are kunin te tiibu mm'aane ae katamaroaaki n te uraura; te rabuna are kunin te man ae e raoiroi; te keeten;
35te Atiniberita are e mena iai te atiibu ni koroboki, taiani kai n amoamo ao matana,
36te taibora ma b'aina nako, ao te kariki are te angab'ai nakon te Atua;
37kaintein te taura are te koora ae itiaki, taurana ma b'aina nako, ao b'aan te taura;
38te baonikarea are te koora; te b'aa ni katabutabu; te b'ai ni kaboiarara; keetenin mataroan te Um'antabunrianna;
39te baonikarea are te buraonti ma warawarana naba are te buraonti, kain amoana ma b'aina ni kabane; beetin ao nangoaia;
40keetenin te oo ma bouana, ao aaia, ao te keeten i bukin oon mataroana, ma roobuna; beken te Um'antabunrianna; ao b'aai ni kabane ake a na kabonganaaki n te Um'antabunrianna;
41ao te kunnikai ae e tamaroa are a na kamanena i nanon te Tabo are e Tabu, kunnikai aika a tabu i bukin Aaron are te ibonga, ao natina mm'aane.
42Ao a tia ni karaoi m'akuri ni kabane Iteraera n aron are E mwiokoaki iai Moote iroun te UEA.
43Ao e tuoi b'aai nako Moote, ao e nooria b'a a tia ni karaoi n aron Ana mwioko te UEA. Ma ngaia are, E a taetae ni kakab'aiaia Moote.
Who We AreWhat We EelieveWhat We Do
2025 by iamachristian.org,Inc All rights reserved.
