Warekaia Iteraera 8 - Kiribati New Version Bible

Katokaan Te Taura Te Koora ni Nnena iroun Aaron

1Ao e taku te UEA nakoni Moote,

2“Ko na tuanga Aaron b'a e na katokai taura ake koora i aon kaintein te taura b'a aonga n oota nako mooa.”

3Ao e ongotaeka Aaron, ao e katokai taura n aron tuangana.

4E karaoi kaintein te taura man te koora ae e amanaki, ni moa mai oina ni karokoa taiani uee ake i taubukina, ni katotonga raoi te tamnei are E kab'arab'ara te UEA nakoni Moote.

Tuua I bukin Katabuaia Kanoan Rewi

5Ao E taku te UEA nakoni Moote:

6A na riai n itiaki i matau kanoan Rewi i m'aain are a waakina aia m'akuri n te Um'antabunrianna. Ma ngaia are, ko na kaokoroia mai buakoia Iteraera, ao

7tatauriia n te ran ae na teboki aia bure ni kanakoi. Ao tuangiia b'a a na imana rab'ataia ni kabane ma n uatii kunnikaia.

8A na uota mai te kao mm'aane, ao te uita are te karea ni koaua, are te buraawa ae renganaki ma b'aan te oriwa. Ao a na manga uota mai te kao mm'aane are te kauoman b'a te karea ni kab'arai bure.

9Ao i mwiina, ko na weteia ni bootia Iteraera ni kabane ngkoe Moote, ao ko na kanakoia kanoan Rewi nakon te Um'antabunrianna,

10ike a na katokai iai baiia aomata i aoiia.

11Ao Aaron, e na kairiia kanoan Rewi nako Iu, b'a kaanga aia b'aintangira aomata nako Iu, b'a aonga ni karaoa Au m'akuri kanoan Rewi.

12Ao i mwiin aei, ao a na manga katokai baiia kanoan Rewi i aon atun te kaomm'aane. Ao i mwiina, e na kareanaki temanna te kaomm'aane b'a te karea ni kab'ara bure, ao are temanna, b'a te karea are kakukureiau.

13Ao a na tei kanoan Rewi i rarikin Au baonikarea i matan Aaron ma natina mm'aane, ake a na katabuia kanoan Rewi nako Iu.

14E na kateretereaki n te botaki aei b'a a kaokoro kanoan Rewi ma Iteraera, b'a a riki b'a au b'ai i bukin te itera teuana.

15Ao ngkana a tia ni kariaiakaki ma ni kaitiakaki, ao a tib'a kariaiakaki ni m'akuri n au Um'antabunrianna.

16A riki b'a au b'ai, ao a riki naba b'a oneani mwiia natiia Iteraera ake karimoa mm'aane.

17Ngke I tiringiia ngkoa aia karimoa mm'aane aika kaain Aikubita, ao bon anne naba te tai are I baaireia iai b'a N na b'ainiia natiia utuun nako Iteraera aika karimoa mm'aane, ao ai uana naba ma karimoa mm'aane n aia nanai n tiibu ma kooti, ao aia nanai ni kao.

18Ma, I a tia ngkai n rineia kanoan Rewi b'a oneani mwiia karimoa mm'aane,

19ao I a tia ni manga anga ngaiia b'a b'aintangira nakon Aaron ma natina mm'aane b'a a na m'akuri n te Um'antabunrianna, ao a na reke naba kamauraia Iteraera man te rekenikai ngkana a kuba ni kaaniia te Um'antabunrianna.

20Ao e tararuaaki raoi aia m'akuri kanoan Rewi irouni Moote, Aaron, ao Iteraera ni kabane b'a a aonga ni karaoi raoi tabeia n aron are E a tia ni baaireia te UEA.

21Ao a tatauriia kanoan Rewi i bon i rouia n te ran ni kab'ara bure, ao a uati kunnikaia. Ao i mwiina, e kairiia Aaron nakon te baonikarea, ao e anga te karea i bukin kab'araan aia bure, ao e karaoia b'a a na kariaiakaki ni karaoan Ana m'akuri te UEA.

22Ao i mwiin aei, ao a m'akuri kanoan Rewi n te Um'antabunrianna b'a taan i buobuoki nakon Aaron ma natina mm'aane n ai aron are E a tia ni baaireia te UEA.

23Ao E taku naba te UEA nakoni Moote,

24“A na kona ni m'akuri n te Um'antabunrianna kanoan Rewi akana mena aia ririki ni maiu i marenan 25 ao 50.

25Ma n te tai are a roko iai n te 50 aia ririki, ao a na ritaea.

26A kona ni buokiia raoia akana tabeman n tabeia, ma a nang aki kariaiakaki n te m'akuri. Ko na ururinga aei ngkana ko anganiia.