Ieremia 40 - Kiribati New Version Bible

Kainaomataakin Ieremia

1Ao I kairaki nako ma kabaeau taian tiein n reitaki ma kaain Iuta ao kaain Ierutarem ake a uotaki nako ngkoa nako B'aburon. Bon te aobitia Nebutaratan ae e tararuaia taan tei, ao E kainaomataai te UEA ngke ti a roko i Ram'a.

2E taku Nebutaratan:

Ieremia, E kauringiia am aomata te UEA ae te Atua b'a E na karokoa te kangaanga i aon te aba aei.

3Ma a bon teimatoa ni kakaitaraa, ao ngkai E a katuaaia n aron are E a tia n taekinna.

4N nang kanakoi ngkai taian tiein mai baim ao N na kainaomatako! Ko konaa n irai nako B'aburon ngkana ko tangiria, b'a N na nooria raoi b'a ko bon tararuaaki raoi. Ngkana ko kan tiku ikai, ko konaa ni karaoa ane ko bon taku.

5E a tia Nebukaneta n rinea Ketaria b'a e na tautaeka i aon Iuta. Ko konaa ni maeka i rarikin Ketaria, ao e na karekei b'aai ni kabane i bukim, ke ko konaa ni maeka n te tabo ane ko tangiria.

I mwiin anne, e anganai au tianaki te am'arake ao e kanakoai.

6I iangoia b'a N na tiku i rarikiia kaain Iuta, ao I nako ni maeka i rarikin Ketaria i Mitib'a.

Karokoan Uaan Te Tai

7Iai tabeman aobitian Iuta ao tautiana aika a aki kataenikaiaki. A ongo b'a e a tia uean B'aburon n rinea Ketaria b'a e na tautaekana Iuta ma n tararuaia aomata ni kabane aika a aki uotaki nako B'aburon, ma koraki ake a kainano n te aba arei.

8Ma ngaia are, a m'ananga aia mm'aane Itimaera natin Netania te mm'aane, ma natin Ioanan are natin Karea te mm'aane, ma Teraia are natin Tanumeta te mm'aane, natin Eb'ai mm'aane are kaain Netob'a, ao Ietania mai Maaka ni kawara Ketaria i Mitib'a.

9Ao e taku Ketaria nako iu, “Ko aki riai ni maakuia kaain B'aburon. Bon akea te b'ai e konaa n riki nakoim, ko na maiu raoi ma n ongotaeka i roun te Uea are Nebukaneta.

10N na tiku ngai ikai i Mitib'a b'a N na mamaroroo ma aobitian B'aburon ni katoa rokoia. Ma ngkoe ko na nako n okira am kaawa nako ma n uotaamai uaan te tai, ao i mwiina, ko kaawakina te wain, b'aan te oriwa, ao taian uanikai aika a m'au.”

11I nanon te tai anne, a bane n ongo Iteraera ake a mena i Moaba, Ammon, Etom, ao n aaba ake tabeua ae e a tia uean B'aburon ni kariaia tabeman Iteraera b'a a na tiku i Iuta ao e karika Ketaria b'a aia tia tautaeka.

12Ma ngaia are, a kiitan taabo ake a uamaaenako iai, ao a okira Iuta. A roko i roun Ketaria i Mitib'a, ao a taia te wain ma te uanikai ae e korakora.

Tiringakin Ketaria

13N te bong teuana, e bootaki Ioanan ma tabeman mm'aane ake tekorakina ake a tia n riki b'a aobitia n te taanga ni buaka, ao a roko ni kawara Ketaria i Mitib'a.

14Ao a taku, “Ketaria, ti roko ni kauringko b'a e a tia Uean Ammon are Baariti ni kabooa Itimaera b'a e na tiringko!”

Ma e aki kakoauaia Ketaria,

15Ma ngaia are, e m'ananga Ioanan ni kawara Ketaria ao e karabaa n taetae ma ngaia ao e taku, “Kariaiai b'a N na tiringa Itimaera. Bon akea ae e konaa n ataia b'a antai ae e karaoia. Bon ti tabeman nikiraia aomata aika a tiku i Iuta, ao a bane n onimakiniko. Ao ngkana ko tiringaki, Ao a na manga maaenako ke a na tiringaki, ngkana ko tiringaki.”

16E kaeka Ketaria ni kaangai, “Ko na aki tiringa Itimaera! E bon aki koaua rongorongona ane ko taekinna.”