2.Tamuera 23 - Kiribati New Version Bible

Ana Kabanea N Taeka Tawita

1Aikai ana kabanea n taeka

Tawita are natin Iete te m'aane.

E rinea Tawita Atuan Iakob'a

ao E karikia b'a te uea ae e kakannato.

E tangiraki Iroun

te Atua Iteraera ae E M'aaka.

E taku Tawita ngke E taetae te Atua nakoina:

2E a tia Tamnein te UEA

n tuangai te b'ai ae N na taekinna.

3E taku nako iu Atuan Iakob'a

Au b'a ae e korakora,

E karaoa ae e raoiroi

te tia tautaeka ae e ongotaeka nakon te Atua

4kaanga ootan taai

i nanon bongin te riringa,

ke kaanga te karau ae raneanea

i aon te uteute.”

5I a tia n tautaeka n te aro aei,

ao E na bon aki kona n urua

Ana berita nako iu.

E a tab'anin raoi ana berita te Atua

ao E aki konaa ni manga bitaki;

E na bon teimatoa ni buokai

ma n anganai te b'ai ae I kantaningaia.

6Ma a rebenako aomata aika a buakaka

kaanga ingin kaai aika a kateketeke.

A aki konaa n tauaki n te bai,

7ma a kabuokaki ni nneia

n te kainiwai ae e kakang.

Taani Buaka Ake Teniman(1 Rongo 11.10-19)

8Aikai araia ana taani buaka Tawita:

Iatiobeam natin Akemon te m'aane bon te tia kairiiri mairouia taani buaka ake teniman. E tiringiia wanibubua te m'aane n te buaka n ana kainiwai.

9Te kauoman mai buakoia taani buaka ake teniman bon Ereata are natin Toto te m'aane are kaain Aoa. N te tai teuana ngke a buaka kaain Biritia ma Iteraera, ao a kakaewenakoia Iteraera ngaia ma Tawita b'a a na bo ma ngaiia. A biri nako tautian Iteraera mairouia kaain Biritia,

10ao bon ti nikirana Ereata. E tiringiia kaain Biritia ni karokoa ae e rangi ni matoatoa baina n taua ana kabaang. Ao e a toki ana buaka Ereata, akea riki te b'ai ae a na manga karaoia ana taanga ni buaka Iteraera b'a a na ti okirikaaki n anai aia b'ai ni buaka aia kairiribai ma kunnikaia ni buaka. E a tia te UEA n angan Iteraera te tokanikai ae e kakannato n te bong anne.

11Are i mwiina, bon Tiamma are natin Akee te m'aane are kaain Ara. N te tai teuana a bootia aia taanga ni buaka kaain Biritia b'a a na urui taian uaanikai nako ake a maiu n te tawaana teuana i rarikin Rei. A biri nako angiia tautian Iteraera mairouia Iteraera,

12ma e tei Tiamma i nuukan te tawaana n tiringiia kaain Biritia. A aki mate taian aroka, ao E anga te tokanikai ae e korakora te UEA nakoia Iteraera.

13N te ririki teuana i nanon tain te tai, a m'ananga Taani Buaka ake Teniman b'a a na kawara Tawita n te tabo are Nanganangan B'aan Aturam. A tia ana taanga ni buaka Biritia ni katea aia kaemb'a ni M'aruan Rebaim

14ao e a tia n reke irouia Betereem. E mena Tawita i nanon ana nono,

15ao e a rangi n taka. Ao e taku, “Tera ngke reke nimau man ranin te m'anib'a are ni mataroan Betereem.”

16Ao a raba nako naba taani Buaka ake Teniman nakon aia kaemb'a kaain Biritia ao a anaa te ran man te m'anib'a are i rarikin mataroan Betereem. Ma ngke a tia ni uota te ran nakon Tawita, e a manga rawa n nimma. Ma e a manga kab'aroa b'a te karea

17ao e taku nakon te UEA, “I aki konaa n nima te ran aei! Bon raraaia m'aane aikai aika a anga maiuia ibuku.”

A karaoi m'akuri n ninikoria aikai Taani Buaka Aika Teniman aikai.

Taani Buaka Aika Teniman(1 Rongo 11.20-47)

18Bon te tia kairiiri irouia Taani Buaka ake Teningaun tarin Ioaba are Abitiai, ao n te buaka teuana e tiringiia tenibubua te m'aane n ana kainiwai. Bon te tia buaka ngaia ae tanoata taekana kaanga Taani Buaka ake Teniman

19ao ni koauana e bon roko naba tanoatan arana kaanga Taani Buaka ake Teningaun. Bon te kam'anta ngaia irouia Taani Buaka ake Teningaun, ma e bon tuai naba ma ni kaaina te Taanga ni Buaka ake Teniman.

20Bon te aomata ae e ninikoria Benaia are natin Ioiata te m'aane are man Kabeteera are e karaoi b'aai aika a kamimii. E tiringiia uoman ana taani buaka Moaba aika a bane aroia, ao ni bongin te kam'aitoro teuana e ruona b'angan te raian ao e tiringa te raian.

21N te tai teuana, e tiringa kaain Aikubita, ae e rangi ni buubura kaanga te aintoa. Iai ana kainiwai kaain Aikubita arei, ao bon akea te b'ai ae e uotia Benaia b'a ti te ambo. E rawea ana kainiwai kaain Aikubita arei Benaia ao e tiringnga iai.

22E karaoi baikai Benaia. E bon tuai man raoniia Taani Buaka ake Teniman,

23ma e bon roko naba kakannatona ni kakannatoia ni kabane Taani Buaka ake Teningaun. Ma Tawita e karikia b'a mataniwiia taan tararuaia.

24Aikai tabeman mai buakoia Taani Buaka ake Teningaun:

25Ataera are tarin Ioaba, Ereanan natin Toto te m'aane mai Betereem

26Tiamma mai Arota, Erika are kain Arota Ereti are kanoan Baretaite

27Ira are natin Iketi mai Tekoa, Abietera mai Anatota Mebunnai are kanoan Utia.

28Taremon are kanoan Aoa, Maarai mai Netob'a

29Ereba are natin B'aana te m'aane mai Netob'a, Itai are natin Ribaai te m'aane mai Kireata man te baronga are Beniamin

30Benaia mai Biraton, Itai man karaangan nako aon te Maunga are Kaati

31Abiarebon man Beta Arab'a, Atimaweta mai Baurim

32Eriaba mai Tiaarebon Iaten

33Ionatan are natin Tiamm'a te m'aane are kaain Ara

34Aiam are natin Tarara te m'aane are kaain Ara, Eribereta are natin Aatib'ai te m'aane mai Maaka

35Eriam are natin Aitobera te m'aane mai Kiro, Etiro mai Karemera ao B'aarai are kanoan Arabi

36Ikara are natin Natan te m'aane mai Tib'a, Bani are kanoan Kata ao Tereka mai Ammon

37Naarai mai Beerota, are e uouota ana b'ai ni buaka Ioaba are natin Teruia te m'aane

38Ira are kanoan Ietera, Kareb'a are kanoan Ietera ao ai Uria are kanoan Eta

39Bootaia ni kabane bon teningaun ma itiman.