1Ngkami akana kam raoiroi,
kam na kim'areirei i bukini baika E a tia ni karaoi te UEA;
neboia, ngkami aika kam ongeaba i rouna.
2Katituaraoa te UEA n tangin aabi;
Anene nakoina ma b'ai ni katangitang aika iai karaia.
3Anene nakoina n te anene ae boou;
Kaoti rabakaumi ni katanga te aabi, ao kanene b'anaami ni kim'areirei!
4A koaua ana taeka te UEA,
ao a onimakinaki ana m'akuri ni kabane.
5E tatangira te raoiroi ma te kaetitaeka ae riai te UEA;
ana Tangira ae teimatoa e kaona aonnaba.
6A karaoaki taiani karawa ma b'aai
nako ake a mena iai
n ana taeka te UEA.
7E boboti ranin marawa n te tabo ae ti teuana;
E kain taiani marawa i nanon ruu.
8A na bane aonnaba n taromauria te UEA:
A na bane ni karinea kaain aonnaba!
9B'a E taetae, ao e riki aonnaba;
E tua, ao a riki b'aai.
10E uru aia iango botannaomata te UEA ake a tia ni bairei b'a a na karaoi,
Ao E tukiia b'a a na aki kakoroi bukiia.
11Ma a teimatoa n aki toki ana baire,
Ao a aki kona ni bibitaki.
12E a kab'aia te botannaomata ae Atuana te UEA;
A kab'aia aomata akana E rineia b'a ana b'ai.
13E tara aonnaba te UEA mai karawa,
ao E noriia aomata nako.
14E taraia aomata ni kabaneia ake a maeka i aonnaba man ana tabo are
E tekateka iai ngkai te Uea n tii Ngaia.
15E angania te iango,
Ao E atai baika a karaoi.
16E aki tokanikai te uea i bukina b'a e korakora ana taanga ni buaka;
Ao e aki tokanikai te tautia i bukini korakorana.
17A aki onimakinaki aoti b'a a na karekea te tokanikai n tain te buaka:
A aki kona ni kamaiua te aba ni korakoraia ae bati.
18Ma te UEA, E tatarataraiia akana karinea,
Akana onimakina ana tangira ae teimatoa.
19E kawakinia man te mate;
Ao E kamaiuia n tain te rongo.
20A tiku ara kaantaninga iroun te UEA;
Boni Ngaia otangara ao buokara.
21A kim'areirei nanora i rouna,
B'a kioina ngkai ti onimakina arana ae tabu.
22E na memena am Tangira ae Teimatoa i aora te UEA,
Ngkai a tiku ara kaantaninga i Roum.
Who We AreWhat We EelieveWhat We Do
2025 by iamachristian.org,Inc All rights reserved.
