1Ao a rangi ni m'aiti aia nanai ni kao ao n tiibu baronga ake Reuben, ao Kata, ao a nooria b'a a rangi n raraoi uteuten te aba are Iatera ma te aba are Kireata.
2Ma ngaia are, a nakon Moote ma Ereata, ao taani kairiri i rouia Iteraera, ao a taku,
3“E a tia te UEA ni buokiira ni karekei aaba aika i rarikin kaawa aika Atarota, Ribon, Iatera, Nimra, Etibon, Ereare, Tebam, Nebo, ao Beon.
4Bon taian aba aika a raoiroi uteuteia, ao ngaira a rangi ni m'aiti ara nanai ni kao, ao n tiibu,
5Ko kona ni kariaia b'a ti na tiku ikai i mainikun te karaanga are te Ioretan ma ni b'aina te aba aei?”
6Ao e kaeka Moote:
Are nanona b'a kam nang tiku ikai, ao nikiraia Iteraera a na nako ni buaka?
7Ngkana kam karaoa anne, ao e na bon riki b'a te kab'aranano nakoia tabem'aang, ao a na aki ri nanon te Ioretan nakon te aba are E berita iai te UEA nako ia.
8Bon aei te b'ai are riki ngke I kanakoia ami bakatibu mai Kateti B'aanea b'a a na tuoa te aba.
9A nako ni karokoa te M'arua are Etikora, ao a okirikaaki ma n tuangiia aomata b'a ti na aki rin n te aba.
10E rangi n un te UEA.
11Ao E taku b'a bon akea temanna mai buakoia aomata aika a koro 20 aia ririki ni maiu ngke a kitana Aikubita ae na rin n te aba are E a tia ni berita iai nakon Aberaam, Itaaka, ao Iakob'a. Akea temanna maibuakoia aomata aikai ae onimakina m'aakan te UEA,
12ma bon ti Kareb'a ao Iotua. A teimatoa ni kakaonimaki nakon te UEA,
13ma E rangi n un irouia ake tabeman n te aro are E a kanakoia b'a a na tiotio nako n te rereua i nanon 40 te ririki. I m'aain te tai anne, a bane n tia ni mate aomata ake a tia ni bure nako Ina.
14Ao ngkai kam a manga karaoa naba te aro arei ngkami aomatan Reuben ao Kata; kam a rangi ni kauna riki te UEA.
15Ngkana kam katinanikua te UEA, ao E na manga kitaniia riki Ana aomata, ma ni katikuia ikai i nanon te rereua. Ao boni ngkami aika kam na bukinaki!
16Ao a kaeka m'anen Reuben ma Kata:
Kariaia b'a ti na karaoi nneia ara tiibu ao ara kooti, ao aia kaawa buura ma natira,
17ike a na kona n tiku iai ma ni kawakinaki raoi iai. Ao i mwiina, ti na katauraoi nakon te buaka, ma ni kairiia baronga ake tabeua nakon te buaka.
18Ti na tiku ma ngaiia ni karokoa a tekateka raoi i nanon abaia ni baronga.
19E na riki te aba ae n iteran te Karaanga are te Ioretan aei b'a abara, ao ti aki manga tangira abara n te itera ane teuana.
20Ao E taku Moote:
Kam bon berita b'a kam tauraoi ni buaka i bukin te UEA.
21Kam kariaia naba b'a kam na ri aon te Ioretan n iriia nikiraia Iteraera, ni karokoa te tai are E na kakioia nako iai kairiribai te UEA man te aba? Ngkana kam karaoi baikai,
22ao ngkana E tia te UEA ni buokiia Iteraera n taui aaba, ao kam a kona ngkanne n okira abami ngkana kam tangiria.
23Ma ngkana kam aki kakoroa bukin ami berita, ao kam na bure iai nakon te UEA, ao kam na katuaaeaki.
24Naako waakina ngkai karaoan aia kaawa buumi ma ami ataei, ao nneia ami tiibu ma ami kooti. Ma kam na ti karaoa te b'ai are kam a tia ni berita iai.
25Ao a kaeka m'anen Reuben ma Kata:
Teuae ko karineaki, Ti na bon karaoi baika ko a tia n taekin.
26A na tiku buura ma natira ao ara tiibu ma ara kao ikai ni kaawan Kireata.
27Ma ti na waaki nako ngaira aika ti a tauraoi nakon te buaka n ri aon te Ioretan nakon Ana buaka te UEA.
28Ao e taku Moote nakon Ereata, Iotua, ao mataniwiia utu,
29“Kam riai ni kakoaua raoi b'a a tauraoi n iringkami nakon te buaka ma n ri aon te karaanga are te Ioretan te baronga are Reuben ma Kata. B'a ngkana a karaoa anne, ao ngkana kam a tia taui aaba nako, ao kam na anganiia te aba are Kireata b'a aban aia baronga.
30Ma ngkana a urua aia berita, ao a na ti karekeaki abaia n iteran te Ioretan are teuana, ni bon aekakiia naba baronga ake tabeua.”
31Ao a kaeka baronga ake Kata ao Reuben ao a taku, “Bon am toro ngaira, ao ti na karaoi b'aai ni kabane akana E mwiokoira iai te UEA.
32Ti na ri aon te Ioretan, ao ti tauraoi ni buaka i bukin te UEA i Kanaan. Ma ti tangira te aba ae man te itera aei b'a e na riki b'a abara.”
33Ma ngaia are, e anga Moote taian aba ma kaawa ake a tautaekanaki iroun uean Amora are te uea are Taion, ao aaba ma kaawa naba ake a tia n tautaekanaki iroun te uea are Oka are uean Batian nakoia te baronga are Kata, Reuben, ao iteran Manate:
34A manga katei kaawa ake Ribon, Atora, Aroera,
35Aterota Tioban, Iatera, Iokebea,
36Beta Nimra, ao Beta Aran. A katei naba taian oo ni katobibiia, ao a karaoi naba taian tabo ike a na kaawakin iai aia tiibu ma aia kooti.
37Ao te baronga are Reuben, a manga karaoi kaawa aika Etibon, Ereare, Kiriataim,
38Tibema, ao ai uana naba ma kaawa aika a ataaki n araia ngkoa aika Nebo, ao B'aara Meon. A manga bitii aran taabo aikai.
39Ao e nako te kaainga are Makira are man te baronga are Manate mai mainiku nakon te tabo are Kireata, a taua te kaawa, ma ni kakioia nako kaain Amora.
40Ma ngaia are, e a anga te tabo are Kireata Moote nakon kaaingan Makira, ao a tekateka ikekei.
41Ao Iaira are man te baronga are Manate, boni ngaia are e taui taiani kaawa, ao e a manga bitii araia nakon “Kaawan Iaira.”
42Ao Nob'a, e taua te tabo are Kenata ma kaawana ao e aranna b'a Nob'a.
Who We AreWhat We EelieveWhat We Do
2025 by iamachristian.org,Inc All rights reserved.
