1.Rongorongo 29 - Kiribati New Version Bible

B'aintangira I bukin Karaoan te Tembora

1E taku Tawita nako ia aomata:

E rinea natiu te m'aane are Toromon te Atua b'a e na katea te Tembora, ma e uarereke Toromon ao e tuai rabakau ni kateitei. Tiaki te auti n aki akaaka te auti aei b'a bon ana Tembora te UEA ae te Atua!

2Ao bon anne bukina are I kabanea iai korakorau ni katauraoi b'aai ni kabane n aron te koora, te tirewa, te buraonti, te biti, te kai, atiibu aika a boobuaka, atiibu aika a bati mataia, ao atiibu ni kabane aika a tamaroa, ao maabora, aika e na kainanoi Toromon ngkana e a waakina karaoan te Tembora.

3I rarikin karaoan baikai ni kabane, ao I a tia ni berita b'a n na anga iteran au koora ma au tirewa b'a kaotan nanou i bukin karaoan ana Tembora te UEA.

4E kaaniia tebubua te tan te koora ni koaua ao e raka i aon uabubua abwi te tan te tirewa ake a na kabonganaaki i bukin katamaroaan te oo

5ao i bukin karaoan b'aai aika koora ao b'aai aika tirewa. Antai riki ae e konaa ni kaota banen nanona iroun te UEA n anga ana b'aintangira i bukin katean ana Tembora?

6Ao ngke e a bane ana taeka Tawita, a anga aia b'aintangira taani kairiiri man taiani utu, taani kairiiri man taiani baronga, taani kairiiri man taian taanga ni buaka, ao mataniwi n te tautaeka

7nakon te Tembora ma te kukurei n nano. Bootan taian b'aintangira aikai e kaaniia 170 te tan te koora, tenibubua abwi te tan te tirewa, ao 620 te tan te buraonti, ao e raka i aon 3,400 te tan te biti.

8Ao a bane n anganano aomata nako ake iai aia atiibu aika a tamaroa b'a kaub'ain te Tembora are e tararuaaki iroun Ieira are kanoan Rewi man te kaainga are Kerition.

9Ao e rangi ni kukurei Tawita ma aomata b'a a tia n anga ae rangi ni m'aiti nakon te UEA, ao a rangi ni kakatonga.

Neboan te UEA iroun Tawita

10Ao e anenea te anene n nebo nakon te UEA Tawita i mataia aomata ni kabane:

I neboiko n taai nako, te UEA! Bon te Atua ngkoe are ko tataromauriaki iroun ara bakatibu are Iakob'a

11E korakora m'aakam, ao e noraki mimitongim n taabo ni kabane i karawa ao i aonaaba,

12ao ko tautaeka ma te m'aaka ao e tanoata taekam.

13Ti karab'ako, Atuara, ao ti neboiko.

14Ma e aera ngkai ti na kukurei ngkai ti a tia n anganiko b'aintangira aikai? Bon am b'ai baikai, ao ti a manga kaoki nakoim ngke bon am b'ai.

15Bon iruwa ngaira aika ti maeka tabeua te tai n te aonnaba aei, n ai aroia ara bakatibu. Ti na manga bon waekoa n nako, n ai aron te nuu ae e waekoa ni mauna nako.

16Te UEA ae Atuara, ti uotimai b'aai aikai ni kabane i bukin katean am Tembora are b'ain neboam. Bon am b'ai, ake ko anganiira.

17Ma ti kukurei b'a a tia aomata ni kabane n anganano ni baikai. Ko bon atai nanoia aomata ni kabane, ao ko boni kukurei ngkana a karaoa ae e raoiroi aomata nako.

18Karaoira b'a ti na kan angaanga, ao buokiira b'a ti na kakaonimaki nakoim, n ai aroia ara bakatibu ake Aberaam, Itaaka, ao Iakob'a ake a kakaonimaki n taromauriiko.

19Angan Toromon te nano ni kan ongotaeka nakon am tua ma am reirei ma nanona ni koaua, ao tangiran kan karaoan te Tembora ake I a tia ni katauraoi b'aintangira aikai i bukina.

20Ao e a manga taku Tawita nako ia aomata, “Ami tai ngkanne n neboa te UEA, are te Atua are a tataromauria ami bakatibu!” Ma ngaia are, a bane aomata n neboa te UEA, ao a bobaraaki ni karinea ma aia uea are Tawita.

Katokaan ana Baunuea Toromon ni Kaueaaki

21N te bong are i mwiina, ao a tiringiia 1,000 taiani kaom'aane, 1,000 te tiibum'aane, ao 1,000 te tiibuteteei, ao a anga b'a aia karea i bukin kakukureian te UEA, n ikotaki naba ma karea ake taiani wain.

22Ao a rangi ni kukurei aomata, ao a am'arake ma ni mooi ikekei i rarikin ana baonikarea te UEA.

N te bong naba anne, ao e a katokaaki ana baunuea Toromon ni kaueaaki. Ao a bane ni kukurei aomata ao e kab'aroaki te b'a i aon atuun Toromon ni kaotia b'a e na manga uea. Ao e kab'aroaki naba te b'a i aon atuun Tatoka ni kaotia b'a ngaia ngkai aia ibonga.

23Ma ngaia are, e a manga uea Toromon i mwiin Tawita are tamana. Ao e totokanikai Toromon ni b'aai ni kabane ake e karaoi, ao a bane Iteraera n ongotaeka i rouna.

24Ao a bane mataniwi n te bareti ao tautia, n reitaki naba ma natin Tawita m'aane ake tabeman, ni kakaonimaki nakoina.

25E karaoa Toromon te UEA b'a te uea ae e kakannato, ao a bane botannaomata ni kabane ni mimi n tanoatan taekana. N te koaua, ao bon akea uean Iteraera ae ai aron kakannaton Toromon.

Maten Tawita

26E uea Tawita are natin Iete te m'aane i aon Iteraera

27i nanon 40 te ririki. E tautaeka mai Eberon i nanon itiua te ririki ao e tautaeka mai Ierutarem i nanon 33 te ririki.

28E rangi ni kaub'ai Tawita mani karineaki ao e maiu ni karokoa e a kara. I mwiin matena, ao e a manga uea natina te m'aane are Toromon.

29A koreaki naba mwiin b'aai ni kabane ake e karaoi Tawita i nanon ana tai ni uea n te rongorongo are a koreia burabeti ake Tamuera, Natan, ao Kata.

30A korea rongorongon korakoran ana tautaeka ao taekan b'aai ni kabane ake a riki tiaki ti nakoina, ma nakon naba Iteraera ao botannaomata ake tekorakina.