1Kam wanawana ngkana kam kariaia kaetakim,
ao ngkana kam rawa ao kam bon nanobaba.
2E tangiriia aomata nako te UEA
akana a maiuakina te raoiroi,
ma e katuaaia aomata nako
akana a karaoi taiani babaaire aika a buakaka.
3E aki konaa n reke te teimatoa man te bure!
ma ngkana kam maiuakina te raoiroi,
ao kam na kateimatoaki
kaanga ai aron te aroka ae e nene wakaana.
4Bon te atiibu ae e tamaroa nakon buuna
te ainenum'a ae e i buobuoki
ma te ainenum'a ae e kamamaaea buuna
e na bon kamkaa riin buuna.
5A iango n akoi aomata aika a raoiroi,
ma kam na bon aki onimakina
ana reirei te aomata ae e buakaka.
6Te reirei ae e buakaka bon te kainikab'aru ae e kamaamate,
ma te reirei ae e raoiroi
kaanga ai aron te otanga.
7N te tai are a konaaki iai aomata aika a buakaka
ao ai bon anne naba tokiia n aki toki,
ma bon akea ae e ongotaeka iroun te Atua
ae e na karenakoaki.
8E manena te iangoraoi n te nebonebo,
ma te nanobaba bon te kamaraia nakoia aomata aika a nanobaba.
9E raoiroi riki ngkana boni kaangai naba ngkami
b'a ti temanna ami tia m'akuri
nakon ae kam na iangoia b'a kam rangi ni kakannato
ao kam a mate ni baki.
10A akoi aomata aika a raoiroi
nakoia aia man,
ma e iowawa te aomata ae e buakaka.
11A m'aiti i aon ae e riai kanaia
taani ununiki aika a m'akuri korakora,
ao taani mimiiroaroa
boni kaanga taian nanobaba aika a kabitaia.
12E kataia ni karabaa te aomata ae e buakaka
i akuun te buakaka;
kaanga ai aron taian aroka aika a nene wakaaia
aomata aika a raoiroi.
13Ti boni kam'aneira i bon iroura
ngkana ti taekina te kewe,
ma ngkana ti maeka ma te raoiroi
ao ti bon kararoaira iai ma te kiriwe.
14Ti bon anganaki kaniwangara ke ti katuaaeaki
ni b'aai ake ti taekin mani karaoi.
15A taku aomata aika a nanobaba
b'a e raoiroi maiuia,
ma e kakauongo raoi nakon taeka n reirei
te aomata ae e iangoraoi.
16Bon te aro n nanobaba te aki konaa n taotaona unim;
ao te aro ni wanawana aki tabeakinan te kamaamaaeaki.
17E taekina te koaua n te bowi
te aomata ae e raoiroi,
ma bon akea te b'ai ae e na taekinna te aomata ae e buakaka
b'a ti te kewe n taai nako.
18E korokoro kaanga te kabaang te taeka ae akea nanoia,
ma e kamaiua te aba te taeka ni wanawana.
19Bon akea tokin te koaua,
a na bon waekoa n ataaki taiani kewe.
20E rangi ni kam'aam'ane te nano ae e b'anga ni kewe,
ma e uota te kukurei
te iango ae e tamaroa.
21A aki konaa n reke n te kangaanga aomata aika a raoiroi,
ma a rangi ni m'aiti aia kangaanga aomata aika taani kakiriwe.
22E ribaia taani kewe ni kabane te UEA
ma bon raoraoia aomata ni kabane
aika a onimakinaki.
23Kam na iangoraoi ao tai taekin
b'aai ni kabane akana kam atai
b'a bon taian nanobaba aika a touakina
te aro n nanobaba nakon taabo nako.
24M'akuri korakora, ao ane
kam na riki b'a taani kairiiri;
taningaroti, ao ane
kam na riki b'a toro.
25Te raraoma bon te uota ae e rawaawata,
ma e uota te kukurei n taai nako
te taeka ae e akoi.
26E raoiroi riki ngkana kam karaoa ae e raoiroi,
nakon ae kam na kabua kawaim
ni karaoan te kaairua.
27Ane e rangi n taningaroti ni kuuka
e na bon mate ni baki,
ma ane e m'akuri korakora
bon te kaub'ai ngaia ae moan te kakaawaki.
28Ira te kawai nakon te maiu
ao ane kam na aki katabeaiangaaki
n te mate.
Who We AreWhat We EelieveWhat We Do
2025 by iamachristian.org,Inc All rights reserved.
