Itaia 59 - Kiribati New Version Bible

Ribaakin Te Motibuaka

1E tuai ni bua

korakoran m'aakan te UEA;

E boni konaa naba n ongo

ao ni kaekai taiani tataro.

2A riki ami bure b'a taian totoko

i marenami ma Atuami.

Ao bon anne bukina are e aki

kaekai iai ami tataro

ke n aki iai noora matana.

3A onrake ami taeka n taiani kewe

ao ni iango n tiritiri;

a buta tabonibaia ni kabane

n te raraa.

4Kam bukiniia tem'angina n te aro ni kewe

ao kam taekina te kewe n te kabowi ni kaburebure;

araia natimi

boni buure ma kangaanga.

5Kam kang bunnatoin

taian naeta aika a rangi ni boitin,

ao a m'aiti riki naeta aika a aenako

man bunnatoia ake a uki.

Kam rarangai ngaon ten takareau,

6kam aki konaa ni karaoi taiani kunnikai

mani ngaon ten takareau aikai

ke ni karabaingkami i akuiia.

7Kam waetata nakon karaoan te kaairua

ke tiringan konami aika akea aia bure.

A akea riki te b'ai ae kam iaiangoia i rarikin te bure;

a tiku n urubekebeke taabo

akana kam kiitan.

8Kam aki ataa aron

te maiu i nanon te rau

ke karaoan ae e raoiroi nakoia tabem'aang.

A b'aoua taiani kawai aika kam karaoi;

ao e aki konaa n reke te rau irouia akana a iririingkami.

Aia Kab'arabure Aomata N Aia Bure

9Bon akea ae e a tia n roko n tei i bukira

ke ni uota te motiraoi nakoira.

Ti kaantaningaa bongin te oota,

ma e ti reke iroura

te rootongitong, ao te tairiki ae e ianroo.

10Ti kaenakoi baira ni kakaaea kawaira,

kaanga aroia aomata aika a matakii;

a toki waera ngke e tawanou,

kaanga ai aron ae e a bong.

Bon ti te arona ara taratara

ma te aomata ae e a mate.

11Ti kungkung kaanga taiani bea

ao ti tang kaanga taian taobe.

Ti kaantaningaa te eti ao te tokanikai,

ma a biri nako mairoura.

12Ai m'aitira te tai ae ti bure

ma n tannako mairoum

te UEA ae Atuara?

E a kabuakakaira ara bure nako!

Ti a tia ni karaoa ae e kaairua.

13Ti a tia ni kaaitarako ma n rawa

n iriko.

A iango n aonikai nanora,

ngaia are ti b'anga ni kewe iai;

ti babaairea aron kabuakakaia tem'aangina

ao ti rairaki nako mai roum.

14E mena te motibuaka n taabo nako;

E taraa n raroa nako te motiraoi.

E kakioaki nako te koaua man te boowi ni kaburebure;

e butuaki nako te raoiroi.

15A bane aomata n taekina te kewe;

tokiia akana a nako man te maiu ae e buakaka

bon te urubekebeke.

E na Kamaiuia Ana Aomata Te UEA

Ngkana e ataia te UEA

ae e a tia ni mauna te motiraoi,

ao E na bon aki kukurei iai.

16E na bon rangi n ribaaki riki i rouna

ngkana e ataia

ae akea

ae e konaa ni karaoa anne.

Ma ngaia are, e na bon karekea te tokanikai i bukin te koaua

n oin baina ae m'aaka.

17Ana taanga te UEA bon te motiraoi;

ao b'arana ni buaka bon te m'aaka ni kakamaiu;

kunnikaina bon

te un ma te irantaanga.

18E na rangi n un ngkai te UEA

ao e na karaoia nako ia aia kairiribai

ake a kaan ma ake a raroa

te b'ai naba are a karaoia nako ia ana Aomata.

19E na buaka kaanga te ieka

i nanon te angibuaka ae e korakora.

Ane a na karinea ma n neboa

arana ae e kamimii

botannaomata ake i maeao ao i mainiku.

20Boni Ngai ae te UEA ae I a tia ni berita b'a N na kamaiua

te kaawa are Tion

ao ana kariki Iakob'a

ake a rairaki man aia bure.

21E taku te UEA: “Au Aomata,

I berita b'a N na anga Tamneiu

ma au taeka.

E na riki aei b'a au b'aintangira nakoimi

ma ami utu n aki toki.

Bon aei au taeka Ngai ae te UEA.”