Itaia 57 - Kiribati New Version Bible

A Karawawataki Ana Aomata Te Atua Aika A Kakaonimaki

1A uaakinaki nako ma n tiringaki

ana Aomata te Atua aika a kakaonimaki,

ao bon akea temanna ae e tabe iai.

A kamaunaaki n te buakaka,

2ma e reke irouia te rau i nanon te mate

i bukin te ongotaeka iroun te Atua. E Kabuakaka Taromaurian Te Bouannanti Te UEA

3Aomata ngkami aika kam aki kakaonimaki!

Kam nako ia taani kaiwa

ao kam taromauri bouannanti.

Kakauongo raoi irou ngkai!

4Antai ae ko na b'ainikirinna?

Antai ae ko na kakanikoa?

An tarai moa am bure

aika kateinibabako.

5Ti te b'ai ae kam iaiangoia bon te wene ni bure

i aan taian aroka aika a mawaawa aikai

ike a mena iai ami bouannanti aika kam taataromauri.

Kam kareaniia natimi

i aon taiani baonikarea ake a karaoaki i nanon taian m'arua

i aan nanganangan b'aa.

6Kam a tia ni baaireia b'a kam na taromauri

taian bouannanti aika a karaoaki n taian atiibu;

Kam a tia n anganiia taian angab'ai ake

te wain ao te uita.

N na kukurei n anne?

7Kam a tia n taakin ami kainiwene

i aon taubukin maunga aika a rietaata,

ike kam angakarea iai nakon taian bouannanti.

8Ao kam a tia naba ni kaaki n ami auti nako

aia banna taiani beekan

ni katoobibia ami kainiwene nako.

Eng, kam a tia ni katinanikuai,

kam kabooa rab'atami nakoia ami tangira,

ao kam nako ni wene ma ngaia.

9Kam kabira baimi ni b'aan te oriwa

ao aekaki ni boiarara nako

ngkana kam taromauria te anti are Moreka.

Ao kam kakaea naba buokami

man tamneia aika a tia ni mate.

10E ngae ngke kam a bon kakuaingkami

ni kakiokioia taian bouannanti,

ma kam bon rawa naba n toki.

A rangi ni korakora nanomi

n te aro are kam bon waaki nako naba.

11Ko m'aninga taekau

ao ko a aki kakaonimaki

i bukina ngke ko maaka

te aomata temanna?

Tao I a tia n aki kakarongoa n te tai ae e maan

n te aro are ko a aki maakai?

12Tao ko taku b'a ko rangi n raoiroi,

ma N na kaota te koaua.

13Ko na bubutiia am bouannanti akanne

b'a a na buokiko ngkana ko a reke n te kangaanga.

Taratara raoi, e ti ukaki teutana n angin te wii

ao e a ubaranako naba.

Ma ngkana ko nako mai nako iu

ni kamanoko irou,

ao e na riki te aba aei ao au Maunga ae e Tabu aei

b'a am b'ai n aki toki.

E Buokiia Aika Akea Aroia Te UEA

14E taku te UEA,

“Kaitiaka te kawai!

Katauraoia i bukiia au aomata.”

15E maiu n aki toki Atuara

n taiani karawa,

ao aei ana taeka:

Ngke I maeka n ae e rietaata i eta

n te tabo ae e tabu,

ma I bon mena naba ikai b'a N na

buokiia aika nanorinano

aika a ti mwiokoai.

16au Aomata, e a toki uniu

ao I aki manga bukiningkami.

B'a bon te tia karikingkami Ngai.

I aki tangiringkami b'a e na b'ara nanomi

n te aro ae moan te korakora.

17E kamaraka nanou nanonrangim.

Ao bon anne bukina are I katuuaingkami iai

ao I ribaa rekeu iroumi,

i nanon ami tai n okiri

maiumi nikawai aika a bure.

18I a ataa arom!

Ma N na kamaiuko, N na kairiko,

ao N na anganiko te mweraoi,

ni karokoa te tai are a na anene n nebonebo

19koraki aika a tang

E aoria ngkana ko mena iai,

N na kamaiuko Ngai ae te UEA

ao N na anganiko te rau.

20Aomata aika a buakaka bon

naoni marawa aika akea motirawaia ao a kauekea te bokaboka.

21Ma I a tia ni berita Ngai ae te UEA

b'a bon akea temanna ae e buakaka

ae na maiu n te rau.