Itaia 42 - Kiribati New Version Bible

Ana Tia M'akuri Te UEA

1Aio au tia m'akuri!

I a tia ni kakorakoraa.

Bon au rinerine;

I kukurei i rouna.

I a tia n anganna Tamneiu,

ao e na uota te eti

nakoia botannaomata.

2E na aki takaarua ke n tang

ke ni weewete i nanon kawain nuukan te kaawa.

3E na bon aki otea naba te uteute ae manamana

ke ni kabuokia,

ma e na kakoaua raoi

b'a e na karaoaki ae eti.

4E na bon aki b'ara nanona ke ni kua

ni karokoa e roko raoi te eti

n te aonnaba ni kabane,

ao a kariaria botannaomata nako

nakon ana reirei.

5Bon te UEA Ngai ae te Atua.

I karaoi taiani karawa

kaanga te autinrianna ae e tangaina nako ieta.

I karaoa te aonnaba ma b'ai ni kabane aika a maiu i aona.

Boni Ngai boton te maiu

ni baika a maiu ni kabane n te aonnaba,

ma ngaia are, kakauongo nakon te b'ai ae I taekinna.

6I rineiko b'a ko na uota te eti,

ao I mena ikai i rarikim.

I rineiko ao I kanakoko

b'a ko na uota te oota

ao au berita i bukin te kaantaninga

nakoia botannaomata ni kabane.

7Kam na anga te noraaba

nakoia aika a matakii;

kam na kainaomataia buure

man taian karabuuti aika a roo.

8Arau bon te UEA!

N na bon aki kariaia taian bouannanti ke aomata

b'a a na ono ni mimitongiu ao neboau.

9A na roko b'aai ni kabane ake a tia n roko naba i m'aaina

n aron are I taku;

ao ngkai N nang katanoata are i mwiina.

Anene N Nebo Nakon Te UEA

10Tuanga te aonnaba ni kabane b'a e na anenea

te anene ae e boou nakon te UEA!

Tuangiia akana a ieie i marawa

ao akana a maeka n taabo aika a raroa

b'a a na ira te nebonebo.

11Tuangiia baronga akana n te rereua

ao aomata akana i aon taiani maunga

b'a a na bootaki ni kukurei ao n anene.

12Ke a katanoataa aron

neboana n taabo nako.

13E m'ananga n oti nako te UEA

kaanga te tia buaka ae e un,

ma ni kabanea takaaruana

ngke e tabe ni un ma ana kairiribai nako.

E Na Buokiia Ana Aomata Te UEA

14I a tia n tautaua marakin nanou

n te tai ae e maan Ngai ae te UEA;

ao ngkai N nang takaarua mani ngirangira

kanga te aine ae e ariri ni bung.

15N na kamaunai taiani maunga

ma b'aai ni kabane ake a maiu i aoia;

N na kaorai taiani karaanga ma taian nei.

16N na kairiia aomata i aon taiani kawai

aika a tuai atai;

N na kaawakiniia i nanon te kawai

aika a tuai man tootoua.

E roo kawaia ao e aobuaka,

ma n anga te oota

b'a a aonga n aki toki waeia.

Bon aei au berita ae e matoa.

17A na bane aomata aika a taromauriia taian bouannanti

b'a kaanga antiia

ni kamamaaeaki n ae moan te korakora.

A Aki Ongotaeka Ana Aomata Te Atua

18Kam bonotaninga ao kam matakii ngkami aika aomata,

ma e tuangngkami te UEA

b'a kam na kakauongo ma n taratara.

19Bon akea ae e matakii riki ke e bonotaninga riki nakon

ana tia uarongorongo,

are ana tia m'akuri are e rineaki,

20are e rangi n noraaba ao n raoiroi taningana,

ma e aki muuti.

21E kaakaraoa ae e raoiroi n taai nako te UEA,

ai ngaia are e tangira ana Tua

b'a e na rangi n neboaki.

22Ma a m'ane n te b'ainikam'ane ana aomata

ao a kabureaki n taiani b'angab'anga

aika akea ae konaa ni kamaiuia mai iai.

A uotaki nako aia b'ai ni kabane,

ao bon akea ae e kukurei

ni manga kaoki.

23E aera ngkai a rawa

ana aomata n kakauongo?

24E bubure Iteraera ao e rawa

n ongotaeka iroun te UEA

ke n aki iri ana babaaire.

Ma ngaia are, e karaoia te UEA b'a a na iraeaki

aia b'ai ni kabane.

25E a rangi ni un irouia

ao e katuuaia ana botannaomata

n taiani buaka aika a kabuebue.

Ma a bon aki tabe iai.

A bon aki naba tabe

ngkana a katobibiaki

ma n rootaki ni kabuebuen te ai.