Teb'ania 2 - Kiribati New Version Bible

Te Wewete Nakon te Raira n Nano

1Te botannaomata ae ko aki kukuba karekea nanom ae e raoiroi

2i m'ain ae ko ukaki nako n te ang n ai aron kunin te b'are, i m'ain rokon te bong are e na ura unin te UEA iai i aom.

3Okira te UEA ni kabane ngkami aika kain te aba aika kam nanorinano, ngkami aika kam kawakin Ana tua. Karaoa ae e riai ao nanorinano i matan te UEA, Antai ae e ataia ao e na reke nanoangami iroun te UEA.

B'akaia Tautaeka Ake I rarikin Iteraera

4Bon akea ae e na tiku i m'aiu i Kata. E na riki b'a te tabo ae akea kaina. Ana kanakoaki i Atitota n te tawanou ao aomatan Ekiron ana kanakoaki man aia kaawa.

5Ngkami i Biritia aika kam nimamate, ngkami aika kam maeka i rarikin taari E a tia bairean taekam iroun te UEA. E na tiringi ngkami, ao bon akea ae na tiku ni maiu.

6Abami ane i rarikin taari e na riki b'a nneia taan kawakin tiibu, ao nneia naba tiibu ni kawakinaki.

7Aomatan Iuta ake nikira ni maiu a na maekana te aba. Ana kam'arakeia aia nanai ikekei ao ana matu n autin Atikeron. Te UEA ae te Atua E na memena irouia ao E na manga kaoki kab'aiaia.

8E taku te UEA ae E m'aaka, “I a tia n ongo aia taeka I-Moaba ma I-Ammon ngke a tataboraaia man kaenaenaia au aomata, ao a kamoamoa b'a a na anaa abaia.

9Boni Ngai te UEA ae I maiu, te Atua ae kakawakiniia Iteraera ma ngaia ae I karaoa te berita ae e matoa b'a ana bon mate aomatan Moaba ma Ammon n ai aroia aomatan Totom ma Komora. “Ana riki abaia b'a te tabo ae e on n te kanib'anib'a n taoro ao e na bon akea ae e kona n ununiki iai. Ti uteute kain aona. Nikira ni maiu irouia au aomata a na anaa te aba anne mai nanon baiia i Moaba n te buaka, ma aia b'ai nako,” bon ana taeka te UEA.

10Ao anne aroia aomatan Moaba ma Ammon n oreaki i bukin aia kainikatonga ma aia taetae n aki akaaka nakoia ana aomata te Atua.

11Ana kab'ainrangaki iroun te UEA. E na kakerikaaki m'aakaia antiia te Atua ao ana riki n akea bonganaia. Ao botannaomata ana taromauria te UEA n oin abaia n tatabemaniia nako.

12Ao te Atua E na tiringiia naba aomatan Itiobia.

13E na kam'akura m'akana te UEA ni kamaunaia i Aturia. E na karika kaawan Ninewe b'a te tabo ae akea te maiu iai, te rereua ae akea te ran iai.

14E na riki b'a nneia ni maeka nanai ni man n aekaia nako. E na maeka te aure i marenan baina aika a uruaki, man tangitang man kamamaa, ao e tangitang te reeben i matan mataroa. Ana bane n taekaki nako kain autina ake a karaoaki man taian tiira.

15Ao bon anne te b'ai ae e na riki nakon te kaawa ae e rangi ni kainikatonga, ao man taku i nanona b'a e rangi ni manoraoi man taiani kanganga. Aomatana a taku b'a bon tii aia kaawa ae moan matoatoa i aon kaawa nako n te aonnaba. E a riki b'a kaanga, te tabo ae e kamaroaa, ae nneia maan ni motirawa! Aomata ake a ri rarikina ana maaku man taua raroaia mai iai.