Iotua 18 - Kiribati New Version Bible

Tib'aakin nikiran aaba

1Ngke a tia aomatan Iteraera n taua te aba, ao a bane ni ikotaki i Tiro ao a katea ana Um'antabunrianna ni kaota memenana iai.

2Ai ti itiua riki barongan Iteraera ake a tuai man reke abaia.

3Ao e taku Iotua nakoia aomatan Iteraera, “Tao ana manra riki ngkami n tataninga i m'ain rinimi ao n anaa abami are E a tia te UEA are Atuaia ami bakatibu n anganingkami b'a abami?

4Kanakomaia kakateniman te m'aane man taian baronga nako. N na kanakoia b'a a na taraa aon te aba arei ni kabuta n aron are a tangiria b'a a na abanna, ao a na manga okirai.

5Ao a na tib'aa aonteaba nakon itiua te m'akoro. E na bon tiku Iuta n abana are i maiaki, ao e na tiku naba Ioteb'a n abana are i meang.

6Uotaamai rongorongon aonteaba ae kam a tia n tib'atib'aia nakon itiua te m'akoro, b'a n na kakaea nanon te UEA ni karaoa te katekeraoi i bukin tib'aakin abami i aomi.

7Ma e ngae n anne ao akea tib'aia tibun Rewi ae a na anganaki b'a abaia n ai aromi, i bukina ngke bon iai tib'aia are bon Ana ibonga te UEA ngaiia. Ao a bon tia naba n reke tib'aia te baronga are Kata, Reuben, ao Manate i mainiku, n aaba ake i mainikun te Ioretan n aron are e a tia ni karaoia ana toro te UEA are Moote nakoia.”

8Ao a nako m'aane akekei ni katarataraa abaia i mwiin anganakiia ana kaetieti Iotua are kaangai, “Kam na nako nakon te aba arei ao kam na taraa aona. Ao kam na manga okirai. Ao mai ikai i Tiro, n na tuanga te UEA b'a E na tib'a aonteaba nakoimi ni karaoa te katekeraoi i aomi.”

9Ma ngaia are a nako m'aane akekei n taraa aonteaba arei ni kabuta, ao n tib'aia nakon itiua te m'akoro. Ao a taui naba m'aitin kaawana ni kabane. Ao i mwiina a okira Iotua n te maeka i Tiro.

10Ao e karaoa te katekeraoi Iotua i bukin kakaean nanon te UEA i bukin tib'aakin te aba arei nakoia nikiraia aomatan Iteraera.

Abaia te Baronga are Beniamin

11Te moan baronga are e moan reke abana n te katekeraoi bon te baronga are Beniamin. Ao e reke i rouia te aba are e mena i marenan te baronga are Iuta ma te baronga are Ioteb'a.

12Ao e moa tian abaia mai meang man te Ioretan ao e a manga waerakea te karaabee are i meangin Ieriko ao ni manga wairio ri nanon aaba ake a tabukibuki ni karokoa rereuan Beta-awen.

13E a manga reitinako tian abaia nakon te karabee are i maiakin Ruti (arana teuana Betaera), ao e a manga ruorikaaki nako Atorata-ata are i aon te maunga are i maiakin Beta-oron i nano.

14Ao e a manga b'aoua nako aiaki mai maeaon te maunga anne ao e a manga nako Kiriata B'aara (ke Kiriata Iearim), are abaia te baronga are Iuta. Ao bon anne ngkanne tokiia mai maeao.

15E moa tiaia mai maiaki mai rarikin Kiriata Iearim, ao e nakon te koburake n ran are i Nebetoa.

16Ao e a manga biri rikaaki nako oin te maunga are e kaitaraa te m'arua are Innom, are i tabon te m'arua are Rebaim mai meang. E a manga nako aiaki n ri nanon te m'arua are Innom are i maiakin taberan maungan Iebuti ni kaineta rarikin Enrokera.

17E a manga b'aoua nako iaang nako Entemeti ni manga birinako Kerirota ni kaaitaraa kawain Arummim. E a manga ruorikaaki te tia nakon atiibun Boan (Boan bon natin Reuben te m'aane)

18ao e manga rimeangin taberani maunga ake a kaaitaraa m'aruan Ioretan. Ao e a manga ruo i nanon te m'arua,

19ao n rimeangin taberan maungan Betaokera, ao e toki n tabon Taari are Mate are mai meang are e rin mai iai ranin te karaanga are te Ioretan. Ao bon anne tiaia mai maiaki.

20Tokiia mai mainiku bon te Ioretan. Ao ai anne ngkanne tian abaia utuun te baronga are Beniamin.

21Kaawa aika a buubura ake a reke i nanon abaia utuun te baronga are Beniamin bon Ieriko, Betaokera, Emeka Ketiti,

22Beta Araba, Temaraim, Betaera,

23Awim, Bara, Obera,

24Kebaraammoni, Obeni, ao Keeb'a. Bon tebwi ma uoua bootan kaawa aikai, ao iai naba kaawa aika a uarereke i rarikiia.

25Ao bon iai Kibeon, Raama, Beerota,

26Mitibe, Kebira, Mota,

27Rekem, Irebeera, Tarara,

28Tera, Ereba, I-Iebuti (ke Ierutarem), Kibeata, ao Kiriata-iearim. Bon tebwi ma aua bootan kaawa aikai, ao bon iai naba kaawa aika a uarereke i rarikiia. Ao ai anne ngkanne te aba are a anganaki utuun te baronga are Beniamin b'a abaia i roun Iotua.