1Ao E taku Biretata are kaain Tua,
2“E na toki n ningai am kakabotaeka?
Ongora moa b'a ti na taetae.
3E aera ngkai ko taraira b'a kanga ti burababa n aroia taiani kao?
4Ko bon kaikoakiko ni marakin nanom.
Tao e nang kitanaki te aonnaba ti i bukin unim,
ke tao e nang kam'aingaki nako te maunga mani nnena?
5E na teimatoa ni mauna maiun te aomata ae buakaka n ai aron ootan te taura,
ao e na aki manga oki n ura.
6E karooaki tauran ana auti n rianna,
7E nakonako raoi ngkoa ma ngkai e a tatatata,
e a manga bon okiraki n ana babaaire,
8b'a e a manga bon uotia waena nako nanon te karaun,
ma ni kab'aka nako nanon te kinono are te b'ai ni kam'ane.
9A reke tauran waena n te b'ai ni kab'aru ma n tauaki iai.
10E raba te roobu ni kabaewae i aan te tano;
e a tia ni kaweneaki te kai ni kab'aru i m'aain kawaina.
11E otab'aniniaki ni b'aai aika kakamaaku,
a iririia n taabo nako ike e nako iai.
12Bon te kaub'ai ngkoa, ma e a maiu ni kainano ngkai;
a teitei n tataninga taian kangaanga i rarikina.
13E buta te aoraki ae kamamate i aon rab'atana,
ao e na kanaki baina ma waena n te mka.
14E taekaki nako man ana auti n rianna ike e maeka iai ma te rau,
ao e uaakinaki b'a e na kaitaraa ma Uean te mate.
15Ao ngkai, a nang maeka tabeman n ana auti n rianna
ngkana e a tia ni kab'akaaki te b'ai n aoraki i nanona i bukin kaitiakan mwiin te aoraki.
16E na riki b'a kaanga aron te aroka ae mate man wakaana nakon m'angana ake i eta.
17Ao e a toki uringana n te auti, ao n taabo nako;
bon akea ae manga ururingnga.
18E na kanakoaki man abaia aomata aika maiu,
e na kanakoaki man te oota nakon te rotongitong.
19Akea ana kariki, ao akea naba te nikira ni maiu i rouia kaain te auti are e mamaeka iai.
20A bane n ruru ma ni maaku aomata ake a maeka i mainiku,
ao i maeao ngke a ongo taekan matena.
21Bon anne tokiia aomata aika buakaka,
tokiia aomata aika aki tabe ma te Atua.
Who We AreWhat We EelieveWhat We Do
2025 by iamachristian.org,Inc All rights reserved.
