1.Rongorongo 13 - Kiribati New Version Bible

Kam'aingan te Atiniberita Iroun Tawita nako Ierutarem(2 Tam 6.1-12a)

1I mwiin tabeua te tai, ao e maroroo Tawita ma mataniwiin ana taanga ni buaka,

2ao i mwiina, e katanoata nako ia Iteraera:

3Ngke e uea Tauro, ao e aki kubaraki te Atiniberita. Ma ngkai e a roko te tai are e nang uotaki iai te Atiniberita nako Ierutarem.

Ti na kaooia aomatan Iteraera ni kabane nako ikai, n ikotaki ma ibonga ao kanoan Rewi ni kaawa ake a katobibiaki n taabo ni uteute. Ma ti na ti karaoa aei ngkana kam kariaia, ao ngkana E tangirira naba te UEA ae Atuara b'a ti na karaoia.

4Ao a kariaia aomata man kakoaua b'a e bon riai karaoana.

5Ao e bootia aomata nako Tawita ni moa man te Karaanga are Tiro i Aikubita nako Rebo-Amata i meang.

6Ao i mwiina, e kairiia nako B'aara i Iuta, are e aranaki naba b'a Kiriata-Iearim. Ao a nako ikekei n anaa te Atiniberita mani uotia nako Ierutarem, i bukina b'a bon Ana b'ai te UEA ae te Atua, are e mena ana kaintokanuea i aoia b'aai aika a maiu aika iai baiia ni kiba i aoni matan te ati.

7E bon tiku naba te Atiniberita n ana auti Abinataba, ao ngke a roko Tawita ma ana aomata ikekei, ao a kaotinakoa te Atiniberita ao a katokaa i aon te kaa ae e boou ae e katikitikaki irouia taiani kao. Ao e kairaki te kaa arei irouia natin Abinataba m'aane ake uoman ake Uta ao Aio.

8Ngke a kabane korakoraia ni m'am'aie man aneenene Tawita ma aomata ni kamoamoaa te UEA. A katangitang n tain aabi ake a uarereke ao b'aai ni katangitang ake taiani karai ao taian raea, taian timbere, ao taiani timbara.

9Ma ngke a roko n ana tabo ni kaaki kun ni uita Kiton, ao e tura nako waen te kaom'aane, ao e kanakoa baina Uta n taua te Atiniberita b'a e na aki b'aka.

10Ao e rangi n un te UEA ae te Atua iroun Uta ngke e karaoa arei, ao e tiringa Uta bon ikekei naba i rarikin te Atiniberita.

11Ao e un Tawita iroun te Atua ngke e tiringa Uta. Ma ngaia are, e arana te tabo arei b'a “Buakanakin Uta” Ao e aranaki anne ni karokoa boong aikai.

12Ao e maaku Tawita b'a tera ae e na manga karaoia te UEA nakoina, ao e titirakina i bon i rouna ni kaangai, “Tao n na riki b'a te tia kaawakina te Atiniberita?”

13Ma ngaia are, e a aki uotia nako Ierutarem, ma e a baaireia Tawita b'a e na uotia nakon mwengan Obeta-Etom, are e maeka n te kaawa are Kate.

14Ao e tiku te Atiniberita ikekei i nanon tenua te nam'akaina, ao e kakab'aia Obeta-Etom te UEA ma ana utu, ao ana b'ai ni kabane.