1-2I anganingkami ana Tua ma ana Reirei te UEA ae Atuami n te bong aei. Ongotaeka nako iai n taai nako, ao ane e na karika Iteraera te UEA b'a te botannaomata ae tanoata taekana, ma n riki b'a te botannaomata ae kakannato n te aonnaba, ao E na kakab'aiaingkami n aanga aika bati.
3E na kanakoraoi ami m'akuri ma ami ununiki te UEA.
4A na reke natimi aika bati. A na m'aiti uaan arokami n tain te tai, ao a na m'aiti naba buniia ami nanai n tiibu, nanai ni kao, ao ami nanai ni kooti.
5A na rawata kanami taian kariki ae kam na kanna.
6E na kanakoraoi ami m'akuri akana kam kakaraoi n te bong koraki.
7E na buokingkami te UEA ni kataenikaiia ami kairiribai ma ni kabirinakoia ni kauamaenakoia.
8E anganingkami te aba aei te UEA, ao E na katetekeraoingkami ni b'aai ni kabane aika kam karaoi. E na rangi ni m'aiti uaan ami tai n te aro are a na onrake ami auti ni kawakinam'arake.
9Ngkana kam ira te UEA ma n ongotaeka i rouna, ao E na karikingkami b'a ana Aomata aika raka, n aron are a tia ni berita iai.
10Ao ane a na ataia aomata ni kabane n te aonnaba b'a ana Aomata te UEA ngkami, ao ane a na maakuingkami.
11E na anganingkami natimi aika m'aiti te UEA, ao kam na kakoauaa b'a a na bungiia natiia aika m'aiti ami man aika kawakawa. E berita ngkoa te UEA nakoia ami bakatibu b'a bon ami b'ai te aba aei, ao E na karikia b'a te aba ae korakora am'araken aona i bukimi.
12E na kauka ana Autinib'ai te UEA are i karawa ike E kakaawakina iai te karau, ao E na kab'aka te karau i aon te aba n taai aika riai. E na kanakoraoi b'aai ni kabane aika kam karaoi. A na rangi ni m'aiti ami m'ane are kam na kataarauia iai botannaomata tabeua, ma kam na aki kainanoa te taarau.
13Kam na ongotaeka nakon tuua ma reirei aika I anganingkami n te bong aei, ao ane na karika Iteraera te UEA b'a te tia kairiiri i buakoia botannaomata, ao e na aki riki b'a te tia kairaki. E na kaub'ai ma ni korakora, ao e na aki kainano ma ni mamaara.
14Ma kam na aki kaaki taekan taian tua ma reirei aikai ke n taromauriia anti riki tabeman.
Te Rekenikai Nakoia Akana Aki Ongotaeka(Nak 26.14-46)Ao e taku Moote:15Kaain Iteraera, I anganingkami n te bong aei ana Tua ao Ana reirei te UEA ae Atuami. Ao ngkana kam aki ongotaeka nako iai, ao E na karokoa te rekenikai ae korakora i aomi.
16A na aki nakoraoi ami m'akuri ma ami nnenaroka.
17E na aki reke kanami te kariki ae tau ae kam na kanna.
18A na aki m'aiti natimi, ao ana karako uaan arokami, ao a na aki m'aiti naba buniia ami nanai ni kao, ma ami nanai n tiibu ao ami nanai ni kooti.
19E na aki kanakoraoi b'aai ni kabane aika kam karaoi te UEA.
20E na kamangaongaoingkami te UEA, e ngae naba ngkana kam iangoa tian te b'ai teuana, ao ane kam na namakina unna. Kam na aki teimatoa ni maiu, ao kam na kaitibo ma taian kabuanib'ai aika kakamaaku. A riki baikai ni kabane i bukina b'a kam tinanikua te UEA.
21E na kanakoa te aoraki ae kamaamate te UEA nakoimi n oroi ngkami, ao e na aki manga reke marurungimi.
22Kam na oreaki n kabuebue ao te tibutau i aon rab'atami, ao te maraki ni karokoa matemi n te tabo teuana n te aba are kam taua.
23E na karika karawa are i etan atuura kaanga taraan taubuki ae te buraati are na totokoa b'akan te karau, ao e na kamatoa te tano are i aani waemi kaanga ai aron matoatoan te biti.
Ao a na m'auteretere ma ni matoatoa taiani uita ma taiani b'aare n te angimainiku ae kabuebue ke a na mate n aorakin taian aroka.
24E na karokoa te bubu ao buakan te tano n onea mwiin te karau, ao kam na bane ni mate.
25E na kakonaakingkami te UEA irouia ami kairiribai, ao kam na uamaae nakon taabo nako. Kam na riki b'a kamarakan mataia botannaomata tabeua ngkana a nooringkami,
26ao bon akea ae na aki karauia mannikiba ma man aika kawakawa aika aki manana ngkana a kang rab'atami ngkana kam mate.
27E na kamarakingkami te UEA n te aoraki ae na kariki taian maneka aika manamana mataia ke te b'ai ae e iku n tabwenabwena i aon te kun ke taian kaboa n aron ake a bon riiriki i Aikubita. Ao bon akea b'ainaorakimi ae na reke.
28Ao kam na riki ni baba ma ni matakii. E na kaminoingkami te UEA,
29n te aro are kam na riki b'a aomata aika matakii aika kakaaenako baiia e ngae ngkana e a kiro te tawanou, ao a aki kona naba n ataia b'a e a bong ke a ngaina. A na oroingkami ma ni kimoai ami b'ai aomata ni kabane bongin maiumi, ao bon akea ae na kona ni katokiia.
30Ane a na kabae ami m'aane, ma i m'aain are a mare ma ana kabae, ao e na tauaki buuna irouia aia tautia ami kairiribai. A na katea aia auti ami koraki tabeman, ma bon akea ae na maeka iai. Ngkana kam unika te kureebe, ao kam na bon mate i m'aain taian te moan uaa.
31A na tiringaki ami kao ngke kam bon tabe n taratarai, ao kam na bon aki kona ni kana irikoia. Ao a na iraeaki ami aati ma ami tiibu mai roumi, ao a na akea kaain rarikimi ae na buokingkami n tuukia ami kairiribai.
32Ao a na katikitikaki nako natimi m'aane ao natimi aine nakon aaba tabeua ngke kam bon tei n tarataraia ma n aki kona ni buokiia. Ao ngkana kam a manga kakaaeia n iangoa okiia, ao ane kam na manga matakii man aki manga kona n nooriia.
33Ane kam na m'akuri korakora n ami nne n aroka, ma b'aai ni kabane akana kam taii a na manga kanaki ni kabane irouia i anena, ake a na karaoa ae aki raoiroi ao n taekini taeka aika rangi ni buakaka.
34A na bon rangi ni kakamaaku baika kam noori n te aro are kam na riki ni baba iai,
35ao E na oroingkami te UEA n te kaboa mai taubukin atuumi ni karokoa tabon waemi, ao a na aki kona ni mao.
36Ao E na karikingkami te UEA b'a taenikai ngkami ma ami uea nakon te aba ae kam tuai man ongongo taekana ma ami bakatibu, ao ane kam na imanonoaki taromauri taian bouananti ikekei ake a karaoaki man taian kai ao atiibu.
37Ane a na kunnainga kaain aaba tabeua ngkana a noori ami kangaanga, ma a na bon teimatoa ni b'ainingareingkami.
38Ane kam na kamrarai taian koraa aika m'aiti, ma a na rangi ni karako uaana aika kam na karekei, i bukina b'a a na kanaki arokami n taian rookati
39Ane kam na unika te kureebe ma ni m'akuri korakora ni kawakinna, ma ane kam na aki kiniki uaana, ao e na aki reke naba mai iai ami wain, b'a a na kanaki taiani kureebe n te m'ata.
40E ngae naba ngkana a maiu n aki akaaka arokami taian oriwa i nanon abami, ma ane a na b'aka uaan taian oriwa, ao e na bon aki reke naba te b'a teuana i bukin kabiran irami.
41Ao ane a na anaaki naba natimi m'aane aika uarereke ma natimi aine aika uarereke b'a taian taenikai n te buaka.
42Ane a na kana ami uita ma ami b'aare taian rookati ma ni kang baan arokami ma uaaia ni kabane.
43Ao a na rikirake ni kaub'ai ma ni korakora aomata aika iruwa i nanon ami kaawa nako, ao ngkami kam na rikirake ni kainano ma ni mamaara.
44A na akea ami m'ane n te aro are kam na taarau irouia iruwa. A na riki b'a taiani mataniwi i nanon ami bootaki, ao kam na riki b'a taani kairaki.
Taian Katekebuaka Riki Tabeua I bukin Te Aki OngotaekaAo e taku Moote nakoia:45Kaain Iteraera, ngkana kam aki ongotaeka nakon ana tua ma Ana reirei te UEA ae Atuami aika E anganingkami, ao E na karokoa taian katekebuaka aikai b'a a na kakioingkami, ma ni buakaningkami, ao n tiringkami.
46Ao a na bane aomata ni kabane n taraingkami ma kanoami ao a na ataia ae E a tia te UEA ni kab'aka ana Katekebuaka i aomi.
47Ngkana E a tia ni kamaiuraoingkami te UEA, ma kam aki taromauriia ma ni karinea ma nanomi ni kukurei,
48ao ane na kanakoia ami kairiribai b'a a na buakaningkami ma n anai ngkami b'a aia taenikai. Ao i mwiina, kam na maeka ni kainano b'a akea kanami ma nimami, ke kunnikaimi, ao a na kam'akuringkami ami toka n te m'akuri ae rawaawata ni karokoa matemi.
49A na kanakoaki ianena aika kaokoro aia taetae b'a a na buakaningkami n te aro ae karina, kaanga ai aron te ikare ngkana e kiba rikaaki.
50A na bon aki nanoanga naba teutana, ao a na bon akea naba karineaia aomata aika a kara ke n nanoangaia ataei.
51A na anai ami kao, tiibu, kooti, uita, wain, ao b'aan te oriwa, ao ma ni katikuingkami b'a kam na mate ni baki.
52Ami kairiribai ane a na buakan kaawan nako te aba are E a tia n anganingkami te UEA ae Atuami. Ane kam na taku b'a kam mano raoi n oon ami kaawa, ma ane a na uruaki naba irouia ami kairiribai,
53ao kam na kakantaninga ma te maaku. Ao n tokina kam na rangi ni baki, ao kam na kang rab'ataia natimi m'aane ma natimi aine ake E anganingkami ngkoa te UEA.
54Te aomata ngkoa ae rangi n raoiroi ma n akoi, e na manga boni kaniia natina ma n rawa n angan tarina,
55ke buuna, ke natina ake tabeman man kanana.
56Ao te aine ngkoa are e rikirake i nanon te kab'aia n te aro are e tuai man toua te tano, e nangi roko te kangaanga i rouna b'a e nang karabaa ni kana natina ae e a tib'a bungiia,
57ao n ikotaki naba ma ana beti, ao ane e na tautiia buuna, ao naan natina naba.
Te Rekenikai Ae Uotan Te Aki OngotaekaAo e taku Moote nakoia Iteraera:58Kam na ongotaeka nakoni b'aai ni kabane akana a m'akoro n ana Boki n Tua te UEA, b'a ngkana kam aki karinea te UEA,
59ao ane E na katuaaingkami ma kanoami n te aoraki ae akea b'ainaorakiana,
60n ai aron taian aoraki ake kam rangi n mamaakui ngkoa i Aikubita.
61Uringnga, ngkana arona b'a E iangoa katuaaeakin ami botannaomata te UEA, ao E kona ni kamanenai aekakin aoraki nako ma kabuanib'ai, tiaki ti akana m'akoro taekaia n ana Boki n Tua te UEA.
62A rangi ni m'aiti ami koraki n aron itoin karawa n aron ae kam bon ataia, ma ngkana kam aki ongotaeka nakon te UEA ae Atuami, ao a na karako nikirami n tiku ni maiu.
63E rangi ni kukurei te UEA ni katetekeraoingkami ma ni buoka ami botannaomata ni karikirakea ngke kam buakana te aba n taua. Ma ngkana kam aki ongotaeka nakoina ao E na manga bon rangi ni kukurei naba ni koutingkami mani wakaami.
64Ao ngkami aika kam aika reke maiumi kam na manga maenako nakon botannaomata tabeua i aon te aonnaba, ao ane kam na imanonoaki b'a kam na taromauri taian atiibu ao taian bouananti aika taiani kai aika a bon tuai buokingkami ke ni buokiia ami bakatibu.
65Ane na aki reke motirawami, ao e na roko n taai nako uringan mwengami, ao kam na bon aki kona n okirikaaki.
66Ao kam na maiu ma maakakin te mate ae e korakora iroumi.
67N te ingabong koraki kam na uti n noori b'aai aika rangi ni kakamaaku, ao ane kam na kaangai n tatabemaningkami, “Tera ngke e a bong!” Ma ngkana e a bong, ao ane kam na manga maaku ao kam na kaangai, “Tera ngke e a ngaina!”
68I tuangngkami ngkoa b'a kam na aki okira Aikubita. Ma ngkai, E na kanoai taiani kaibuke iroumi te UEA, ao E na kaokingkami rikaaki nako ikekei. Ao i mwiina, ane kam na kakaaea angan kaboakimi nako b'a tooro, ma ane a na akea ae e na kani kabooingkami.
Who We AreWhat We EelieveWhat We Do
2025 by iamachristian.org,Inc All rights reserved.
