Te Otinako 33 - Kiribati New Version Bible

E Tuangiia Aomata Te UEA

B'a A Na Kiitana Te Maunga Are Tinai

1E taku te UEA nakon Moote:

Ko na kairiia aomata ni kaotinakoia mai Aikubita. Katauraoiko ngkai b'a ko na kairiia nakon te aba are I a tia ni berita iai nakoia aia bakatibu ake Aberaam, Itaaka, ao Iakob'a.

2Bon te aba are e rawata iai te miriki ao ana karewe te manibeeru, ao N na kanakoa te anera b'a e na kairoroia ni kanakoia aomata ake a maeka ikekei,

3aika kaain Kanaan, kaain Amora, kaain Eta, kaain Iwa, ao kaain Iebuti, N na iriia au aomata, ma a bon rangi ni kamangao, ai ngaia are N na kamaunaia i m'aain rokoia ikekei.

4Bon i m'aain naba taetaen te UEA n taekin taeka aika a kamaraki aikai, E a kaman tuanga Moote ni kaangai, “Bon aomata aika a kamangao aomata aikai, ao N na bon tiringiia n te tai ae e waekoa ngkana I iriia.

5Ma tuangiia b'a a na buuti moa aia b'ainikatamaaroa, ao I mwiina, I a iangoa te b'ai ae N na karaoia nakoia. Ma ngaia are, a tang aomata,

6ao a katoka katokaan taian b'ainikatamaaroa i aon rab'ataia i mwiin kiitanakin te Maunga are Tinai irouia.

Ana Um'antabunrianna Te UEA

7E tataneiai Moote ni kaakatea ana auti n rianna ni kararoa ma aia maeka. E aranna b'a “te auti ni kabowi”, ao a nako iai aomata akana a tangiria ni kan ongo te rongorongo mairoun te UEA.

8Ni katoa te tai are e otinako iai Moote man te auti n rianna, a aki toki n tei aomata i mataroan oin aia auti n rianna ma ni matakuakinna ngkana e rin.

9Ao i mwiina, a na bobaraaki b'a e na ruorikaaki te nang ae e matenten i matan te auti n rianna,

10ao E na taetae te UEA ma Moote n itaramata, kaanga aron temanna ae e maroroo ma raona.

11I mwiin anne, e na manga oki Moote nakon aia maeka, ma e na tiku ana kauoman are Iotua are te rorobuaka n ataei n te auti n rianna.

E berita Te UEA

B'a Ana Riki B'a Ana Aomata

12E taku Moote nakon te UEA, “I ataia b'a ko a tia n tuangai b'a N na kairiia aomata aikai nakon te aba are Ko berita iai nakoia. Ma Ko bon tuai tuangai b'a antai ae e na riki b'a au kauoman. Ko a tia n taekinna b'a raoraou Ngkoe ao Ko kukurei i rou.

13Ngkana arona b'a e koaua aei, ao Ko na kaotia nako iu b'a tera am babaaire, ao N na ongotaeka ma n reitanako arou ni kakukureiko. Ao Ko na aki m'aninga ae Ko a tia n rinea te botannaomata aei b'a am b'ai.”

14E taku te UEA, “N na iringkami ma n anganingkami te rau.”

15Ao e manga kaeka Moote ni kaangai, “Ngkana arona b'a Ko aki iriira, ti butiiko b'a Ko na aki kanakoira man te tabo aei.

16Ma ngkana Ko iriira, ao a na bane n ataia aomata b'a Ko kukurei i rouia am aomata ao Ngai, ao n aron are ti na kaokoro iai ma aomatan nako te aonnaba.”

17Ma ngaia are, E taku te UEA nakoina, “N na karaoi b'aai n aron are kam a tia ni buubutiai iai, i bukina b'a bon raoraou ngkami ae I kukurei i roumi.”

18Ao e manga taku Moote, “I tataro b'a Ko na kariaia b'a N na nooriko ma mimitongim ni kabane.”

19Ao E kaeka te UEA ni kaangai:

E tamaroa. Bon ami UEA Ngai, ao N na kaota au akoi ma au nanoanga nakoia aomata ni kabane aika I a tia n rineia. N na kariaia b'a ko noora mimitongiu ma n ongo arau ae E tabu,

20ma N na bon aki kariaia b'a ko na noora matau, i bukina b'a e na bon mate ane e noora matau,

21Bon iai te b'a teuana ae e aki raroa mai rou. Ko na tei i rarikina,

22i m'aain ae I ri rarikina ma mimitongiu ni kabane, N na katikuko n te tabwena ni b'a. N na rabuna matam ni baiu ni karokoa I taonnako mai roum.

23Ao i mwiina, N na kanakoa baiu, ao ko na ti noora nuukau. Ko na aki noora matau.