Te Tua-Kaua 29 - Kiribati New Version Bible

Te Boraraoi I Moaaba

1Ma ngaia are, e a kabanea ana taetae Moote i bukin tuangakiia aomata te b'ai ae a riai ni karaoia i bukin kaawakinan te boraraoi ma te UEA are E karaoia nakoia i Moaaba, are bon raon are E a tia ni karaoia te UEA n te Maunga are Tinai. Te Katenua N Taetae: Kawakinan te Boraraoi Irouia Iteraera Ma Te UeaTe UEA ae Atuaia Iteraera

2-3Ao e wetea te botannaomata are Iteraera Moote ao e taetae nakoia ni kaangai:

Ngke kam mena ngkoa i Aikubita, ao kam noora te UEA ni karaoi taiani kakai are a karika te kangaanga nakon te uea ma ana aobitia, ao kaain abana ni kabane.

4-6Ao e bon tuangkami naba ni kaangai, I kairingkami i nanon 40 te ririki i nanon te rereua, ao a na aki uruaki ami kunnikai ao ami kauniwae, ao I anganingkami naba kanami ae raka. I karaoi baikai b'a kam aonga n ataia b'a bon Atuami Ngai.

Kam ti kona n atai nanon baika kam a tia n noori ao baika kam a tia n ongo ngkana E bitii nanomi te UEA.

7Ngke ti moan kateimaeka n rianna ngkoa ikai, ao a buakaniira uean Etibon are Taion ao uean Batian are Oka, ma ti konaia.

8Ao ti taua abaia ao ti tib'aia i aoia baronga ake Reuben, Kaata, ao Manate mainiku.

Kaawakinan Te BoraraoiAo e taku Moote:

9Kaain Iteraera, E a tia te UEA ni karaoa te boraraoi ma ngkami, ao ngkana kam kaawakina tib'angami, ao kam na tetekeraoi ni b'aai ni kabane akana kam karaoi.

10Kam a bane n tei i matan te UEA, ngkami aika taani kairiiri, taian aobitia, ami rorobuaka nako,

11ateiaine, ataei, ao I-Abatera ake a uraki aia ao a uraki ran i bukimi.

12Kam bane n roko n te tabo n taromauri aei ni kaota nanomi b'a kam na kaawakina tib'angami n te boraraoi ma te UEA ae Atuami.

13-15E berita te UEA n te boraraoi aei, b'a kam na riki b'a ana Aomata, ao E na riki b'a Atuami. E moan karaoa te boraraoi aei ma ami bakatibu ake Aberaam, Itaaka, ao Iakob'a, ao ngkai E a manga karaoa naba te berita aei nakoimi, ma tiaki ti nakoimi ma bon nakoia naba kanoami.

16-17Ngke ti maeka i Aikubita, kam nooriia kaain Aikubita n taromauriia taian bouananti aika karaoaki man te kai, te atiibu, te tirewa, ao te koora, aika ribaaki. Ao i mwiina, ngke ti a manga m'ananga i buakoia botannaomata ake tabeua, ao kam noori aomata iai b'a a taromauri bouananti tabeua aika ribaaki.

18Ma ngaia are, kam riai ni kakoaua raoi b'a a bon kakaonimaki kaain ami baronga nako nakon te UEA ma n aki tataromauri bouanantin botannaomata tabeua.

Ngkana iai mai roumi ae taromauri taian bouananti, ao kam na riki b'a kaanga wakaan te aroka ae rangi ni mao, ma ni kamaamate uaana.

19E ngae ngkana bon Iteraera ngkoe ae ko atai ni kabane kanoan te boraraoi ma te UEA, ma E na bon aki naba kakab'aiako ngkana ko kakaitaraa. Ko na taku i nanom b'a ko kona ni karaoia ao akea tuaam, ma ko na karika te kangaanga nakoia Iteraera ni kabane b'a a na katuaaeaki naba ma ngkoe.

20-21Ao E na rangi n un te UEA, ao E na aki kab'arai ami bure, ma E nang kaokoroingkami mai buakoia baronga ake tabeua. Ao i mwiina, E na kamateingkami ni kab'aka i aomi taian taeka ni kamaraia ni kabane ake n Ana Boki n Tua te Atua, ao ane e na mauna nako taekami n aki manga uringaki ni karokoa tokin aonnaba.

22Ao E na orea abami n taian aoraki ma kabuanib'ai. Ao a na noora abami kanoami ao I-ianena ake n aaba tabeua,

23b'a e a riki b'a te rereua ae rangi ni kabuebue ae taari aona ni kabane, ao te bubu ae m'auteretere, ao akea te aroka ae e kona ni unikaki iai, akea te aroka ae kona ni bwebwee iai, ao bon akea naba te aroka ae e kona ni maiu iai. A na riki abami b'a kaanga aron maten aaba ake i rarikin kaawa ake a buubura ake Tootom, Komora, Atema, ao Teboiim i mwiin unin te UEA irouia ao E kamaunaia.

24Ao ane a na titiraki aomatan botannaomata tabeua ni kaangai, E aera ngkai E kamaunaa te aba aei te UEA? Tera ae E a rangi n un iai?

25Ao a na anganaki te kaeka ae kaangai:

A tataromauria te UEA ara bakatibu ngkoa, ma i mwiina, ngke E a tia te UEA ni kaotinakoia mai Aikubita ma ni karaoa te boraraoi ma ngaiia, ao a manga aki ira nanon te boraraoi

26ma ni manga taromauriia bouananti tabeman aika bon akea buokaia mairouia. Ao E a tia te UEA n ribaia Iteraera b'a a na taromauriia taian atua aikai.

27-28Ma ngaia are, E a rangi n un, ao E a katuaaea te aba ni kab'akai taiani kamaraia ni kabane i aona, ake a koreaki n Ana Boki n Tua te Atua. Ao i mwiina, E kouta Iteraera mai oina, ao e karenakoa nakon abaia I-ianena, ike a mena iai ni karokoa te bong aei.

29E a tia ni kaota ana Tua te UEA ae Atuara nakoira, ao ti na riai n ongotaeka iai n taai nako ma kanoara, ma bon iai naba b'aai aika E tuai kaoti nakoira.