Itaia 47 - Kiribati New Version Bible

E Na B'aka B'aburonE taku te UEA:

1Te Kaawa ae e buubura ae B'aburon,

ko rangi ni maraurau

ao ko ubu,

ma ko na bitaki.

Kaaki m'aakam ni uea

ao tekateka i aon te baareka.

2Moana kamantan te uita!

Kanakoa rabunan matam.

Buuti kunnikaim aika a tamaroa

ao ri aon te karaanga.

3Ko na rawata ni mamaa

ni kabebeekanaki,

i bukina b'a I a tia ni karaoa te irantaanga,

ao bon akea ae e konaa ni biri nako.

4Bon te UEA Ngai ae Moan te M'aaka,

Atuan Iteraera ae e tabu.

Boni Ngai aia tia kamaiu.

5B'aburon, kainab'aabu!

Tekateka n te roo.

Ko nang aki manga butim'aeaki irouia botannaomata nako

b'a aia ueanaine ngkoe.

6I un ngkoa irouia au aomata.

Ma ngaia are, I kanakoko b'a ko na anaa abaia

ma ni karokoa te kamaamaaeaki i aoia.

Bon akea am Nanoanga nakoia,

ma ai moaraara riki

nakoia ake a kara.

7Ko taku n am iango

ko na riki b'a te ueanaine n aki toki.

Ko aki tabe ma te b'ai ae ko a tia ni karaoia;

ko bon aki roko n te uringnga

ae ko na manga m'ane.

8Ko taku inanom b'a ti ngkoe

ae ko rangi ni m'aaka,

n te aro are manga akea buum

ma ni bua natim nako.

Ti te b'ai ae ko tabeakinna bon te kukurei,

ma ko na kakauongo nakon te b'ai ae I taekinna.

9A na toki korakoran

m'aakam n tabunea ma am b'ainikawai,

ao ane e na akea buum

ao a na mauna nako natim.

10Ko na karabako i akuun te buakaka

kaanga te otanga ao ko na kaangai,

Akea ae konaa n noorai!”

Ko kananobabaaki n rabakaum

ao am ataib'ai;

ko iangoia i bon iroum b'a bon ti ngkoe

ae ko tautaeka.

11Ma e na oro te kabuanib'ai

n akea te katauraoi

ao a na aki konaa ni buobuoki

m'aakan am tabunea.

12Teimatoa ni kamanenai am tabunea

ma am b'ainikawai.

n aron are ko a tia ni kakaraoia.

Tao e na mena ngkoa, tao

ko a tia ni kakamaaka temanna!

13Ko a tia ni kakuako,

n titiraki taeka ni buobuoki

mairouia ake a kamateb'ai taian itoi

n taekin iai kanoan bong aika a na roko

te nam'akaina teuana i mwiin teuana.

Naako titirakiniia arom ni kamaiuaki

man b'aai aika a nang riki.

14Bon akea te b'ai ae a konaa ni karaoia

aomata aika a onimakini taian itoi

kaanga taian uteute

i nanon te ai ae e ura.

Bon akea naba ae e konaa ni kateimatoa n aangnga,

i rarikin te ai

ae e ti am'arake ma n te uteute.

15Bon aikai taan kaiwa

aika kam a tia ni karaoa te m'akuri ni bitineti ma ngaiia

ni kabane bongini maium.

Ma a bon aki ataa te tabo ae a na nako iai,

a aki konaa ni kamaiungkami.